¹ Roh nyono'u ngen joloes bawa nun on'u-on'u pungabis, subagi nya akon konteg imon'ou ngen sunoroh odup'ou neko' roh-roh punyosot ngen pungajoer sutodn-sutodn. ² Dietn do ngasut luwot kumunafik suna pumula'u do owa'ng toi'ou moeh do nucop nengi besi poros. ³ Dietn kujamon nya kawetn ngen kujamon nya man kumakotn do noeh Tompo'u, do suarus'ou do turumo'u ngen ucop sukur dietn do pucayo'u ngen ngonoel kumunu'u. ⁴ Sobob, sugala koyuh do noeh Tompo'u setn paguh ngen nya' do aropm kalou do turumo'u ngen ucop sukur, ⁵ kerena sumua setn do cuci sono'u Tompo'u ngen du'a. ⁶ Ngen ngurajoer hoel-hoel ti'i neko' purih-purih suimon, mu'u akon jaji pulayan Yesus Kristus do paguh, mungonih mu'u moeh do ngurajoer wa'ng sono'u-sono'u imon ngen pungajoer paguh do moeh mu'u najoh. ⁷ Ungkujo'u lah curita-curita tahyul ngen tanun-tanun toyuk'ng tuuh, pa' ngulatihlah odup mu'u unto' mudip wa'ng kualepm. ⁸ Latih tubu'u tubatoes guna'ou, pa' kualepm buguna wa'ng sugala hoel kerena nganuk'ng janyi unto' pumudip titi'u ngen di'e pumudip do akon monug. ⁹ Punyono'u ti'i dopud do pucayo'u ngen laya' do turumo'u sururuh'ou. ¹⁰ Unto' setnlah, to'u bukereja koros ngen bujuwa'ng. Sobob, to'u dasotn pungarop to'u neko' Tompo'u do mudip, do oduhlah punyulamoet sumua musia, sus dietn do pucayo'u. ¹¹ Puruntoh ngen ngajoerlah hoel-hoel ti'i. ¹² Eba'u oduh nya do pudubo'u mu'u kerena mu'u dena', pa' jajilah cuntoe unto' nya-nya pucayo'u wa'ng sono'u, pubuwot, kaseh, imon, ngen kuburoseh. ¹³ Sampei oku'u monug, rajitnlah wa'ng pumbaca busamoh Kitob Cuci, wa'ng jugotn pungajoer, ngen wa'ng ngajoer. ¹⁴ Soh suniya punyugotn rohani do oduh nun mu'u, do jugotn neko' mu'u ngulalu ramoel watu dewan puntuuh murokot mu'u. ¹⁵ Pubuwotlah hoel-hoel setn ngen rajitn, jugonlah odup mu'u suutuh'ou unto' ngulaku hoel-hoel ti'i agoe sumua nya dopud ngurujuh kumaju mu'u. ¹⁶ Purati ngen munu'u-munu'u mungonih mu'u mudip ngen enih do mu'u ngurajoer. Rajitnlah nun wa'ng'ou kerena ngen bubuwot mungsetn mu'u akon nyulamoet, enihkah odup mu'u atoupun dietn do kurungoh pungajoer mu'u.