¹ Yezu pa bhanbhoti a Beteleme a Yudea, n'edheli ya Kumu Elode, mondani bha nganga mayele bha Bya esa bhadendo a Yeluzaleme, ² pe bhapaga; Wane nde Kumu ma bha yuda bhanbhotile? Nakwate tan'meni enyonge monge na Bya esa, pe ndetadu ete tangbumiagi. ³ Kumu Elode, pa awoo kwayia, apaasa enmeleme ade one, na Yeluzaleme waazu nayi ⁴ Omaaga bhanganga Nzambe bhekpekpe bhaazu pe bhandombe bha bhato, pe amosiana bii engabhu wane sina akonga ete bhanbhoote Klisto. ⁵ Bhansisia: A Beteleme bya Yudea; nakwate mondani ye bhakologinde na plofeta: ⁶ Pe we Beteleme, dhoote ta Yuda, We kaale soolo te engii okedhete kati-kati ya bhagbata ya Yuda, nakwate bii engo nde apupandele Ma awanisia peesi na Izalayele, bhato bhongame. ⁷ Antindeyia Elode omaa n'ankpengbe bhanganga mayele, amosiana na kwa enza bii engabhu bhanda entango sina enyonge apeyinde. ⁸ Oteyando na Beteleme , pa apaga: geani, pe kabhani sangi semba ya mimokedhe; n'edheli mayibando, kabhagani maleyibisi, nakwate me nage nangbumiagi lokola. ⁹ Antinde bhanwoyi Kumu, bhageando. Pe mondani, enyonge monde bhu bhan'meninde a Byaesa ade atanga ambole engabhu tii pa gee ade koogo aswe ye mi alinde, pe ayama. ¹⁰ N'edheli bhanmeni enyonge, bhedhengelegi angabhu amelema makasi. ¹¹ Bhayingiando na angbale, bhan'mena mi mokedhe na Malia, amee, bhankumisa pe bhangbumiaga; bhawuando makete mongabhu, pe bhampaando legabo la wolo, mpaka pe malasi. ¹² Antindeyia, bhotangusiaga na molimo a nzayi ete kaa bhasii bya Elode, bhasiando na ngabhu angi na peesi ada. ¹³ N'edheli bhagindo, mondani, modokoogo ma Kumu ampupia Yozefu a nzayi, pe apaga: yama, onva mimokedhe na amee, teani na Ezipeti, pe epia na bii noo tii biti nopaga; nakwate Elode akanbhatonde mimokedhe ete anmoo. ¹⁴ Yozefu ayama, anva na biti mimokedhe na amee, pe bhesesia na Ezipeti. ¹⁵ Epiindo na binoo tii a kuwa ta Elode, nakwate angemeneage kwa nde plofeta atangusiagi: nanmayi mimongame na ansenge a Ezipeti. ¹⁶ Antinda Elode, amena ete banganga mayele banzologito, ava enkanda okpekpe na ngee anmelelema, pe oteya bhomo bhami bhaazu bha gala ebhale pe tii na ase yia bho bhalii a Beteleme pe a mongiime maazu ebina nayi, gee biti yende yi adhelagi nde na bhanganga mayele. ¹⁷ Kwayia angemeneagando yende bhatangusiagi n Yelemia, mo plofeta: ¹⁸ Bhawoyi bhalui a Lama, engaamo pe kpongo osii: Lasele ale ogama bhamanabhe, Pe kabhayii ete bhangamisi. Nakwate bhaale goto te. ¹⁹ N'edheli Elode akwi, mondani, modokoogo ma Kumu ampupia Yozefu, a nzayi a Ezipeti, ²⁰ pe apaga: Yama, onva mimokedhe pe amee, pe gea na mokili ma Izalayele, nakwa ete bhato bho bhali bhankabha mimokedhe na kuwa bhakwile. ²¹ Yozefu ayama, anva mimokedhe pe amee, pe agea na mokili ma Izalayele. ²² Kasi, pa awoyi ete Alakelawusu avi legoto a Yudea a soe ya Elode, abee, ade na bhoo ya sie noo; pe, gee Kuunzi anwanisii a nzayi, esomisa na mokili ma Galilea, ²³ pe adoo epiya a gbata emoti bhamayi ete Nazalete, nakwate angemeneage kwa nde bhatangusiagi na bha plofeta; bhanmaande ete Mo Nazalete.