¹ Ttü, Juan bü̧o̧sa̧ jü̧nä̧ wa̧mä̧, Gayorü isopäiünä repedäcuru wȩyu̧tu̧ weüsä. ² Repedäcu, ttümä Diosrütä jäepäijusä o'cajuiyünä̧ttü̧tä̧ adiunä cu̧ji̧ya̧ttü̧ päü, ja̧wa̧ta̧nü̧ cuidepänäínä na̧cuä̧chü̧ juiya päü, cua̧'cua̧ru̧nä̧ adiunä cu̧ju̧ta̧á̧nü̧ ³ Rü̧ȩnä̧tä̧ esewäjisä tawaruwä ti̧jä̧wa̧tü̧ ichä'cotu ucu cutu'cu jittäwomenämä, ja̧wa̧ta̧nü̧ isopäiünä wȩnȩnä̧ cui̧'chü̧ jittäwomenäínä ⁴ Korottüinä abonänü rü̧ȩnä̧ esewäjisä, chi̧tti̧mü̧ wotü isopäiünä wȩnȩnä̧ tti̧'cha̧á̧ chä̧ju̧cuo̧mȩnä̧. ⁵ Repedäcu, ucumä tawaruwä Diosrü esetäturuinä esetocoturuinä fäcuädomenämä Diosrü jueutä jȩpü̧jä̧, ⁶ juätümä ucu repeü cu̧ju̧mä̧ adiutä jiäwinä̧tü̧. Dios i̧wȩnȩ jiäü tti̧'cha̧ päü wecuomenämä Dios esewomenä jȩpü̧jä̧, ⁷ Jesucristo i̧mi̧nä̧ räopü jiäü tti̧'cha̧á̧ttü̧, juätümä korotu esetocotu ttiyatü päü jäepocotu pätü. ⁸ Ja̧wa̧nü̧ ja̧á̧ttü̧ ujutumä juätürümä fätäda päütä ja̧á̧, ji̧nä̧ yo̧mȩtȩ päiü fäädäcuäü Dios i̧wȩnȩ taditäcuaánü. ⁹ Ttümä Diosrü esetäijätürü wȩyu̧tü̧ weäjisä, ja̧wa̧nü̧ ja̧á̧nä̧ Diótrefemä, korotüttüínä a'canä ü̧ja̧ päü ku'cäijümä, ujuturumä ya̧o̧cuä̧rä̧ji̧. ¹⁰ Ja̧wa̧nü̧ ja̧á̧ttü̧, juaá chi̧'cho̧mȩnä̧mä̧, pa̧á̧nü̧ jȩä̧'chä̧i̧jü̧mä̧ pä̧dä̧cua̧, ujutu tutu'cu surojunä wȩnȩtä̧rü̧ pää'chäjinä̧ pä̧dä̧cua̧. Pa̧á̧nü̧ jȩpü̧mä, Diosrü esetäturumä ya̧o̧cuä̧rä̧ji̧. Fättäda päätürümä ro̧ȩpü̧ kü̧nü̧ iglesia isodettümä räepü icuäji. ¹¹ Repedäcu, suroju jettumä jȩ'cuo adiwä juäitä jȩpü̧ kä̧wi̧. Adiwä juäi jȩpü̧ kü̧mä̧ Dioscü kü̧. Suroju jȩpü̧ kü̧mä̧ Diosrümä topocü pinü. ¹² Demetrio ü̧jü̧ tü'cümä o'catoiünä adiutä ttücuocuäcü, ja̧wa̧ta̧nü̧ isopäiünä wȩnȩ wo̧juä̧tü̧i̧nä̧ adiutä ttucuocuäcü. Ujutuinä adiutä tucuocuäcu, ucutuinä wo̧juä̧tü̧jä̧ pi̧yȩ tucuocuäjimä isopäiünä ja̧á̧ päümä. ¹³ Ucuru wȩyu̧tu̧ weda päümä rü̧ȩnä̧ ka̧á̧, ja̧wa̧nü̧ ja̧á̧nä̧ wȩyu̧cuä̧ iso'quinä isoya 'cu̧cuȩtä̧rü̧mä̧ chi̧wȩyu̧ta̧mä̧ päocüsä ¹⁴ Ja̧wa̧nü̧ ja̧á̧ttü̧ jurunänü tocha päüsä ucurumä, ji̧nä̧ yo̧mȩtȩ pä̧mä̧dü̧ ucucu chucuocua päü. ¹⁵ Wȩnȩ juiyünä ka̧cuä̧tu̧cui̧. Po ka̧cuä̧tü̧ cuawaruwämä tettäwäcujä̧. Ja̧wa̧ta̧nü̧ ttüínä juaá ka̧cuä̧tü̧ chawaruwärümä ya̧cu̧nä̧rü̧ tecuäwiyattü päüsä.