¹ Sumua nya do nango'ng tango'ng subagei kuli aruslah ngangop tuwotn'ou subagei nya do laya' dopud sugala hormot agoe gonon Tompo'u ngen pungajoer to'u de' dokus. ² Pa', suna kuli do tuwotn'ou oduhlah nya do pucayo'u, sohlah kunura'ng nyom hormot neko' dietn kerena dietn oduhlah purih-purih seimon. Subalik'ou, suna kuli arus ngulayan tuwotn'ou ngen robih paguh agi'e kerena do nurumo'u burokot ngulayan oduhlah nya-nya pucayo'u ngen do dietn kunaseh. Ajoer ngen ngurajoerlah hoel-hoel ti'i neko' dietn. ³ Kalou oduh nya do ngurajoer pungajoer bukutn do de' susuwai ngen sono'u do munu'u musu Tompo'u to'u Kristus Yesus ngen de' susuwai ngen pungajoer kualepm, ⁴ yuh oduhlah pungurakoer ngen de' ngereti enih-enih. Yuh anya ro'u ngen pumbantoh do de' paguh, do anya sunuka'ng sono'u- sono'u do ngarah nim'ul dengki, pumocoh, ngurotuh, ngen curiga do bi'a', ⁵ sereta teroes munoroes noeh sulisih nun oncoh nya-nya do pumuker'ou moeh rasoh ngen nula' kumunu'u, do ngura bawa kualepm oduhlah jorotn unto' dopud kuuntuk'ng. ⁶ Pa', kualepm do sereta nyom sukup akon jugotn kuuntuk'ng do baas. ⁷ Sobob, to'u de' tobotn enih-enih watu murut ko' dunia ngen to'u gi'e de' dopud tobotn enih-enih watu ruwoh musu dunia ti'i. ⁸ Kalou moeh oduh kumakotn ngen bukokos, to'u akon kunyom sukup. ⁹ Nya do ro'u jaji kaya robu'u ko' wang punorei ngen omo'u, sereta bubagei nafsu do budo ngen nyulaka do akon puruntub nya-nya ko' wa'ng kuancur ngen kubunasa. Sobob, ¹⁰ suno'u akon duwet oduhlah wot musu sugala macopm kubi'a'. Nya-nya do neda' duwet moeh nyumpa'ng musu imon ngen sunisa odup'ou ngen bubagei kususoh. ¹¹ Pa', mu'u subagei musia musu Tompo'u, ungkujo'u lah odup mu'u musu sumua'ou setn. Noda'lah kumunu'u, kualepm, imon, kumasi'u, kusaboer, ngen kududut. ¹² Bujua'nglah wa'ng pujua'ng imon do paguh ngen bupoguhlah nun mudip kokoel do unto'ou mu'u do tabo'u watu mu'u jugotn pungaku'u do paguh nun jowi muwo'u sasi. ¹³ Nun jowi Tompo'u do jugotn mudip tunuh sugala koyuh ngen nun jowi Yesus Kristus do jugotn pungaku'u do paguh watu buradop ngen Pontius Pilatus, oku'u muruntoh mu'u, ¹⁴ kura'ou mu'u nyalotn puruntoh ti'i ngen de' bucacot ngen de' dokus sampei pumonug Tompo'u to'u Kristus Yesus. ¹⁵ Nun watu do tunontu-Ou, Yuh akon payatn odup'-Ou subagei ni'i-ni'i'ou Punguasa, Raja tunuh sugala raja, ngen Tuwotn tunuh sugala tuwotn. ¹⁶ Yuhlah ni'i-ni'i'ou do kokoel, do ngunu'u wa'ng tera'ng do de' kobus sunusuk'ou, do nya' seura'ng pun perenah ngurujuh atou dopud ngurujuh-Ou. Unto' Yuh, sugala hormot ngen kuasa do kokoel! Amin. ¹⁷ Sementara setn, puruntoh nya-nya kaya nun jamoen ti'i agoe de' sumok'ng atou dasotn punarop nun kukaya do de' pasti, pa' dasotnlah punarop neko' Tompo'u, do ngen mulimpoh sudiya sugala koyuh unto' to'u unto do kunyom. ¹⁸ Puruntoh dietn unto' bubuwot paguh, jaji kaya wang pubuwot-pubuwot paguh, jaji nya do paguh toi, ngen siyop budogei. ¹⁹ Ngen mungsetn, dietn akon gunumpu reta unto' odup dietn wadadup subagei puko' do paguh unto' watu do akon monug sampei dietn dopud bupoguh nun mudip do sumunu'ou. ²⁰ Timotius, nyagalah enih do moeh do pucayo'u neko' mu'u. Ngula'lah sono'u do duniawi ngen mong do de' bureti sereta butenta'ng do sucara osot do sunobut "pumpu'otn", ²¹ do ngen pungaku'u'ou, imon kuduh ra'ng jaji nyumpa'ng. Pumugotn nyereta mu'u.