^{1 2 3} 1.ಯೇಸು ನೂನ ಮಾಂಡ್ಲಾ ಗುಡ್ಗಿ ಪೈನಾಡು. 2.ಪೊದ್ನಾ ಆತುಡು ತಿರ್ಗಿ ದೇವಾಲಾಯನ್ಗಿ ವಚ್ನಾಪ್ದು ಜನಾಲಂದ್ರು ಆತುಡ ದೇಗ್ಗರ್ಗಿ ವಚ್ನಾರು; 3.ಆತುಡು ಕುಚ್ಗಾನಿ ವಾಳ್ಗಿ ಉಪದೇಶಂ ಸೇಸ್ತುoಡಗ ಶಾಸ್ತ್ರಿಲು ಫರಿಸಾಯಲು ವ್ಯಭಿಚಾರಂಲಾ ಸಿಕ್ನಾ ಒಕ್ಕ ಆಡಿದ್ದಾನಿ ಆತುಡ ದೇಗ್ಗರ್ಗಿ ತಿಸ್ಗಾವಚ್ಚಿ ದಾನ್ನಿ ಮದ್ಯಾನಿಲ್ಪಿ- ^{4 5 6} 4.ಬೋಧಕುಡೆ,ಈ ಆಡದಿ ವ್ಯಭಿಚಾರಂ ಸೇಸ್ತುನ್ನಪ್ಪಡೆ ಸೈಗಿ ಸಿಕ್ಕಿಂದಿ. 5.ಇಟ್ಟವಾಲ್ನಿ ರಾಯಿಸ್ರಿ ಸಂಪಾಲಾನಿ ಮೋಶೆಯ ಧರ್ಮಾಶಾಸ್ತ್ರoಲಾ ಮಾಕಿ ಅಪ್ಪಣೆ ಇಚ್ನಾಡು;ದೀನ್ನಾ ವಿಷಯಂಲಾ ನುವ್ವ ಏಮಿ ಸೋಪ್ತಾವು ಅನಿ ಆತುಡ್ನಿ ಅಡ್ಗಿನ್ನಾರು. 6.ಆತುಡಪೈನಾ ತಪ್ಪುಮೋಪೆದಾನ್ಗಿ ಎಮೈನಾ ಒಕ್ಕ ನಿಮಿತ್ತಂ ಬೇಕೈನoದ್ಗು ಈತುಡು ಎಮಟಾಡೋ ಸೂತಮು ಅನಿ ಅಟ್ಟೆ ಅಡ್ಗಿನ್ನಾರು.ಆಯ್ತೆ ಯೇಸು ವಂಕಾನಿ ಎಲ್ನಿಂಕ ನ್ಯಾಲ್ ಪೈನಾ ರಾಸ್ತಾಉಂಟಾಡು. ^{7 8} 7.ವಾಳು ಆತುಡ್ನಿ ಉಡ್ಗುoಡ ಅಡುಗ್ತಾವುನ್ನಪ್ದು ಆತುಡು ನೆಟ್ಗಾ ಕುಚ್ಗಾನಿ ವಾಳ್ಗಿ-ಮೀಲಾ ಪಾಪಂಲೆಗುನ್ನವಾಡು ಯಾವ್ದು ವಾಡೆ ಮೊದ್ಲು ಡಾನ್ ಪೈನಾ ರಾಯಿನಿ ಎಯ್ಯಿನಿ ಅನಿ ಸೊಪ್ಪಿ 8.ತಿರ್ಗಿ ವಂಕಾನ್ನಿ ನ್ಯಾಲ್ ಪೈನಾ ರಾಸ್ತಾ ಉಂಟಾಡು. ^{9 10 11} 9.ಆ ಮಾಟ್ನೀ ಇನಿ ವಾಳೆಪಾಪಿಲನಿ ಮನುಸ್ಲಾ ತಿಳ್ಚಗಾನಿ ಹಿರಿಲು ಮೊದಲ್ಗಾನ್ನಿ ಸಿನ್ನೋಳುವರ್ಗು ಒಕ್ಕಳಯನ್ಕೋಗ್ಗಳು ಆತರ್ಗಿ ಪೈನಾರು;ಯೇಸು ಒಕ್ಕಡೆ ಉಳುಸ್ನಾಡು,ಮಲಿ ಮದ್ಯಾ ನಿಲ್ಚುoಡ ಆಡದಿ ಆನೆ ಉಂಟಾದಿ. 10.ಯೇಸು ನೆಟ್ಗಾ ಕುಚ್ಗಾನಿ ಆ ಸ್ತ್ರೀನೆ ಹೊರ್ತು ಯವ್ವಳ್ನು ಸೂಡೆಗುoಡ ದಾನ್ಗಿ-ಅಮ್ಮಾ,ನೀ ಪೈನಾ ತಪ್ಪುಮೋಪೆವಾಳು ಯಾನುoಡಾರು? ನೀಕಿ ಯವ್ಳು ಶಿಕ್ಷೆನ್ನಿ ವಿಧಿಚ್ಲೆದೋ ?ಅನ್ನಾಡು. 11.ಯವ್ವಳು ವಿಧಿಚ್ಲೇ,ಸ್ವಾಮೀ,ಅಂಟಾದಿ.ಯೇಸು ದಾನ್ಗಿ-ನೀನು ನೀಕಿ ಶಿಕ್ಷೆ ವಿಧಿಚ್ಲೇದು;ಪೋ,ಇಂಕಪೈನಾ ಪಾಪಂಸೇಯ್ಯಾದು ಅನಿ ಸೋಪ್ನಾಡು.] ^{12 13} 12.ಯೇಸು ತಿರ್ಗಿ ವಾಳ ಸಂಗಡಂ ಮಾಟಾಡಿಲಾರಂಬಿಚ್ನಾಡು-ನೀನೇ ಲೋಕಾನ್ಗಿ ಎಲ್ಗು;ನನ್ನಿ ಅನುಸರಿಚ್ಚೆವಾಡು ಸೀಗ್ಟಿಲಾ ನಡ್ಗುoಡ ಜೀಮಿಚ್ಚೆ ಎಲ್ಗುನ್ನಿ ಹೊಂದುoಡವಾಡೈನಾಡು ಅನಿ ಸೋಪ್ನಾಡು. 13.ದೀನ್ನಿ ಇನಿ ಫರಿಸಾಯಲು ಆತುಡ್ಗಿ-ನೀ ವಿಷಯಂಗ ನುವ್ವೇ ಸಾಕ್ಷಿಸೋಪ್ಗಾನ್ನಾವು;ನೀ ಸಾಕ್ಷಿ ನಿಜoಮಾಯೇಲೇದು ಅನಿ ಸೋಪ್ಪಾಲು ಯೇಸು ವಾಳ್ಗಿ- ^{14 15 16} 14.ನೀನು ಯಾನ್ನಿಂಕ ವಚ್ನಾವಾಡೈಯ್ಯುಯಿ ಯಾನ್ಗಿ ಪಾಯೇವಾಡೈಯ್ಯುವಿಯು ಉಂಡಾನಾನಿಯು ನಾಕಿಗೊತ್ತುoಡದಾನ್ನೀಂಕ ನಾ ವಿಷಯಂಗ ನೀನೆ ಸಾಕ್ಷಿಸೋಪ್ಗನ್ನಾನು ನಾ ಸಾಕ್ಷಿ ನಿಜoಮೈoಟಾದಿ.ಮೀಲೈನಾನು ನೀನು ಯಾನ್ನಿಂಕ ವಚ್ನಾವಾಡು,ಯಾನ್ಗಿ ಪಾಯೇವಾಡು ಆನ್ನೆದಾನ್ನಿ ತಿಳಿಗುನ್ನವಾಳು. 15.ಮೀಳು ಆತರ್ ತೋರಿಕೆಯ ಪ್ರಕಾರಂ ತೀರ್ಪುಸೇಸೆವಾಳು;ನೀನು ಯವ್ವಡ್ಗಿ ತೀರ್ಪುಸೇಸೆಲೇದು. 16.ತೀರ್ಪುಸೇಸ್ನಾನು ನಾ ತೀರ್ಪು ಸರಿಆಯಿoದ್ದೆ;ಯಂದ್ಗoಟ್ಟೆ ನೀನು ಓoಟಿಗುಡುಕಾದು;ನೀನು ನನ್ನಿ ಅಂಪಿಚ್ಚಿಚ್ನಾ ತಂಡ್ರಿಯು ಇದ್ರೂ ಉಂಡಾಮು. ^{17 18} 17.ಇದ್ರಾ ಸಾಕ್ಷಿ ನಿಜoಮೈತಾದನಿ ಮೀ ಧರ್ಮಾಶಾಸ್ತ್ರಂಲಾನೇ ರಾಸುಂದಿ. 18.ನನ್ನಿ ಕುರ್ಚಿ ನೀನು ಸಾಕ್ಷಿ ಸೊಪ್ಪೇವಾಡೈಯ್ಯಿನ್ನಾನು,ಅದಿಕಾಗುನ್ನ ನನ್ನಿ ಅಂಪಿಚ್ಚಿಚ್ನಾ ತಂಡ್ರಿಯು ನಾ ವಿಷಯoಮೈಯ್ಯಿ ಸಾಕ್ಷಿಸೋಪ್ತಾಡು ಅನ್ನಾಡು. ^{19 20} 19.ವಾಳು-ನೀ ತಂಡ್ರಿ ಯಾನುoಡಾಡು?ಅನಿ ಅಡ್ಗಾಲು ಯೇಸು-ಮೀಳು ನನ್ನಿ ತಿಳಿಲೇದು,ನಾ ತಂಡ್ರಿನ್ನಿ ತಿಳುಸ್ನಾಲು ಅನ್ನಾಡು. 20.ಯೇಸು ದೇವಾಲಯo ಲೋಕಿ ಕಾಣಿಕೆಯ ಪೆಟ್ಟಿಗೆಲು ಉಂಡೆ ಅಂಗಳoಲಾ ಉಪದೇಶಂ ಸೇಸ್ತಾವುನ್ನಪ್ದು ಈ ಮಾಟಾಲ್ನಿ ಸೋಪ್ನಾಡು.ಆತುಡ ಕಾಲಂ ಇಂಕ ರಾಗುಂಡ ಉಂಡ್ನಾ ಕಾರಣಂ ಯವ್ಳು ಆತುಡ್ನಿ ;ಪೊಟ್ಲೇದು. ^{21 22} 21.ಯೇಸು ತಿರ್ಗಿ ವಾಳ್ಗಿ-ನೀನು ಪಾತಾನು;ಮಿಳು ನನ್ನಿ ಹುಡುಕ್ತಾರು;ಮಲಿ ಮೀ ಪಾಪಂಲಾನೇ ಸಸ್ತಾರು.ನೀನು ಪಾಯೇಆನ್ಗಿ ಮೀಳು ವಚ್ಚಲಾಯೇಲೆದು ಅನ್ನಾಡು. 22.ಆ ಮಾಟ್ನಾ ಯೆಹೂದ್ಯಾಲು-ನೀನು ಪಾಯೇಆನ್ಗಿ ಮೀಳು ವಚೆಲೇದನ್ನಿ ಸೋಪ್ತಾಡುಕದಾ?ಊಡು ತನನ್ನಿ ತಾನೇ ಸಂಪ್ಪಿಲನ್ಕಾನ್ನಾಡೋ ಅನಿ ಮಾಟಾಡ್ಗಾನ್ನಾರು. ^{23 24} 23.ಆತುಡು ವಾಳ್ಗಿ-ಮೀಳು ಕಿಂದೊಳು,ನೀನು ಪೈನೋಡು;ಮೀಳು ಈ ಲೋಕಂಮೋಳು,ನೀನು ಈ ಲೋಕಂಮೋಡುಕಾದು. 24.ದಾನ್ನಿಂಕ ಮೀಳು ಮೀ ಪಾಪಂಲಾನೇ ಸಸ್ತಾಳನೀ ಮೀಕಿ ಸೋಪ್ನಾನು;ನನ್ನಿ ಆತುಡನೀ ಮೀಳು ನಂಬೆಗoಡ ಪಾತೆ ಮೀ ಪಾಪಂಲಾನೇ ಸಸ್ತಾಳನಿ ಸೋಪ್ನಾಡು. ^{25 26 27} 25.ಅಪ್ಡು ವಾಳು-ನುವ್ವ ಯವ್ಳು?ಅನ್ನಪ್ದು ಯೇಸು-ನೀನು ಮೀಕಿ ಸೊಪ್ಪಿನಟ್ಟದೇ. 26.ಮೀ ವಿಷಯಂಗ ಮಾಟಾಡೆದಾನ್ಗು ಮೀ ಪೈನಾ ತೀರ್ಪು ಸೇಸೆದಾನ್ಗೀ ಅನೇಕ ಸಂಗತಿಲು ನಾಕುoಟು;ಆಯ್ತೆ ನನ್ನಿ ಅಂಪಿಚ್ಚಿ ಚ್ನಾತುಡು ಸತ್ಯವoತುಡು;ಆತುಡ್ನಿoಕ ನೀನು ಅಡ್ಗಿನ್ನವುಟ್ಲಾನೇ ಲೋಕಾನ್ಗಿ ಸೋಪ್ತಾನು ಅನ್ನಾಡು. 27.ಆತುಡು ತಂಡ್ರಿನ್ನಿ ಸೂಚಿಚ್ಚಿ ದೀನ್ನಿ ಸೋಪ್ನಾನಾನಿ ವಾಳ್ಗಿ ಗೊತ್ತಯೇಟ್ಲೆದು. ^{28 29 30} 28.ಇಟ್ಟುoಡಗ ಯೇಸು-ಮಿಳು ಮನುಷ್ಯಕುಮಾರುಡ್ನಿ ಎತ್ರಂಗಪೆಟ್ನಪ್ದು ಊಡೆ ಆತುಡನೀ ತನ್ನಂತ್ಕಿ ತಾನೇ ಎಮು ಸೇಯ್ಯೇಗುoಡ ತಂಡ್ರಿಯು ತಾನ್ಗೀ ಬೋಧಿಚ್ನಾ ಅಟ್ಟೆ ದಾನಂತ ಮಾಟಾಡ್ನಾಡನೀ ನಾ ವಿಷ್ಯಂಗ ಮೀಕಿ ತಿಳುಸ್ತಾದಿ. 29.ನನ್ನೀ ಅಂಪಿಚ್ಚಿಚ್ನಾತುಡ ನಾ ಸಂಗಡಂ ಉಂಡಾಡು,ನೀನು ಆತುಡ್ಗಿ ಮೆಚ್ಚಿಕೆಆಯೆದಾನ್ನಿ ಯಪ್ಪುಡು ಸೇಸೆದಾನ್ನಿಂಕ ಆತುಡು ನನ್ನಿ ಒoಟಿಗಡೈಯ್ಯಿ ಉಡ್ಸೆಲೇದು ಅನ್ನಾಡು. 30.ಆತುಡು ಈ ಮಾಟಲ್ನಾಡಪ್ದು ಅನೇಕುಲು ಆತುಡ್ಲಾ ನಂಬಿಕೆಪೆಟ್ನಾರು. ^{31 32 33} 31.ಅಪ್ಡು ಯೇಸು ತನ್ನನ್ನಿ ನoಬ್ನಾ ಯೆಹೂದ್ಯಾಲ್ಗಿ-ಮೀಳು ನಾ ವಾಕ್ಯಂಲಾ ನೆಲೆಗೊoಡವಾಳೈತೆ ನಿಜಂಗ ನಾ ಶಿಷ್ಯಾಲಾಯಿ ಸತ್ಯಾಮ್ನಿ ತಿಳುಚ್ಗಾoಟಾರು; 32.ಮಲಿ ಸತ್ಯಾಮು ಮಿಮ್ಮಲ್ನಿ ಬಿಡುಗಡೆ ಸೇಸ್ತಾದಿ ಅನೀ ಸೋಪ್ನಾಡು. 33.ಅಂದ್ಗುವಾಳು-ಮಾಮು ಅಬ್ರಹಾಮುಡ ಸಂತಾನ್ಮೋಳು;ಮಾಮು ಯವ್ವಳ್ಗು ಯಪ್ದು ದಾಸಲುಕಾದು;ಮಿಕಿ ಬಿಡುಗಡೆಆಯ್ತಾದನಿನುವ್ವ ಸೋಪ್ಪೇದಿ ಯಟ್ಟ?ಅನ್ನಾರು. ^{34 35 36} 34.ದಾನ್ಗೆ ಯೇಸು-ಮೀಕಿ ನಿಜನಿಜಂಗ ಸೋಪ್ತಾನು,ಪಾಪಂ ಸೇಸವಾಳoದ್ರೂಪಾಪಾನ್ಗಿ ದಾಸಲುಆಯ್ನಾರು. 35.ದಾಸುಡುಇಂಟ್ಲಾ ಶಾಶ್ವತoಗ ಉಂಡೆಲೇದು; 36.ಕೊಡ್ಕು ಶಾಶ್ವoಗ ಉಂಡವಾಡು;ದಾನ್ನಿಂಕ ಕೊಡ್ಕು ಮಿಮ್ಮಲ್ನಿ ಬಿಡುಗಡೆ ಸೇಸ್ತೆ ನಿಜಂಗ ಮಿಕಿ ಬಿಡುಗಡೆ ಆಯ್ತಾದಿ. ^{37 38} 37.ಮೀಳು ಅಬ್ರಹಾಮುಡ ಸಂತಾನ್ಮೊಳು ನಿಜಂ;ಆಯ್ನೂ ನಾ ವಾಕ್ಯಾಮು ಮೀಲಾ ಸಾಗುoಡ ಉಂಡೆ ಕಾರಣಂ ನನ್ನಿ ಸಂಪೆದಾನ್ಗಿ ಸೂಸ್ತಾರು. 38.ನೀನು ತಂಡ್ರಿಯ ದೇಗ್ಗರ್ಲಾ ಸೂಸಿನ್ದಾನ್ನಿ ಸೋಪ್ತಾನು;ಮೀಳು ತಂಡ್ರಿನ್ನಿಂಕ ಅಡ್ಗಿoದಾನ್ನಿ ಸೇಯ್ಯoಡಿ ಅನ್ನಾಡು. ^{39 40 41} 39.ಅಂದ್ಗು ವಾಳು-ಮಾ ತಂಡ್ರಿಯು ಅಬ್ರಹಾಮುಡೆ ಅನ್ನಪ್ದು ಯೇಸು ವಾಳ್ಗಿ-ಮೀಳು ಅಬ್ರಹಾಂಡ ಬಿಡ್ಲುಆಯಿoಟೆ ಅಬ್ರಹಾಮುಡು ಸೇಸ್ನಾಟ್ಟ ಕ್ರುತ್ಯಾಲ್ನಿ ಸೇಸ್ತಾರು ಅನ್ನಾರು. 40.ಮೀಳು ಅಟ್ಟೆ ಸೇಯ್ಯೇಗುoಡ ದೇವುಡ್ನೀoಕ ಇನಿನ ಸತ್ಯಾಮ್ನಿ ಮೀಕಿ ಸೊಪ್ಪೇವಾಡೈನ ನನ್ನಿ ಸಂಪೆದಾನ್ಗಿ ಸೂಸ್ತಾರು;ಅಬ್ರಹಾಮುಡು ಇಟ್ಟೆ ಸೇಯ್ಳೆದು.ಮೀಳು ಮೀ ತಂಡ್ರಿಯಕೃತ್ಯಾಲ್ನಿ ಸೇಸ್ತಾರು ಅನ್ನಾಡು. 41.ಅoದ್ಗುವಾಳು-ಮಾಮು ಹಾದರಂನ್ನಿಂಕ ಪುಟ್ನಾವಾಳುಕಾದು;ಮಾಕಿ ಒಕ್ಕಡೆ ತಂಡ್ರಿ,ಆತುಡು ದೇವುಡೆ ಅನ್ನಾರು. ^{42 43 44} 42.ಯೇಸು ವಾಳ್ಗಿ-ದೇವುಡು ಮೀ ತಂಡ್ರಿಆಯಿoಟೆ ,ನನ್ನಿ ಪ್ರೀತಿಸ್ತಾವುoಟ್ರಿ;ಯಂದ್ಗoಟ್ಟೆ ನೀನು ದೇವುಡ್ನಿಂಕಾನೆ ಎಲ್ಲಿ ಲೋಕಾನ್ಗಿ ವಚ್ನಾವಾಡೈನಾಡು.ನಾಂತಗಿ ನೀನೇ ರಾಲೇದು;ಆತುಡೆ ನನ್ನಿ ಅಮ್ಪಿಚ್ನಾಡು. 43.ಮೀಳು ನಾ ಮಾಟ್ನೀ ಗ್ರಹಿಚ್ಗುoಡ ಉಂಡೆದಾನ್ಗಿ ಕಾರಣಂಮೇಮಿ?ನಾ ಬೋಧನೆಗಿ ಸೇವ್ವು ಇಯ್ಯೇಗುಂಡ ಉಂಡೆದೇ ಕಾರಣಂ.ಸೈತಾನುಡುಮೀ ತಂಡ್ರಿ; 44.ಮೀಳು ಆ ತಂಡ್ರಿನ್ನಿಂಕ ಪುಟ್ನಾವಾಳೈಯ್ಯಿ ಮೀ ತಂಡ್ರಿಯು ದುರಿಚ್ಚಲ್ನೆ ನುಡ್ಬಿಚ್ಚಾಲಗ್ನಾನ್ನಾರು.ವಾಡು ಆದಿನ್ನಿಂಕಾನು ಕೊಲೆಗಾರುಡೈಯ್ಯಿ ಸತ್ಯಂಲಾ ನಿಲ್ಲೇದು;ವಾಡ್ಲಾ ಸತ್ಯಮು ಲೇದಕೆಲೇದು.ವಾಡು ಸುಳ್ಳಾಡೆಪ್ದು ಸ್ವಭಾನುಸಾರಂಗ ಆಡ್ತಾಡು;ವಾಡು ಸುಳ್ಳುಗಾರುಡು ಸುಳ್ಗಿ ಮೂಲ ಪುರುಷುಡು ಅಯ್ನಾಡು. ^{45 46 47} 45.ನೀನು ಸತ್ಯಾಮ್ನಿ ಸೊಪ್ಪೇವಾಡೈನoದ್ಗು ಮೀಳು ನನ್ನಿ ನಂಬೆಲೇದು.ನಾಲಾ ಪಾಪಂನ್ನಿ ಸೂಪಿಚ್ಚೆವಾಳು 46.ಮಿಲೋಗ ಯಾವ್ವಾಳುನ್ನಾರು?ನೀನು ಸತ್ಯಾಮ್ನಿ ಸೊಪ್ಪೇವಾಡೈವುoಡಿ ಮೀಳು ನಾ ಮಾಟ್ನೀ ನಂಬೆಗುಂಡ ಉಂಡೆದಿ ಯಂದ್ಗು? 47.ದೇವುಡ್ನಿಂಕ ಪುಟ್ನಾವಾಡು ದೇವುಡ ಮಾಟಲ್ನಿ ಇಂಟಾಡು.ಮೀಳು ದೇವುಡ್ನಿಂಕ ಪುಟ್ನ ಕಾರಣಂ ಅವುಟ್ಲಿನೀ ಇನೆಲೇದು ಅನಿ ಸೋಪ್ನಾಡು. ^{48 49} 48.ಅದ್ಗೆ ಯೆಹೂದ್ಯಾಲು-ನುವ್ವ ಸಮಾರ್ಯಾಡು ದೈಯ್ಮು ಪೊಟ್ನಾವಾಡು ಆಯ್ನಾವು ಅನಿ ಮಾಮು ಸೋಪ್ಪೇದಿ ಸರಿಕಾದೋ ಅನಿ ಸೋಪ್ಪಾಲು 49.ಯೇಸು-ನೀನು ದೈಯ್ಮು ಪೊಟ್ನಾವಾಡುಕಾದು ,ನಾ ತಂಡ್ರಿನ್ನಿ ಸನ್ಮಾನಿಚ್ಚೆವಾಡು ಆಯ್ನಾನು;ಆಯ್ನೂ ಮೀಳು ನನ್ನಿ ಅವಮಾನಂ ಪೋಡ್ಬಿಸ್ತಾರು. ^{50 51} 50.ನಾಕಿ ಮಾನಂರಾವಾಲನಿ ನೀನು ಅಪೇಕ್ಷಿಚ್ಚೆಲೆದು;ನಾಕಿ ಮಾನಂರಾವಾಲನಿ ಅಪೇಕ್ಷಿಚ್ಚವಾಡು ಒಕ್ಕಡುoಡಾಡು;ಆತುಡೆ ನ್ಯಾಯಂತೀರ್ಪೇವಾಡು. 51.ಮೀಕಿ ನಿಜನಿಜಂಗ ಸೋಪ್ತಾನು,ಯವ್ವಡೈನಾನು ನಾ ವಾಕ್ಯಾಮ್ನಿ ಸೈಗನಿ ನಡುಸ್ತೆ ವಾಡು ಯಪ್ಡ್ಗೂ ಸ್ಥಾನಂನ್ನಿ ಕಣೆಲೇದು ಅನ್ನಾಡು. ^{52 53} 52.ಅದ್ಗೆ ಯೆಹೂದ್ಯಾಲು-ನುವ್ವ ದೈಯ್ಮು ಪೊಟ್ನಾವಾಡನೀ ಇಪ್ದು ಮಾಕಿ ತಿಳ್ಸೆ;ಅಬ್ರಹಾಮುಡು ಸಚ್ನಾಡುಪ್ರವಾದಿಲು ಸಚ್ನಾರು;ಆಯ್ತೆನುವ್ವ-ನಾ ವಾಕ್ಯಾಮ್ನಿ ಸೈಗನಿ ಸಡ್ಸೆವಾಡು ಯಪ್ಪಡ್ಗು ಸವ್ನಿ ಅನುಭವಿಚ್ಚೆಲೇದನಿ ಸೋಪ್ತಾವು. 53.ಮಾ ಮೂಲಂ ಪುರುಷುಡೈನಾ ಅಬ್ರಹಾಮುಡ್ಗಿoತ ನುವ್ವ ಪೆದ್ದೊಡೋ?ವಾಡು ಸಚ್ಚಿಪೈನಾಡು,ಪ್ರವಾದಿಲು ಸಚ್ಚಿಪೈನಾರು;ನಿನ್ನಿ ಯಾವುಡುಅನಿ ಸೇಸ್ಗಾoಟಾವು ಅನಿ ಸೋಪ್ಪಾಲು ಯೇಸು ^{54 55 56} 54.ಯೇಸು-ನನ್ನಿ ನೀನೆ ಮಹಿಮೆಪಡ್ಬಿಚ್ಗoಟ್ಟೆ ನಾ ಮಹಿಮೆ ಹುರ್ಲುಲೆಗುನ್ನದಿ;ನನ್ನಿ ಮಹಿಮೆಪಡ್ಬಿಚ್ಚವಾಡು ನಾ ತಂಡ್ರಿಯೇ.ಮೀಳು ಆತುಡ್ನೆ ಮಾ ದೇವುಡು ಅಂಟಾರು;ಆಯ್ನೂ ಮೀಳು ಆತುಡ್ನಿ ತಿಲಿಗುoಡ ಉಂಡಾರು. 55.ನೀನಂತೂ ಆತುಡ್ನಿ ಬಲ್ಲೆನು;ಆತುಡ್ನಿ ಅರಿಲೇದನೀ ಸೋಪ್ತೆ ಮೀ ಅಟ್ಟೆ ಸುಳ್ಳುಗಾರುಡೈತಾಡು;ಆಯ್ತೆ ಆತುಡ್ನಿ ತಿಳುಸ್ನಾನು,ಆತುಡ ವಾಕ್ಯಾಮ್ನಿ ಸೈಗಾನಿ ಸಡುಸ್ತಾನು. 56.ಮೀ ಮೂಲಪುರುಷುಡೈನಾ ಅಬ್ರಹಾಮುಡು ನಾ ದಿನಂನ್ನಿ ತಾನು ಸೂಡಲೇದನೀ ಉಲ್ಲಾಸಂಪೋಡ್ನಾಡು;ದಾನ್ನಿ ಸೂಸಿ ಸಂತೋಷಂ ಪೋಡ್ನಾಡು ಅನ್ನಾಡು. ^{57 58 59} 57.ಅದ್ಗೆ ಯೆಹೂದ್ಯಾಲು-ನೀಕಿ ಇಂಕ ಯಾಭಾಯಿ ವರುಷoಕಾಲೇದು;ಅಬ್ರಹಾಮುಡ್ನೀಸೂಸ್ನಾವಾ? 58.ಅನ್ನಪ್ದು ಯೇಸು-ಮೀಕಿ ನಿಜನಿಜಂಗ ಸೋಪ್ತಾನು,ಅಬ್ರಹಾಮುಡು ಪುಟ್ಟೇದಾನ್ಗಿoತ ಮುಚ್ಚಿನಿಂಕಾನು ನೀನು ಉಂಡಾನು ಅನ್ನಾಡು. 59.ವಾಳು ಈ ಮಾಟ್ನೀ ಇನಿ ಆತುಡ್ನಿ ಸಂಪೆದಾನ್ಗಿಆಯಿ ರಾಯಿತಿಸ್ಗಾನ್ನಾಲು ಯೇಸು ಅಡಿಕ್ಕಾನಿ ದೇವಾಲಯಂಲೊಗನ್ನಿಂಕ ಎಲ್ಲಿ ಪೈನಾಡು.