¹ Emondeleagani na bhosembo bho ngbanu bya bhato, bho makabha ete mamenane, maazundele bhole pekedhe te lefuta bya Abanu mo aale a engali. ² N'edheli ndo opa lekandi lengo, kaa kobome mangbau te a embole engo, gee bhawowolo baza a ngbale Nzambe pe a pesi nakwate bazui lekumu la bhato. Namopaga le na soolo, bhazuatonde lefuta lengabhu. ³ Kasi n'edheli opa lekandi, ebhoo tengo ta emeso kakayibi te ye ebho ta ebhalo aale aza, ⁴ nakwate lekandi lengoo asoo na ekpengbe; pe Abaa, mamena bhakwa ya enkpengbe yaazu, osisiatonde ⁵ N'edheli masambelea, kaamade ge bhawowolo, bho bha bhaa sambelee bhayama koogo a ngbale-Nzambe pe a suka pesi, nakwa bhomene na bhato. Naale na mopaga soolo, bhazua to lefuta lengabhu. ⁶ Kasi n'edheli osambelea, yingia n'angoo a ngbale, dhya empomu ongoo, pe konga bya Abaa mo aale wo a bhasoe ya enkpengbe, osisiato. ⁷ Pa osambelea, kaa kodhele enzombi wobua wa pamba-pamba, gee bhapagano, bho bhalaa ete na makasi ma enzombi obua nde bhowoleando. ⁸ Kaa mamanane nabhu te: nakwate Abanu ayibato tomate te makonga, ambola ete mankongelee. ⁹ Mondani ndo ndenge esisina akonga ete masambeleagage: Abasu we mo a angali! Lina lengo bhakumisi; ¹⁰ legoto lengo adu; Ye obhaa bhaze ase ge bhaza na koogo ¹¹ Epa bhiso elo eyeli tengbasu ta biti na biti; ¹² sabola bhone bhongbasu, gee bhiso tosabola likola bhato bhe zi bhiso bhakwa bhene; ¹³ kaa ketee bhiso na mazoloni kasi etu bhisu a mabhoo ma en wowolo. Nakwate atiga nawe legoto, nguyi pe lekumu. Pago! ¹⁴ O mosaboli bhato bhone bhongabhu, Abanu mokoogo amosabola bhino lokola; ¹⁵ kasi o mosaboli bhato te, Abanu gokamosabole goto te bhone bhongbanu. ¹⁶ N'edheli makomo eyeli, kaa maepii na miso ma bhodogi te, ge bhawowolo, bho paasa ndo ngbata yaazu bhe ndokpo-ndokpo nakwate bhowanisi bhato ete bhu bhakomi eyeli. Napomagale soolo, bhazuatondele lefuta lengabhu. ¹⁷ Kasi n'edheli okomo eyeli, ekpia malasi n'angoo emoo pe sosa ngbata engoo, ¹⁸ nakwa koowanisii na bhato ete okomi eyeli, kasi n'Abaa mo alee wo a enkpengbe; ale amena bhakwa ya enkpengbe, osisiliatonde. ¹⁹ Kaa m'etaleage mosolo a dhodho te, asoe bhabholo na agbagi bhatenaga, pe asoe bhakukuba bhadoo bhabhuna pe bhakumba; ²⁰ kasi taleagani mosolo na koogo, asoe bhabholo na agbagi bhaatenage bhole pekedhe te, pe na soe bhakukubha bhaabhuni pe bhaakumbi te. ²¹ Nakwate soe mosolo mongoo ali aso, wo lokola nde enmeleme ongoo ali. ²² Liso nde tala ya nzoe. O liso lengoo ale pedhe, nzoe engoo yaazu emenelea; ²³ kasi o liso lengoo kaale bhedhe te, nzoe engoo yaazu ade a en'dhidhi. Nde o muinda maale ankpoto ongoo adele en'dhidhi, ndenge esisina en'dhidhi ongoo adele osi! ²⁴ Motobhole pomoti kozelele bhamogoto bhebhale te. Nakwate, to ankomonde omoti, pe anbhande omoti; to epa na omoti, pe anbosaga maada. Maakuki zelelee Kuunzi pe Mamoni te. ²⁵ Kwayia nde namopaga: kale malaa mingi bhomoyi bhongbanu na tomate temaya, to nakwa , ete matubhandele etee. Kana bhomoyi asoito eyeli, pe nzoe aso koleka bhangombe? ²⁶ Omondani bhambuubha na koogo: go bhu bha kone to bhagbole te, pe bhu bhaale na paape ye bhabisa eyeli aso; pe Abanu mo koogo ale oyisa. bhino mosoi bhu na entiyo? ²⁷ Kane mongbanu, na lekabu lengee, akukato abisilii entango okedhe angee bhomoyi? ²⁸ Pe kwasina lekabhu la bhangombe? Mondani dukpa ge apinga a gboge, yi kagubi to kasone ngombe enge te; ²⁹ kasi napaga ete ata Salomo yi mamoti, n'edheli ya lekumu lenge katubhanagi ge yi te. ³⁰ O Kuunzi atubhisa lembasa la gboge , le aale elo pe yio bhatena bhadheta na boogu, yi kamotubhisi nde bhino penza bho mosoi lembasa, bhato bha ndundu? ³¹ Kaa mali na lekabhu ata bhole pekedhe te, pe ka mapage te: Nde taya etee? nde tanoo etee? Nde tatubha etee? ³² Nakwate bhatomate to taazu, aale bhapaganu nde makabha. Abanu mo koogo ayibito ekonga tengbanu. ³³ Kabhani ambola legoto pe bhosembo bha Kuunzi: pe bhasoe bayo bhayaazu bhamopa agunalia. ³⁴ Kaa mali ndo na lekabhu layio; nakwate yio ebubulia payi mamoti. Biti emoti na emoti angemeneagi na ensale onge.