1 ¹ بكتابي الأول يا حبيب الله ،كلمتك على كُل ما بدأ يسوع المسيح يعمله ويُعلم بُه، من الاول ² لليوم اللي أرتفع فيبه للسماء. بعدما جاب الوصايا حقه ، بالروح القدس لرُسله اللي أختارهم . ³ فبعد ما مات ، بين لهم بإثباتات كثيرة إنو حي ، وأظهر نفسه لهم خلال أربعين يوم ، وعلمهم على مملكة الله . ⁴ ومرة من المرات ، لما كان يأكل معهم ، وصاهم وقال : " لا تسيبوش مدينة القدس ، إنما انتظروا إنو يكمل الأب وعده لكم مثلما سمعتم مني . ⁵ لأن يوحنا عمد الناس بالماء، اما انتم شتتعمدوا بعد أيام قليلة بالروح القدس !

⁶ ولما الرُسل اجتمعوا مع يسوع سألوه : " يا سيد ، هل بيهذا الوقت شترجع السلطة لبني إسرائيل ؟ " ⁷ جوب لهم : " ما شتعرفوش الأوقات والمواعيد اللي حددها الأب بسلطانه الخاص . ⁸ إنما لما يجيء الروح القدوس عليكم ،شتلاقوا قوة وشتكونوا لي شهود في القدس ، وبكل بلاد يهوذا والسامرة ، وإلى آخر الأرض . "

⁹ وبعدما قال هذا ، طلع للسماء قُدام عيونهم ، وبعدين شليتُه سحابه من أنظارهم .

¹⁰ ولما هم يشوفوا للسماء وهو يبتعد عليهم ، فجأة طلع لهم أثنين رجال بثياب بيضاء. ¹¹ وقالوا لهم : " يا رجال الجليليون ، لمو انتم واقفين تشوفوا للسماء ؟ يسوع هذا اللي طلع منكم للسماء ، هو نفسه شيرجع بنفس الطريقة مثلما شفتموه يمشي لهناك . " ¹² فرجعوا للقدس من الجبل اللي هو معروف بأسم جبل الزيتون ، وهو قريب من القدس على بعد أقل من كيلومترواحد. ¹³ ولما وصلوا للمدينة ، طلعوا للغرفة اللي كانوا ساكنين فيها في الطابق العلوي . والموجودين كانوا هم : بطرس ويوحنا ويعقوب وأندراوس، وفيلبس وتوما ،وبرثلماوس ومتى ، ويعقوب بن حلفى وسمعان الغيور ،ويهوذا أخو يعقوب . ¹⁴ كل هاذم كانوا يداوموا على الصلاة بقلب واحد ، ومعهم بعض من الحريم ومريم أم يسوع وإخوته .

¹⁵ وكان في يوم من الأيام ، اجتمعوا مع بعض حوالي مئه وعشرين من المؤمنين بيسوع ، فوقف بُطرس بينتهم وكلمهم وقال : ¹⁶ " يا إخواني ، كان لازم انُه يوقع كلام الكتاب اللي قاله الروح القدس بفم داود النبي ،على يهوذا اللي رجع دليل للي مسكوا يسوع . ¹⁷ لانُه كان واحد مننا ، وكان له نصيب معنا بيهذي الخدمة . "

¹⁸ وبعدين هو أشتري مزرعة بالفلوس اللي حصلها مقابل الخيانة ، وفيها وقع على وجهه ، فافتتحت بطنُه ، وخرجت الامعاء حقه . ¹⁹ وأهل القدس عرفوا كلهم بيهذي الحادثه ، فخلوا اسم المزرعة : " مزرعة دمخ " بلغتهم ، اللي معناها مزرعة الدم .

²⁰ وقال بطرس: " والكتاب يقول بالمزامير : ليت بيته ترجع خرابه ، ولايسكن بها واحد . ويقول كمان : " لياخذ وضيفته واحد ثاني. ²¹ لهذا لازم انُه نختار واحد من اللي رافقونا طول المدة اللي جلس بها سيدنا يسوع معنا ، ²² من لما عمده يوحنا إلى يوم طلوعه مننا للسماء ، عشان يكون معنا شاهد بقيامة يسوع .

²³ فالحاضرين رشحوا أثنين رجال وهم : يوسف اللي يُدعى بارسابا ولقبه بيستس ، ومتياس. ²⁴ وبعدين صلوا وقالوا : " يارب ، انت تعرف قلب كل واحد . كلمنا اللي تختاره من بين هاذم الأخوة ، ²⁵ ليعمل بيهذي الخدمة ويكون رسول بدل يهوذا ، لإنو سيبها ومشي للمكان اللي يستحقه ." ²⁶ وبعدين رموا بالقرعة عليهم ، فوقعت على متياس ، فضموه الى الرُسل الاحد عشر .