¹ Mus setn, oku'u ngurujuh umpot maleket mujog nun umpot punjuru bumi, tungkoh untadn kuumpot guyo'ng bumi agoe nya' do boobus nun doyuh, nun ra'ut, atoupun nun beta'ng-beta'ng koyuh. ² Lalu, oku'u ngurujuh maleket bukutn monug musu antuk'ng botuh on'u mayan, ngen tobotn sigel musu Tompo'u do mudip. Yuh mogotn nengi yu do jodn neko' kuumpot maleket do moeh do jugotn kuasa unto' purasoh bumi ngen ra'ut judn nyeh, ³ "Sohlah purasoh bumi, ra'ut, atou beta'ng-beta'ng koyuh subayuh omi'u yen jugotn tanu'u sigel nun deih lutn-lutn Tompo'u to'u." ⁴ Oku'u kurungoh dietn do sunigel turuto'ng seratus umpot puru'u umpot ribu ra'ng. Dietn sumua burasoel musu sutiyop suku ena'-ena' Israel, masik'ng-masik'ng turuto'ng sumung duwuh ribu, musu ⁵ suku Yehuda, suku Ruben, suku Gad, ⁶ suku Asyer, suku Naftali, suku Manasye, ⁷ suku Simeon, suku Lewi, suku Isakhar, ⁸ suku Zebulon, suku Yusuf, ngen suku Benyamin do mus do materai. ⁹ Mus setn oku'u ngurujuh, sumunu'u'ou sujumelah baas musia do de' turuto'ng muwo'u'ou, musu sumua negara, suku banca, ngen sono'u, mujog nun adop takhta ngen nun adop Ena' Domba, nengi bojuh surangkus budo'u ngen danon-danon doutn wai nun tengen dietn, ¹⁰ ngen dietn mogotn nengi yu do jodn, "Kusulamoet unto' Tompo'u omi'u do nguru'u nun tunuh takhta, ngen unto' Ena' Domba." ¹¹ Ngen, sumua maleket do deg mujog nun sukulilik'ng takhat setn ngen nun sukulilik'ng tuuh-tuuh, ngen kuumpot koyuh setn, dietn bulutut nun jowi takhta setn ngen sunomoh Tompo'u, ¹² ngen nyono'u, "Amin!" Puji ngen kemuliaan ngen kupantoes ngen ucop sukur ngen hormot ngen kuasa, ngen kugogoh unto' Tompo'u to'u sampei pagi'ou. Amin!" ¹³ Lalu, ni'i musu tuuh-tuuh setn nyono'u ngen buposik ngen ku'u, "Esihkah dietn do nengi bojuh surangkus budo'u ti'i ngen musu opih dietn monug?" ¹⁴ Mengka'ou, oku'u nyono'u ngen'ou, "Tuwotn ku'u, kopm pu'otn'ou." Lalu, yuh nyono'u agi'e ngen ku'u, "Dietn oduhlah nya-nya do moeh ruwoh musu punyaya baas ngen moeh kupu'u bojuh surangkus dietn ngen bodo'u budo'u nun wa'ng doyo'u Ena' Domba. ¹⁵ Kerena setn, dietn mujog nun adop takhta Tompo'u ngen ngulayan Yuh nyowo'u ngen ngaru'u nun romin-Ou, ngen Yuh do nguru'u nun tunuh takhta setn akon ngunu'u nun oncoh dietn. ¹⁶ Dietn de' akon suburuk atou aus agi'e, atoupun botuh on'u de' akon ngkonopm dietn ataupun poros terik do bukutn. ¹⁷ Sobob, Ena' Domba do nun todo'u-todo'u takhta setn akon jaji Pumumpitn dietn ngen akon nuntutn dietn ko' ruba'ng subu pumudip, ngen Tompo'u akon nuntos sugala pi'itn botuh musu botuh dietn."