5 ¹ اي واحد يؤمن أنوه يسوع هو المسيح، فهو ابن الله. واللي يحب الآب يحب أولاده كمان. ² فاحنا نعرف انحنا نحب أولاد الله لو احنا نحب الله ونتبع الوصايا حقه. ³ ومحبتنا لله شتظهر لو احنا نعمل بالوصايا حقه، والوصايا حقه سهلة. ⁴ فاي واحد ابن الله قادر يهزم هذه الدنيا، والإيمان حقنا هو القوة اللي نقدر نهزم فيبه هذه الدنيا. ⁵ وما يقدرش واحد يهزم هذه الدنيا، إلا اللي يؤمن بيسوع المسيح أنوه ابن الله شيقدر. ⁶ فيسوع المسيح هو اللي جاء لنا بالماء والدم، وموش بالماء وحده، فهو جاء بالماء والدم. ويشهد له الروح القدس، لأنوه الروح هو الحق نفسه. ⁷ فالمسيح معه ثلاثة شهود: ⁸ الروح والماء والدم، وهاذوه الثلاثة بواحد. ⁹ لو كنا نصدق شهادة الناس، فالشهادة اللي جابه الله أكبر، لأنه شهادة الله عن ابنه. ¹⁰ اللي يؤمن بابن الله يكون واثق بالشهادة هذه بقلبه. واللي ما يصدقش الله، مايصدقش الشهادة اللي الله شهد فيبه لابنه، فهو يتهم الله بالكذب. ¹¹ والشهادة هذه أنوه الله جاب لنا حياة ابدية بابنه. ¹² فاللي له ابن الله فله الحياة، واللي مالش ابن الله، فما فيش معه حياة. ¹³ انا اكتب لكم انتم المؤمنين باسم ابن الله، عشان تثقوا أنوه معاكم حياة أبدية. ¹⁴ احنا واثقين بالله ثقة كبيرة، فاي حاجة نشتيها تتوافق مع اللي يشتي الله فهو يستمع لنا. ¹⁵ ومادام احنا واثقين أنوه يستمع لنا بكُل حاجة نشتيها، فاحنا نثق أنوه الله شيجيب لنا اللي نشتي.

¹⁶ لو واحد شاف منكم أخوه يفعل ذنب ما يؤديش فيبه للموت، فصلي لاخوك عشان تجيب لأخوك حياة هذا لو الذنب ما يؤديش فيبه للموت. وبه ذنب يؤدي بالواحد للموت ما قصدش انا تصلوا عشان هذا. ¹⁷ اي معصية ذنب، وموش كُل ذنب يؤدي بالواحد للموت.

¹⁸ احنا عارفين أنوه أولاد الله ما يفعلوش ولا ذنب، لأنوه ابن الله يحفظهم، وما يقدرش لهم إبليس الشرير. ¹⁹ احنا عارفين انحنا نطيع الله، ولاكن العالم كُله متحكم فيبه الشيطان.

²⁰ احنا عارفين أنوه ابن الله قا جاء، وعلمنا عشان نعرف الإله الحق، واحنا نتبع هذا الحق لانحنا نتبع ابنه يسوع المسيح، اللي هو الإله الحق والحياة الأبدية.

²¹ يا أولادي الغاليين، انتبهوا لأنفسكم من الالهة الكذابة.