¹ Watu enu petama minggu setn, watu enu gi sanget magi, Beyaukng- bedayukng setn penu kok kubur Yesus samel tebetn rempah-rempah do meh dietn seniyep. ² ngen dietn depud batuh do bas penutu meh begulikng mesu kubur. ³ Aken tapi, saet dietn murud, dietn nyak depud mayet Tompou Yesus. ⁴ Watu dietn hiertn ngen hol setn, empeta emputei eduh duwuh nya do nengi pekekes do senilau beteuh mujoug nun bingih dietn. ⁵ Bedayukng-bedayukng setn sanget teru ngen pubetn jewi dietn, tapi duwuh rakng setn nyonou, "Menih umug ngau nya do mudip nun encoh nya do kebeis? ⁶ Yesus nyak nun eti'i, Yuh meh bangkit. Tiyutn lah tentakng enih do meh nyonou-Yuh kok mu'g nun Galilea. ⁷ Yuh nyonou bawa Ennak Manusis arus desenerah ketengen nya-nya bedusa, deg senalib, ngen aken bangkit pada enu dog ketaruh." ⁸ Meka, Bedayukng-bedayukng setn tiyutn aken sonou Yesus. ⁹ Rimpes dietn embarik mesu kubur Yesus, dietn ngerita semua peristiwa setn kok sumung ni'g rasul sereta para pengikut Yesus do bukutn. ¹⁰ Bedayukng-bedayukng do ngerita hol setn kok para rasul adalah Maria Magdalena, Yohana, Maria sunu'g Yakobus, ngen kuduh rakng dayukng do suwou ngen dietn ge'in. ¹¹ Aken tapi, sonou bedayukng-bedayukng setn nangep oleh para rasul ngerake' ngen dek dietn picayou kok bedayukng- bedayukng setn. ¹² Aken tapi Petrus mujoug ngen bedudos ke kubur Yesus. Yuh mubetn ngen ngerijuh ke wakng kubur, tapi yuh hanya depud kaeng linen ngi benugkus mayet. Meh setn, Petrus merikng ngen sanget hiretn ates enih do meh jaji. ¹³ Watu enu setn gi, 2 urakng pengikut mesu kuta Yerusalem. ¹⁴ Keduwuh rakng setn ngumong tentakng semua peristiwa do tejaji. ¹⁵ Watu dietn gi busonou ngen betukor piker, edup Yesus menug senuseuk sereta penu kojou besamoh dietn. ¹⁶ Aken tapi, beteuh dietn deg ngalakng seinga dietn dek depud kenenel Yuh. ¹⁷ Yesus nyonou kok dietn, " Enih do nonou du'otn samel penu kojou?" Keduwuh rakng setn pun mun'nu ngen jewi dietn nampak gisusoh. ¹⁸ Eduh ni'g rakng mesu enduwuh do begenen Kleopas nyonou kok-Yuh," Enihkah Umu'g ni'g rakng nya do nyaruh nun Yerusalem do nyak puotn tentakng enih do tejaji nun e'ih bauh-bauh ti'i?" ¹⁹ Yesus nyonou "Tantakng enih?" Dietn pun nyonou kok Yuh," Tentakng Yesus mesu Nazaret. Yuh adalah seurakng nabi do numes ngen eduh kuasa wakng sonou sereta sipet bebuwet-Yuh nun jewi Tompou ngen nun jewi semua bangca emi'g. ²⁰ Aken tapi, imem-imem kepala ngen para pemimpitm emi'g senerah Yuh untok deg kupm kebeis, ngen ²¹ Semunu'g 'og emi'g sanget ngarep bawa Yuhlah do aken benebes bangca Israel. Namun, enu ti adalah enu ketaruh sejak semua'og setn tejaji. ²² Aken tapi, kuduh rakng bedayukng mesu emi'g meh kenejut emi'g. Watu dietn wang kekubur penagi, ²³ dietn nyak depud mayet Yesus. Lalu, dietn embarik ngen nyonou bawa dietn mus ngerijuh meleiket-meleiket, do nyonou bawa Yuh mudip. ²⁴ Rimpes setn, kuduh rangk mesu emi'g nukok kubur ngen depud munsetn samoh ngen do sonou oleh Bedayukng-bedayukng setn. Aken tapi, dietn nyak ngerijuh Yesus." ²⁵ Rimpes setn Yesus nyonou kok dietn, " Oi, munug budo nen ti'i ngen ramet toi nen untok picayou ngen semua do meh deg nyonou oleh para nabi. ²⁶ Dek kah Kristus arus deg penderita ti'i ngen merud ke wakng kemuliaan-Yuh." ²⁷ Lalu Yesus jeneles semua'og do tetulis wakng semua kiteb suci tentakng edup-Yuh, mulei kiteb Musa sampei semua kiteb para nabi. ²⁸ Watu dietn meh suseug ngen desa Emaus, Yesus gi mugu penu kojou seulah aken ngelanjut empenu-Yuh. ²⁹ Aken tapi, dietn nahan Yuh ngen nyonou, ngineplah besamoh ngen emi'g sebeb enu meh amper ngerupm ngen beteuh enu amper rintup nu'." meka, Yesus merud untok menteg besamoh dietn. ³⁰ Watu Yuh begabong besamoh dietn nun meja man, Yesus nemik ruti ngen bereket ruti setn. Yuh nutoh-nutoh lalu degei ngen dietn. ³¹ watu setn, beteuh dietn depud ngerijuh ngen kenenel Yesus. Namun, langcokng beragetn mesu pengerijuh dietn. ³² Rimpes setn, nyonoulah dietn ngen sesamoh dietn do wakng e'itn, " Dekkah toi tou'g bagbug watu Yuh nyonou ngen tou'g sewatu toug penu kojou ngen watu Yuh jeneles Kiteb Sucikok Toug?" ³³ Watu setn gi, dietn mujoug ngen embarik kek Yerusalem. Dietn betepud kesumung ni'ig murit ngen nya-nya do besamoh ngen dietn bekumpu besamoh-samoh. ³⁴ Murit-murit setn nyonou kok dietn enduwuh," Tompou munug-munug meh bangkit ngen empayatn edup-Yuh kok Simon!" ³⁵ Keduwuh pengikut setn gi ngerita enih do meh tejaji watu empenu dietn. Dietn ngerita mung enih dietn kenenel Yesus watu Yuh nutoh ruti. ³⁶ Watu keduwuh rakng setn gi mugu ngerita peristiwa setn, Yesus mujoug nun todou dietn ngen nyonou, " Damei besamoh ngen nen." ³⁷ Aken tapi, dietn empekeg ngen agak teru. Dietn ngira bawa dietn gi ngerijuh raba. ³⁸ Rimpes setn, Yesus nyonou kok dietn, " Menih nen empekeg ngen ragu tumpo'okng nun wakng toi nen?. ³⁹ Ngerijuh tengen-Ku'g ngen kojou ku'g. Ti'i munug-munug edup Ku'g. Nintaplah Eku'g ngen ngerijuhlah, raba nyak dagikng ngen turakng mun do umu'g ngerijuh ngen kok-Eku'g." ⁴⁰ Rimpes setn Yesus nyonou ti'i Yuh daatn tengen ngen kojou kok Dietn. ⁴¹ Selagi dietn gi bayuh picayou kerena senang ngen nyaruh, Yesus pesik kok dietn, " edukah nun eti'g kemaketn nen mun Eku'g man'og?" ⁴² Lalu dietn jugotn ni'ig bureukng rebeis do penangakng kok-Yuh. ⁴³ Yesus nemik Rebeis setn ngen man'og nun jewi dietn. ⁴⁴ Rimpes setn, Yesus nyonou kok dietn, Ti'i lah sonou do Eku'g nonou kok nen watu Eku gi besamoh ngen nen. semua enih do tetulis tentakng Eku wakng hukupm Taurat Musa, kiteb para nabi, ngen Mazmur arus degenenep." ⁴⁵ Rimpes setn Yesus dika'g pemiker dietn seinga dietn depud penaham kiteb suci. ⁴⁶ Yesus nyonou agi kok dietn," Eduh tetulis bawa Kristus arus menderita ngen bangkit mesu nya do kebeis pada enu do ketaruh. ⁴⁷ Ngen, Petubatan untok ngenamputn dusa aken dosenonou wakng genen-Yuh kok semua bangca, mulei mesu Yerusalem. ⁴⁸ Nen semua'og adalah sasi-sasi mesu semua ti'i. ⁴⁹ Ti'i tiyutn ngen kerungoh, Eku eken kiripm jaji Samou-Ku'g kok nen. Aken tapi, Nginep ngen nungulah nun kuta Yerusalem sampei nen semua'og deg ngelengkep ngen kuasa mesu tempet do datuh." ⁵⁰ Rimpes setn, Yesus tebetn para pengikut-Yuh ruwoh mesu kuta sampei nun Betania. Nun E'ih, Yuh teket tengen-Yuh ngen getn bereket kok dietn. ⁵¹ Watu Yesus bereket dietn,Yuh bepisah mesu dietn ngen deg deket kek suruga. ⁵² Lalu, dietn senembah-Yuh ngen embarik kek Yerusalem ngen sanget senang ewakng. ⁵³ Dietn selalu eduh nun Bait Tompou ngen penuji Tompou.