¹ Mus setn, maleket setntuju'u ngen oku'u sungi pi'itn pumudip, do bening mun kristal, ngaler musu takhta Tompo'u ngen Ena' Domba ² nun todo'u-todo'u jorotn kuta setn. Nun kuduwuh bingih sungi, mudip beta'ng koyuh pumudip do ngasel sumung duwuh macopm buwo'u ngen ngasel buwo'u'ou sutiyop burotn. Boutn-doutn beta'ng koyuh setn do nengi unto' ngurietn banca-banca. ³ Nya' agi'e kutuk, pa takhta Tompo'u ngen Ena' Domba akon oduh nun wa'ng kuta setn. Jungos-jungos-Ou akon sunomoh Yuh. ⁴ Dietn akon ngurujuh jowi-Ou ngen gonon-Ou akon do tulis nun de'ih dietn. ⁵ Ngaru'u de' akon oduh agi'e sampei dietn de' moolu buko'u lampu atou botuh on'u kerena Tompo'u akon tunora'ng dietn, ngen dietn akon muruntoh kutuwoi-tuwoi'ou. ⁶ Maleket setn nyono'u ngen oku'u, "Sumua sono'u ti'i dopud do pucayo'u ngen munu'u.Tompo'u musu sumengi suna nabi, bodo'u maleket-Ou unto' tuju'u ngen jungos-jungos-Ou enih do arus jagu'u tujadi. ⁷ Kurungohlah, Oku'u jagu'u monug! Do burokotlah nya do tuno' sono'u-sono'u ramoel kitob ti'i." ⁸ Oku'u Yohanes, do moeh kurungoh ngen ngurujuh sumua setn. Watu oku'u kurungoh ngen ngurujuh sumua'ou, oku'u bulutut unto' nyomoh nun kojo'u maleket do moeh tuju'u sumua ti'i ngen ku'u. ⁹ Pa', yuh nyono'u ngen oku'u, "Sohlah bubuwot musetn! Oku'u oduhlah lutn samoh mun mu'u ngen purih-purih mu'u, suna nabi, sereta mun dietn do taat ngen sono'u-sono'u nun wa'ng kitob ti'i. Sunomohlah Tompo'u!" ¹⁰ Mus setn, maleket setn nyono'u ngen oku'u, "Sohlah sunegel sono'u-sono'u ramoel nun wa'ng kitob ti'i kerena watu'ou moeh susuk." ¹¹ Biyorlah nya do bubuwot bi'a' totop bubuwot bi'a', nya-nya do de' cuci totop de' cuci, nya do bubuwot munu'u totop bubuwot kumunu'u, ngen nya do cuci totop cunyuci odup'ou." ¹² Kurungohlah, Oku'u jagu'u monug! Ngen, Oku'u tobotn poh-Ku'u, unto' bunaros sutiyop nya susuai pubuwot'ou. ¹³ Oku'u oduhlah Alfa ngen Omega, Do Putama ngen Do Turaker, Do Jagu'u ngen Do Sunih. ¹⁴ Do murokotlah dietn do kupu'u bojuh surangkus etn! Sampei dietn umpu'u beta'ng koyuh pumudip setn ngen murud neko' kuta setn nyeseg untubatn-untubatn gerebang'ou. ¹⁵ Do nun sopa'u kuta setn oduhlah kosuh-kosuh, nya do noeh sihir, nya-nya ngagei, suna pungobus, suna punyomoh koyuh, ngen nya-nya do anoel ngurako. ¹⁶ Oku'u, Yesus, moeh bodo'u maleket-Ku'u unto' busasi neko' mu'u tenta'ng sumua ti'i unto' umot-umot. Oku'u lah so'u ngen kuturut Daud, Binta'ng Timur do tera'ng." ¹⁷ Roh ngen pungantetn Dayuk'ng setn nyono'u, "Geti'i lah!" Biyorlah nya do kurungoh ti'i nyono'u, "Geti'i lah!" Biyorlah nya do aus monug, biyorlah nya do ro'u nomi' pi'itn pumudip pucuma. ¹⁸ Oku'u busasi neko' sumua nya do kurungoh sono'u ramoel kitob ti'i, "Kalou oduh do namoh koyuh nun sono'u-sono'u ti'i, Tompo'u akon namoh ngen'ou sumua buncana do tutulis nun wa'ng kitob ti'i. ¹⁹ Ngen, kalou oduh do kunura'ng koyuh musu sono'u-sono'u nun wa'ng kitob ramoel ti'i, Tompo'u akon nomi' dodeg 'ou musu beta'ng koyuh pumudip, musu kuta cuci, ngen musu hoel-hoel do tutulis nun wa'ng kitob ti'i" ²⁰ Yuh do busasi tenta'ng hoel-hoel ti'i nyono'u, "Eeu, Oku'u jagu'u monug." Amin! Monuglah, Tompo'u Yesus! ²¹ Punyugotn Tompo'u Yesus sereta mu'u sumua. Amin.