అధ్యాయం 2
1
ఆ దినాంగులుకోరు రోమా పరిపాలనకోరు ఇక్కరు ప్రపంచం అడ్డి జనసంఖ్య నిర్వహించబేకిండు సీజర్ అగష్టస్ ఆజ్ఞాపించుసు.
2
ఇది కురేనియస్ సిరియా దేశానికి గవర్నర్ గా ఇందప్పుడు జరిగిక్కురు మొదటి జనసంఖ్య.
3
అత్తుకోరు పేరు నమోదు సేందుగిత్తుకు అడ్డి అస అస సొంత గ్రామాలకు ఓసు.
4
యోసేపు కూడా ఆసంఖ్యలో నమోదు ఆగిత్తుకు గలిలయకోరు నజరేతునుండి యూదయకోరు బేత్లెహేము ఇంగురు పేరిక్కురు దావీదు ఊరుకు ఓసు. ఎందాతుకు ఇండిగా అదు దావీదు వంశంకోరు గోత్రంకో పర్దిక్కురాలు.
5
అత్తుకు పొండుగా ప్రదానం అయి గర్భవతిగా ఇక్కురు మరియను అసుగుండు ఓసు.
6
అయిలు అటి ఇందప్పుడు ఆయమ్మ నెలలు నిండుసు.
7
ఆయమ్మ అస తొలిచూలు మగును పర్డు, మెత్తని బట్టుకోరు చుట్టి, ఆయనను పశువుల తొట్టికోరు వర్తేక్కుసు. సత్రంకో అయిలికి స్థలం దొరికిల్లా.
8
ఆ దేశముకోరు కొందరు గొర్రెల కాపరులు కొల్లకోరు ఇందు నామారికోరు అస మందను కాచుగుండు కీదు.
9
ప్రభువు దూత అయిలచ్చుకు వంచు. ప్రభువు తేజస్సు అయిలి చుట్టూ ప్రకాశించుసు. అయిలు భీతుగుండుసు.
10
అయితే ఆ దూత "భీతుగుమానంగా; ఇద్దో జనాంగులు అడ్డేరు కోసం మహాసంతోషకరమైన శుభవార్త నాను నింగ్లుకు ఎంత్తేందికీరి.
11
దావీదు ఊరుకో నింగ్లుకోసం రక్షకుడు పర్ధికీదు, ఈయన ప్రభువు, అభిషిక్తుడు
12
అత్తుకు ఇదే నింగ్లుకు గుర్తు; ఒండు శిశువు పొత్తిబట్టలకో చుట్టబడిన తొట్టికోరు వరుగోయిక్కిత నింగ్లు పాకాకంగా" యిండు అయిలోటి సొన్నుసు.
13
వెంటనే పరలోక సైన్యసమూహం ఆ దూతోటి ఇందు దేవురున స్తుతిస్తూ
14
"సర్వోన్నతమైన స్థలములకోరు దేవురుకు మహిమయు ఆయనకి ఇష్టమిక్కురు మొనుసులకు తర్రి మేని సమాధానమును" కలుగుభేకు గాక యిండు దేవురున స్తుతించుసు.
15
ఆ దూతలు అయిలచ్చుండు పరలోకమునకు ఓయిక్కురు తర్వాత ఆ గొర్రెల కాపరులు "జరిగిక్కురు ఈ విషయం ప్రభువు నమ్రుకు తెలియజేందుసు. నంబురు బేత్లెహేముకు ఓయి పాకంబు నడంగో," యిండు ఒండాలోటి ఒండాలు సొన్నుగుండు
16
త్వరగా ఓయి , మరియను యోసేపును తొట్టికోరు బూదుగుండిక్కురు శిశువును పాకుసు.
17
పాతు, ఆ శిశువును గురించి అయిలోటి సొన్నిక్కురు వాతలు ప్రచారం సేందుసు.
18
గొర్రెల కాపరులు అయిలోటి సొన్నిక్కురు సంగతలు కేటిక్కురాయ అడ్డేరు ఎత్తనో ఆశ్చర్యబూచ్చు.
19
మరియ మాత్రం ఆ విషయాలడ్డి హృదయముకో మననం సేందుగుండు పదిలపరచుకుంచు.
20
ఆ గొర్రెల కాపరులు అయిలోటి సొన్నిరితీరి అయిలు కేటిక్కిత పాతిక్కిత గురించి దేవురున మహిమ పరుస్తూ కీర్తిస్తూ ఎల్లిపోసు.
21
ఆ శిశువుకు సున్నతి ఆచారం జరిగించురు ఎట్టవ దినమున, ఆయన గర్భంకో బుగార్థుకుమినిగల్లి దేవదూత ఎచ్చిక్కురు యేసు ఇంగురు పేరు అయిలు ఆయనకు ఎక్కుసు.
22
మోషే ధర్మశాస్త్రము ప్రకారము శుద్దీకరణ దినాంగులు పూర్తి అయిన తర్వాత
23
'ప్రతి తొలిచూలు ఆమికేరు కుట్టిన ప్రభువుకు ప్రతిష్ట సేయిభేకు' యిండు ప్రభువు ధర్మశాస్త్రము కో రాసికీదు గనుక ఆయనను ప్రభువుకు ప్రతిష్ఠసేయిత్తుకు,
24
ప్రభువు ధర్మశాస్త్రముకో రాసిక్కిరితీరి కుంజులు జతనుగాని రెండు పావురపు కుట్లి గాని బలిగా సమర్పించిత్తుకు, అయిలు ఆయనను యెరూషలేముకు అసుగుండు ఓసు.
25
యెరూషలేముకోరు సుమియోను ఇంగురు ఒండు క్యాపయ్య కీదు. అదు న్యాయవంతుడు, భక్తిఇక్కురాలు. ఇశ్రాయేలుకు కలుగబోవు ఆదరణ కోసం ఎదురు పాకురాలు. పరిశుద్దాత్మ అదిమేని కీదు.
26
అదు ప్రభువు అభిషిక్తుణ్ణి పాకారుగుండా సొత్తోగుమాదిండు అత్తుకు పరిశుద్దాత్మ వెల్లడిసేందుసు. ఆ దినమున అదు ఆత్మవశుడై దేవాలయముకోకు వంచు.
27
ధర్మశాస్త్ర పద్ధతి ప్రకారం ఆయన విషయముకో జరిగిత్తుకు అమ్మ ఆవు బాల యేసును దేవాలయముకోకు ఎత్తేంచు.
28
సుమియోను అస కియ్యికోకు ఆయనను పెచ్చుగుండు దేవురున స్తుతిస్తూ ఇన్నగ ఇంగుసు.
29
"ప్రభూ, ఇప్పుడు నిట వాత సొన్నిరుతీరి శాంతితో నీసేవకుణ్ణి ఓగురు తీరి సేయక్కర .
30
అన్యజనాంగులుకు నిన్ను వెల్లడించిత్తుకు ఎలుతురుగాను నిట జనాంగులగు ఇశ్రాయేలుకు మహిమగా
31
నీను జనాంగులు అడ్డేరు మినిగల్లి సిద్ధం సేందిక్కురు
32
నిట రక్షణను నాను కళ్ళారా పాతి."
33
యోసేపును, ఆయన అమ్మను ఆయనను గురించి సుమియోను సొన్నిక్కురు వాతలు కేటు ఆశ్చర్యబూచ్చు.
34
అదు అయిలున దీవించి, "ఇద్దో అనేక హృదయాలోచనలు బయలుబుగురు తీరి, ఇశ్రాయేలుకో అనేకులు బుగిత్తుకు ఎ ద్ధిక్కిత్తుకు వివాదాస్పదమైన గురుతుగా ఈయన నియమింపబూదుకీదు;
35
ఆయన అమ్మ మరియ ఓటి "నిట హృదయముకోకు షాకు దూసుకు ఓక్కుదు" యిండు సొన్నుసు.
36
దేవుని మూలముగా పలుకురు అన్నా ఇంగురాయమ్మ కీదు. ఆ యమ్ముట ఆషేరు గోత్రం, ఆయమ్మ పనూయేలుకు పుల్లు. ఆయమ్మ కన్యాలు అయి ఏగు వాటుకాలు మనాగోటి కాపురం సేందు క్యాంబులు వయసుకోరు ఎట్రూగుబోత్తు
37
నాలు వాటుకాలుపాటు ముండుమోపిగా కీదు. ఆయమ్మ గుడికోరే ఇందు ఉపవాస ప్రార్థనలు నామారి పగమారి సేవ సేందుగుండు ఇంచు.
38
ఆ యమ్మ కూడా ఆసమయముకోరు ఉల్లికివందు దేవురున కొనియాడి, యెరూషలేముకోరు విముముక్తి కోసం ఎదురు పాకక్కురు అడ్డేరోటి ఆయనను గురించి వాచ్చుగుండు ఇంచు.
39
అంతట అయిలు ప్రభువు ధర్మశాస్త్రము ప్రకారము సమస్తము పూర్తి సేందుగుండు గలిలయ ఇంగురు అస సొంత గ్రామం నజరేతుకు ఎల్లిపోసు.
40
బాలుడు జ్ఞానమోటి నింపుగుండు, ఎదిగి బలము పొందుగంచు; దేవురుట దయ ఆయన మేని ఇంచు.
41
పస్కాపండుగప్పుడు ఆయన తలిదండ్రులు ఏటేటా యెరూషలేమునకు ఓగురాయ.
42
ఆయన పొదునెండు వాటుకాలుకోరు వాడుక ప్రకారం అయిలు ఆపండుగకు యెరూషలేముకు ఓసు.
43
ఆ దినాంగులు అయిపోయినప్పుడు అయిలు తిరిగి ఓగందిగా బాలుడైన యేసు యెరూషలేముకోరు నిలుబూదోసు.
44
ఆయన తల్లిదండ్రులు ఆ సంగతి తెలిమాది ఆయన గుంపుకోరే కీదిండుగుండు, ఒండు దినమత్తన ప్రయాణము సాగిపోయి, అస బందువులుకోరును, అయిలికి ఆయిక్కురు అయిలుకోరును ఆయనను దేవుసు.
45
ఆయన కండు బూగారుదోసు ఆయనను దేవుగుండు యెరూషలేముకు తిరిగి వంచు.
46
అప్పుటుకు మూడు దినములాసు. ఆయన గుడికోరు బోధకుల మధ్యకోరు కొందుగుండు , అస వాతలును ఆలకించుచు అయిలున ప్రశ్నలను కేటుగుండు ఇందిగా పాకుసు.
47
ఆయన వాతలు కేకిక్కురు అడ్డేరుకు ఆయన ప్రజ్ఞకు , ప్రత్యుత్తరాలకు విస్మయం మొందుసు.
50
48
న తలిదండ్రులు ఆయనను పాతు ఎత్తనో ఆశ్చర్యపోసు. ఆయన అమ్మ "మగనే , నంగ్లున ఎందాతుకు ఇన్నగా సేందికీరా? నిగావు, నాను అగుదుగుండు నిన్ను దేవందో యిండు ఆయనోటి సొన్నుసు.
49
ఆయన నింగ్లు నన్ను ఎందాతుకు దేవక్కరంగా? నాను నా తండ్రి పనులు మేని ఇక్కిభేకిండు నింగ్లుకు తెలిమాదా? ఇంగుసు.
50
ఆయన సొన్నక్కురు వాతలు అయిలికి అర్థము ఆగిల్లా.
51
అప్పుడు ఆయన అయిలోటి కలిసి బయలుదేరి నజరేతుకు వందు అయిలికి లోబుగురు తీరి ఇంచు. ఆయన తల్లి ఈ సంగతలు అడ్డి అస హృదయముకోరు భద్రం సేందుగుంచు.
52
యేసు జ్ఞానముకోరు, వయసుకోరు, దేవురుట దయకోరు, మొనుసులుట దయకోరు వర్దిల్లుసు.