2 ¹ وبطلوا من كُل شر وغش ونفاق وحسد وإفتراء. ² ومثل أطفال ولدت الآن تتعطش للحليب، تعطشوا لكلمة الله الصافية، عشان تنموا فيبها وتوصلوا للنجاة. ³ لأنكم قا طعمتم أن المسيح حلو.

⁴ يسوع المسيح هو الحجر الحي اللي الناس ما قبلوه، لكن الله اختاره وهو غالي عنده. فتعالوا أنتم لعنده. ⁵ وأنتم خليكم كمان حجارة حية تبنوا فيبها بيت روحي، عشان تكونوا كهنة صالحين، تقدموا لله ذبائح روحية يقبلها الله بواسطة يسوع المسيح. ⁶ والله يقول بكتابه: "بأطرح بالقدس حجر غالي مختاراً، هو حجر الأساس، واللي يؤمن فيبه ما يستحيش." ⁷ والحجر هذا هو غالي عندكم اللي أنتم مؤمنين فيبه، أما اللي ما يؤمنوش، فهو الحجر اللي رفضه العمارين، واصبح هو حجر الأساس. ⁸ وهو كمان حجر يخلي الناس تصطدم فيبه، وصخرة تخليهم يتعثروا، ولِأنهم ما رضوش يؤمنوا برسالة المسيح يتعثروا وهذه نهايتهم. ⁹ وأما أنتم فشعب مُختار ومملكة كهنة وأمة صالحة. أنتم شعب تتبعوا الله، عشان تكلموا الناس بصفات الله العظيمة، اللي اخرجكم من الظلام إلى نوره الساطع. ¹⁰ ومن أول أنتم ما كنتمش شعب الله، والآن أنتم شعبه. وكنتم غير مرحومين من أول والآن الله رحمكم.

¹¹ يا أحبابي، أنتم مغتربين بهذه الأرض وتزورها زيارة مؤقتة. فأطلب منكم تبتعدوا عن شهوات الجسد الوسخة اللي تحارب النفس. ¹² خلوا حياتكم صالحة بين الناس الغير المؤمنين. ولو هُم يتهمُوكم كذب بإنكم تفعلوا الشر، بس هُم يشوفوا أعمالكم الصالحة، فيسبحوا الله يوم يجيء.

¹³ اتبعوا كُل حكومة تنظم مصالح الناس. ¹⁴ اتبعوا الملك، اللي هو السلطة العليا، والحكام اللي يعينهم الملك اللي يعاقبوا الناس المذنبة ويكافئوا الناس الصالحة. ¹⁵ فالله يشتيكم تعملوا الحاجات اللي هي تمام كُل وقت، فتسكتوا الكلام اللي يجي من جهل الناس الأغبياء. ¹⁶ عيشوا أحرار، بس الحرية هذه ما تستخدموهش غطاء لأشياء موش صحيحة، إنما عيشوا كأنكم عبيد لله. ¹⁷ اِحترموا كُل الناس، حبوا إخوانكم المؤمنين، اتقوا الله، أكرموا الملك. ¹⁸ إيها الخدم، اطيعوا واحترموا اسيادكم، سواء كانوا صالحين وطيبين أو قاسين. ¹⁹ ما أحسن أن الواحد يتحمل التعب وقسوة الظلم عشان الله. ²⁰ لو كُنتم تعملوا حاجات غلط ويضربوكم وتتحملوا ، إيش من أجر لكم على غلطكم؟ أما لو كُنتم تعملوا حاجات تمام وتلاقوا ضرب وتتحملوا فأنتم هنا صح لكم فضل عند الله. ²¹ فالله دعاكم تشاركوا المسيح بهذا الأوجاع. فالمسيح استوجع عشانكم، وهو قدوتنا اللي نمشي بعده. ²² المسيح ما فعلش ولا غلط، ولا كذب كذبة واحدة. ²³ سبوا له وهو ما ردلهمش، عذبوموه وهو ساكت ولا قلهم حاجة، إنما سلم أمره لله اللي شيحكم بالعدل. ²⁴ المسيح تحمل الذنوب حقنا بجسمه فوق الصليب، عشان تموت الذنوب حقنا ونعيش حياة صالحة. وبالجروح حقه شُفينا. ²⁵ بعد ما كُنتم مثل الغنم الضايع، ولكن الآن رجعتم لعند راعي النفوس وحارسها.