¹ Pọ́ọ̀lù àti Tìmótíù, àwọn ìráńṣẹ́ Krístì Jésù, sí gbogbo àwọn tí a yà sọ́tọ̀ nínú Krístì Jésù tí wọ́n wà ní Fílípì, pẹ̀lú àwọn alábójútó àti àwọn díákónì. ² Oore-ọ̀fẹ́ fún yín àti àlàáfíà fún yín láti ọ̀dọ̀ Ọlọ́run Bàbá wa àti Olúwa wa Jésù Krístì. ³ Mo dúpẹ́ lọ́wọ́ Ọlọ́run mi ní gbogbo ìgbà tí mo bá rántí yín. ⁴ Ní gbogbo ìgbà tí mo bá ń gbàdúrà fún gbogbo yín, tayọ̀tayọ̀ ni mo fi ń gbàá. ⁵ Mo dúpẹ́ fún bí ẹ ti ṣe alábàpiń nínu ìhìnrere náà láti ìbẹ̀rẹ̀ títí di ìsinsìnyí. ⁶ Mo ní ìgboyà ohun kan yí, pé Ẹnití ó ti bẹ̀rẹ̀ iṣẹ́ rere nínú yín yíò tẹ̀síwájú láti yanjú rẹ̀ títí di ọjọ́ Jésù Krístì. ⁷ Ó yẹ kí n ní ìmọ̀lára yìí nípa gbogbo yín nítorí mo fi yín sọ́kàn. GBogbo yín ti jẹ́ alábàápín oore-ọ̀fẹ́ pẹ̀lú mi nínú ìgbèkún mi, nínú àwíjàre mi àti nínú ìfìdímúlẹ̀ ìhìnrere. ⁸ Ọlọ́run mọ̀ bí ọkàn mi ṣe ń pòǹgbẹ fún gbogbo yín pẹ̀lú ìkáànú Krístì Jésù. ⁹ Àdúrà mi nì yí: pé kí ìfẹ́ yín le máa gbilẹ̀ síi nínú ìmọ̀ àti gbogbo òye. ¹⁰ Mò ń gbàdúrà yí kí ẹ̀yin kí ó le ṣe àgbéyẹ̀wò ohun tí ó yege, kí ẹ sì wà ní àìní àbùkù kankan lọ́jọ́ Krístì. ¹¹ Mo gbàdúrà pé kí á fi èso òdodo tí ó wá láti ipasẹ̀ Jésù Krístì kún un yín, fún ògo àti ìyìn Ọlọ́run. ¹² Ǹjẹ́, ẹ̀yin ará, mo fẹ́ kí ẹ mọ̀ pé ohun tí ó ṣẹlẹ̀ sí mi ti mú kí ìhìnrere gbilẹ̀ síi. ¹³ Nítorí ìdí èyí, ó ti di mímọ̀ fún gbogbo àwọn ẹ̀ṣọ́ ààfin àti àwọn yókù pé mo jẹ́ òǹdè fún Krístì. ¹⁴ Ọ̀pọ̀lọpọ̀ àwọn ará ni wọ́n ní ìgbẹ́kẹ̀lé nínú Ọlọ́run síi nítorí ìdè mi tí wọ́n sì ní ìgboyà láti sọ ọ̀rọ̀ náà. ¹⁵ Nítòótọ́ àwọn kan ń kéde Krístì pẹ̀lú owú àti ìlara, àti àwọn míran pẹ̀lú inú-rere. ¹⁶ Àwọn wọ̀nyí ń ṣe é pẹ̀lú ìfẹ́, wọ́n mọ̀ pé a pè mí kí n wá wíjọ́ nítorí ìhìnrere ni. ¹⁷ Ṣùgbọ́n àwọn tọ̀hún ń kéde Krístì nínú ìlépa-taraẹni-nìkan ni, kìí ṣe nínú òtítọ́. Wọ́n rò pé àwọn yóò pa mí lára nígbàtí mo wà nínú ìdè. ¹⁸ Kí ló tún kù? Kìkì i pé ní gbogbo ọ̀nà, bóyá pẹ̀lú ìdíbọ́n àbí pẹ̀lú òtítọ́, Krístì di kíkéde, èyí sì fún mi láyọ̀. Bẹ́ẹ̀ni, èmi yóò sì yọ̀, ¹⁹ nítorí mo mọ̀ pé èyí yóò yọrí sí ìdáǹdè mi nípa àdúrà yín àti pẹ̀lú ìrànlọ́wọ́ Ẹ̀mí Jésù Krístì. ²⁰ Nípasẹ̀ àfojúsùn mi àti ìrètí tí ó dájú wípé ojú kì yóò tì mí rárá, pẹ̀lú gbogbo ìgboyà, nísinsìnyí gẹ́gẹ́ bíi ti tẹ́lẹ̀ pe, a ó gbé Krístì ga lára mi, ní yíyè tàbí ní kíkú. ²¹ Nítorí fún mi láti wà láàyè jẹ́ fún Krísti láti kú sì jẹ́ èrè. ²² Ṣùgbọ́n bí mo bá wà láàyè, ó túmọ̀ sí iṣẹ́ tó léso fún mi. Síbẹ̀ èwo ni kí n yàn? N kò tilẹ̀ mọ̀. ²³ Méjéèjì ń ṣe kámikàmìkámi. Ó wù mí kí n kú kí n le wà pẹ̀lú Krístì, èyí tí ó sàn jù, ²⁴ síbẹ̀ ó ṣe pàtàkì kí n wà láàyè nítorí tiyín. ²⁵ Pẹ̀lú àrídájú ohun kan yìí, mo mọ̀ pé èmi yóò wà pẹ̀lú yín síi fún ìtẹ̀síwájú yín àti ayọ̀ yín nínú ìgbàgbọ́. ²⁶ Kí ẹ̀yin kí ó lè ní ìdí síi láti yangàn nínú Krístì Jésù láti ipasẹ̀ mi nígbàtí mo bá tún tọ̀ yín wá. ²⁷ Kìkì pé kí ẹ̀yin kí ó má gbé ìgbé-ayé yín ní ìbámu pẹ̀lú ìhìnrere Krístì, tóbẹ́ẹ̀ tí ó fi jẹ́ pé bóyá mo wá wò yín tàbí n kò wá, èmi yóò lè máa gbọ́ nípa yín, pé ẹ̀ ń dúró ṣinṣin pẹ̀lú ẹ̀mí kan, ẹ sì ń lépa papọ̀ fún ìgbàgbọ́ ìhìnrere náà pẹ̀lú ọkàn kan. ²⁸ Ẹ máṣe jẹ́ kí àwọn alátakò yín kí ó da jìnnìjìnnì bò yín bí tií wulẹ̀ kó mọ. Èyí jẹ́ àmì fún wọn fún ìparun wọn, ṣùgbọ́n fún ìgbàlà yín - láti ọ̀dọ̀ Ọlọ́run sì ni èyí. ²⁹ Nítorí a ti fi fún un yín, nítorí Krístì, kì í ṣe láti gbà á gbọ́ nìkan, ṣùgbọ́n láti jìyà nítorí Rẹ̀ pẹ̀lú, ³⁰ kí ẹ̀yín kí ó ní ìlàkọjá kan náà tí ẹ rí tí mo ní, tí ẹ sì gbọ́ tí mo ń sọ nísinsìnyí.