¹ Mus setn, oku'u ngurujuh nun tengen untouh Yuh do nguru'u nun tunuh takhta setn subuwoh gulok'ng kitob, do oduh tulisan nun wa'ng ngen sopa'ou, do sunigel nengi ju'u sigel. ² Ngen, oku'u ngurujuh ni'i maleket do gagah mogotn ngen yu jodn, "Esihkah do laya' duka'u gulok'ng kitob setn ngen duka'u sigel-sigel'ou?" ³ Pa', nya' seura'ng pun, enihkah nun suruga, nun bumi, maupun do nun dubo'u bumi do dopud duka'u atou ngurujuh sih wa'ng gulok'ng setn. ⁴ Mengka'ou, oku'u miradn sietn cuncodu'u kerena nya' seura'ng pun do laya' unto' duka'u gulok'ng kitob setn atou ngurujuh sih wa'ng'ou. ⁵ Pa', ni'i musu tuuh-tuuh setn nyono'u ngen ku'u, "Konnulah sietn! Ngurujuh, Singa musu suku Yehuda, kuturutn Daud, moeh menang sampei Yuh dopud dika'u gulok'ng kitob setn ngen ju'u sigel'ou." ⁶ Ngen, oku'u ngurujuh nun todo'u-todo'u takhta ngen umpot koyuh judn nyeh, ngen nun todo'u-todo'u suna tuuh-tuuh setn ni'i buruk'ng Ena' Domba mujog, mun moeh do sumuleh, do oduh ju'u tanuk ngen ju'u botuh, yuhmah ju'u Roh Tompo'u do utus ko' sururuh bumi. ⁷ Ena' Domba setn monug ngen nomi' gulok'ng kitob setn musu tengen untouh Yuh do nguru'u nun tunuh takhta. ⁸ Ngen, watu Ena' Domba moeh nomi' gulok'ng kitob setn, kuumpot koyuh ngen kuduwuh puru'u umpot tuuh-tuuh bulutut nun jowi Ena' Domba setn, masik'ng-masik'ng toguh subuwoh kecapi ngen subuwoh sawotn emos do tumos bodo'u kumenyen, do oduhlah du'o nya-nya cuci. ⁹ Lalu, dietn bunyanyi nyanyi ba'uh, kuwon'ou: "Kopm laya' nomi' gulok'ng kitob setn ngen duka'u sigel-sigel'ou kerena Kopm moeh do sumuleh, ngen doyo'u-Kopm, Kopm moeh nobus nya-nya musu sutiyop suku, sono'u, kaupm, ngen banca unto' Tompo'u. ¹⁰ ngen Kopm moeh bodo'u dietn jaji ni'i kerajaan ngen imom-imom unto' Tompo'u to'u, ngen dietn akon muruntoh nun tunuh bumi. ¹¹ Mus setn, oku'u ngurujuh, ngen oku'u kurungoh yu musu muwo'u maleket do ngulilik'ng takhta, umpot koyuh, ngen suna tuuh-tuuh setn. Ngen jumelah diet buribu-ribu, bakan puru'u ribu, ¹² mogotn ngen yu do jodn, "Laya'lah Ena' Domba, do moeh do sumuleh setn, nurumo'u kuasa, ngen kukaya, ngen kubijak, ngen kukuwot, ngen hormot, ngen kemuliaan, ngen pujian." ¹³ Mus setn, oku'u kurungoh sutiyop koyuh do oduh nun suruga, ngen nun bumi, ngen nun dubo'u bumi, ngen nun ra'ut, ngen sumua do oduh nun wa'ng, sumua setn nyono'u, "Unto' Yuh, do nguru'u nun tunuh takhta, ngen unto' Ena' Domba, sumua pujian, hormot, kemuliaan, ngen kuasa sampei pagi'ou!" ¹⁴ Ngen, umpot koyuh setn nyono'u, "Amin!" ngen suna tuuh-tuuh bulutut ngen sunomoh'ou.