¹ Rima ano laka dakoh utuknglah Imam ahso Ananias samu-samu ge' beberapa ungan sok ama-ama ge' nyungan pengacara bagatn Tertulus. Ayo a' ngadap wali negri ge' nyampekan dakwaan ayo a' ka terhadap Paulus. ² Paulus gatn maba' menghadap ge' Tertulus mulai ngadakwa ini', watn a': "Feliks da mulia, karna usahamu kai' tarus-manarus nyacap kasajahteraan, ge' karna kebijaksanaanmu karah pakse perbaikan da laka' terlaksana untuk bangsa kai'. ³ Samaatn a' slalu ge' ka ume-ume kai' nyambut nige' tarima kasih pakse. ⁴ Tapi supaya iya' terlalu karah nangkabas waktumu, ikitn mahi, supaya imu' dangah kai' sabantar nige' kemurahan atemu da terkenal dakoh. ⁵ Laka' nyata ka kai', bahwa sok diah adalah panyakit sampar, sok da menimbulkan kakacauan ka antara samaatn sok Yahudi ka saluruh dunia da baradap, ge' bahwa ini' adalah nyaungan tokoh patn sekte sok Nasrani. ⁶ Malahan ini' nyuba malanggar kekudusan ramin Tuhan. Karna dakoh kai' naap ini' ge' ngate ngakimi a' menurut hukum taurat kai'. ⁷ Tapi kepala pasukan Lisias utukng nyegah a' ge' ngarebut ini' ge' kakarasan patn barekng kai', ⁸ lalu marintah sok-sok pandakwa utukng ngadap imu'. Kalo imu' sendiri mariksa ini', katnlah ini' pane samaatn sesuatu da kai' tuduhkan ka ini'." ⁹ Dan uga' sok-sok Yahudi nyukong dakwaan dakoh nige' muji' a', bahwa masalah dakoh memang pakse ladakoh. ¹⁰ Lalu wali negri dakoh mangkatn isyarat ka Paulus, bahwa ini' boleh nyansana. Maka nyansanalah Paulus: "Ikitn pane, bahwa laka' bataun-taun tuhi a' imu' jadi hakim samo bangsa diah. Karna dakoh tanpa ragu-ragu ikitn mambela perkarako diah ka hadapanmu: ¹¹ Imu' bisa memastikan, bahwa kati' rabeh patn dua balas ano dalalu ikitn utukng ka Yerusalem untuk sambahyang. ¹² Dan kati' pernah sok amput ikitn sedang badaru' ge' nyungan sok atau ngadakan hura-hura, baik ka sadatn Ramin Jabata, maupun ka sadatn ramin sambahyang, atau ka tampat lain ka kota. ¹³ Dan ayo a' kati' bisa ngabuktikan ka imu' jai da mati' da gatn nuduhkan ayo a' ka diri ikitn. ¹⁴ Tapi ikitn ngako' ka imu', bahwa ikitn berbakti ka Jabata nenek moyang kai' nige' nganut pagala' Tuhan, yaitu pagala' da ayo a' muji' sekte. Ikitn pacaya ka samaatn sesuatu da ani gatn nulis ka sadatn hukum taurat ge sadatn kitab nabi-nabi. ¹⁵ Ikitn mana' pengharapanko' ka Jabata, samu' ge' ayo a' uga', bahwa akan ani kebangkitan samaatn sok kabis, baik sok-sok da taman maupun sok-sok da kati' taman. ¹⁶ Karna dakoh ikitn slalu barusaha untuk hidup nige' hati nurani da murni ka hadapan Jabata ge' manusia. ¹⁷ Laka' beberapa taun tuhi a' ikitn utukng agi' ka Yerusalem untuk minsakng pamangkatn untuk bangsako' ge' untuk mempersembahkan persembahan-persembahan. ¹⁸ Sementara ikitn melakukan samaatn a' dakoh, beberapa sok Yahudi patn Asia amput ikitn ka sadatn Ramin Jabata, ngalaka' ikitn selesai mentahirkan diri kitn, tanpa sok karah ge' tanpa keributan. ¹⁹ Ayo a' lah da sebenar a' harus ngadap imu' ka diah ge' ngajukan dakwaan ayo a', kalo ayo a' da umpu' sesuatu terhadap iko'. ²⁰ Tapi biarlah sok-sok da hadir ka diah mati' namparu' jahe' jaikah da ayo a' amput, waktu ikitn gatn ngadapkan ka Mahkamah Agama. ²¹ Atau mungkinkah karna satu-satu a' saratn da gatn muji', waktu ikitn agutn ka tuda'-tuda' ayo a', yaitu: Karna hal kebangkitan sok-sok kabis, ikitn ano diah gatn ngadapkan ka imu'." ²² Tapi Feliks da pane banar-banar akan Pagala' Jabata, menangguhkan perkara ayo a', watn a' :"Nga utukng a' kepala pasukan Lisias ka diah, ikitn akan naap kaputusan sadatn perkaramu'." ²³ Lalu ini' marintah perwira dakoh tetap nahan Paulus, tapi nige' tahanan ringan, ge' kati' boleh nyegah sahabat-sahabat a' ngalayani ini'. ²⁴ Ngalaka' nyamani ano utuknglah Feliks samu'-samu' ge' sautn a' Drusila, nyaungan som Yahudi; ini' ngadu maba' Paulus, lalu dangah patn a' tentang kepercayaan ka Yesus Kristus. ²⁵ Tapi waktu Paulus nyansana tentang kabanaran, penguasaan adup ge' panghakiman da akan utukng, Feliks jadi buut ge' nyansana "Cukuplah idu' ge' anulah mati'; apabila ani kesempatan baik, ikitn akan ngadu maba' imu'." ²⁶ Samantara dakoh ini' baharap, bahwa Paulus akan mangkatn uang ka ini'. Karna dakoh ini' sering maba' a' untuk nyansana ge' ini'. ²⁷ Tapi ngalaka' genap dua taun, Feliks gatn nganti oleh Perkius Festus, ge' untuk naap ate som Yahudi, ini' nangkabiar Paulus tatap ka sadatn Panjara.