¹ Soh suniyo'u dari do robih tuuh ngen Koros, pa' ngulakulah yuh subagei samo'u, ngen ngulakulah dari do robin dena' subagei purih. ² Ngulakulah budayuk'ng do robin tuuh subagei sunu'u, ngen budayuk'ng do robin dena' subagei purih budayuk'ng ngen tumos kuburoseh. ³ Nguromotlah jan'da-jan'da do munu'u-munu'u jan'da. ⁴ Pa', kalou jan'da oduh ena' atou sungkuh, dietnlah do putama-tama arus bulajoer tuju'u buti neko' abih romin odup'ou. Ngen mungsetn, dietn moeh bunaros basa budi neko' nya untuuh dietn, Sobob hoel ti'i lah do nyenang Tompo'u. ⁵ Jan'da do munu'u-munu'u jan'da ngen do mudip wadadup, yuh arus dasotn arop'ou neko' Tompo'u sereta sulalu sunampei punyungko'u ngen budu'a wang nyowo'u ngen ngaru'u. ⁶ Pa' jan'da do mudip anya busenang-senang, yuh moeh kobus walou yuh gi'e mudip. ⁷ Puruntohlah gi'e hoel-hoel ti'i neko' umot agoe dietn de' dokus. ⁸ Pa', kalou seura'ng de' nguria momo'u odup'ou, sus'ou abih romin do gi'e susuk, bureti yuh moeh nyangkoel imon'ou ngen yuh rebih parah musu nya do de' pucayo'u. ⁹ Jan'da do purut wang datar anyalah dayuk'ng do buumur palik'ng de' num puru'u sowo'u, jaji osou musu ni'i bonuh, ¹⁰ ngen do konoel kerena pubuwot-pubuwot paguh'ou, yuhlah ungkubaas ena'-ena', jugotn antuk'ng buus, kupo' kojo'u nya-nya do cuci, turuk'ng nya do wang kususoh, ngen rajitn wang sutiyop kereja do paguh. ¹¹ Pa', jan'da-jan'da do rebih dena' soh do purut ko' wang datar, sobob kalou kuiro'u pumalu'ou noeh dietn jo'u musu kristus, dietn akon ro'u masou agi'e. ¹² Hoel ti'i bodo'u deg kupm kerena dietn moeh ngulangor janyi putama do dietn noeh subayuh'ou. ¹³ Nun bingih setn, dietn miradn jemun bujag, kulilik'ng musu romin ko' romin do bukutn. Bukutn setn ja, dietn gi'e ngumong nya ngen nyampur hoel nya bukutn, nyono'u koyuh do suarus'ou de' dietn nyono'u. ¹⁴ Jaji, oku'u ro'u agoe jan'da-jan'da dena' masou agi'e, ngurana' ena', ngen ngatur momo'u sukud'ou agoe nya' sompot unto' rawotn ngina dietn. ¹⁵ Sobob, kuduh ra'ng moeh umbarik najoh sutodn. ¹⁶ Kalou oduh seura'ng dayuk'ng pucayo'u do oduh abih romin do jan'da, soolah dietn nguria jan'da-jan'da setn singa gereja de' arus nango'ou, ngen gereja dopud turuk'ng jan'da-jan'da bukutn do munu'u-munu'u purolu do turuk'ng. ¹⁷ Nya untuuh-nya untuuh do natur umot ngen paguh laya' nurumo'u hormot duwuh kali lipot, turutama dietn do bekereja koros wang bukotbah ngen ngajoer. ¹⁸ Sobob, Kitob Cuci nyono'u, "Soh ungkobut tukuk sapi do deg kirik ganupm,'' ngen "Seura'ng pekereja buha' dopud poh'ou." ¹⁹ Soh nurumo'u tuduh do purobu'u neko' nya untuuh kucuali budasoer nun buti musu duwuh atou taruh ra'ng sasi. ²⁰ Dietn do bubuwot dusa arus do nogu nun jowi nya kopa agoe do bukutn jaji toru bubuwot dusa. ²¹ Nun jowi Tompo'u, Yesus Kristus, ngen suna maleket do punirih, oku'u nogur mu'u ngen munu'u-munu'u agoe nurut ngen pungarah ti'i ngen nya puker bi'a' atou punurih kaseh. ²² Sohlah tulalu jagu'u jugotn burokot tunuh esih ja atou soh suwo'u nomi' dodeg wang dusa nya bukutn. Nyagalah agoe odup mu'u totop buroseh. ²³ Soh anya suup pi'itn kobus, pa' nengilah cu' angur unto' putuk'ng mu'u ngen tubu'u mu'u do burarig monopm. ²⁴ Dusa musu sutongoh nya sangoet jolos mayan sampei nontud dietn neko' pungadel. Pa', dusa musu sutongoh nya bukutn ba'uh akon mayan mus setn. ²⁵ Mungsetn gi'e oduh pubuwot paguh do jolos mayan. Pa' pubuwot paguh do de' mayan pun, de' akon toroes nyikadn.