¹ Puyono'u ti'i munu'u, "Kalou seura'ng ro'u jabotn pungawos umot, yuh ro'u kereja do paguh." ² Kerena setn, pungawos umot aruslah seura'ng do buroseh, bonuh musu ni'i osou, pengereti, punyaboer, do nguromot, anoel jugotn antuk'ng nginop ngen mae ngurajoe, ³ bukutn punyuub, bukutn nya do kasor subukutn nya do buralus, de' anoel budoruh, ngen bukutn nya do sunou duwet. ⁴ Yuh arus dopud ngurus momo'u odup'ou wadadup ngen paguh ngen nyaga ena'-ena'ou unto' nurut ngen nyom hormot. ⁵ Sobob, kalou yuh de' pu'otn mungonih ngurus momo'u odup'ou, mungonih yuh akon ngurus umot Tompo'u? ⁶ Sohlah yuh seura'ng putobot ba'uh agoe yuh de' jaji sumok'ng ngen robu'u ko' wang kupm sutodn. ⁷ Do namoh agi'e, yuh aruslah seura'ng do umpu'u gonon do paguh nung oncoh nya-nya sepa'u sampei yuh de' robu'u wa'ng kuhina ngen omo'u sutodn. ⁸ Mungsetn gi'e diaken, yuh aruslah seura'ng do turomot, de' bucaba'ng jira'u, de' tagih suub angur, ngen de' go'u kuuntuk'ng do de' bujog. ⁹ Dietn arus dopud toguh rasia kumunu'u imon ngen owa'ng toi do buroseh. ¹⁰ Dietn gi'e arus do nerei tayu'u ngen kalou tubukti de' dokus, dietn dopud mulayan subagei diaken. ¹¹ Mungsetn gi'e osou-osou diaken, dietn aruslah nya do nguromot, bukutn pungorotuh, pa' dopud nahan odup ngen dopud do pucayo'u wa'ng sugala hoel. ¹² Diaken arus bonuh musu ni'i osou, dopud ngatu ena'-ena'ou ngen momo'u'ou ngen paguh. ¹³ Sobob, dietn do moeh mulayan subagei diaken ngen paguh akon dopud pungoromot unto' odup dietn wadadup ngen kuyaketn do baas akon imon'ou wa'ng Yesus Kristus. ¹⁴ Oku'u buarop oku'u dopud jagu'u monug neko' mu'u, pa' oku'u nulis hoel-hoel ti'i ngen mu'u agoe suanei'ou oku'u ramot, ¹⁵ mu'u moeh pu'otn mungonih dietn arus mudip wa'ng romin Tompo'u, yuhlah gureja musu Tompo'u do mudip, tungka'ng punyanga, ngen dasor musu kumunu'u. ¹⁶ To'u ngaku'u butapa baas'ou rasia kualepm setn: "Yuh, do payatn wa'ng dagitn, do ungkudog Roh, do ngurujuh maleket-maleket, do kunaboer nun oncoh banca-banca, do pucayo'u wa'ng dunia, do dokot neko' kemuliaan."