¹ Nígbàtí ọjọ́ ìsinmi tí kọjá, Màríà Magdalénì àti Màríà ìya Jákọ́bù àti Salomíì mú tùràrí wá kí wón le kun ara Jésù. ² Ní kété tí ilẹ̀ mó ní ọjó ìkíní ọ̀sẹ̀ wọ́n lọ sí ẹnu ibojì ní kẹ́tẹ́ tí òòrùn yọ. ³ Wọ́n ńbá ara wọ́n sọ̀rọ̀, wípé tani yóò yí òkúta kúrò lẹ́nu ibojì nàà? ⁴ Nígbàtí wọ́n gbójú wo òkè, wọ́n rí pé a ti yí òkúta náà kúrò, nítorí tí ó tóbi gan. ⁵ Wón wọ inú ibojì náà, wọ́n sì rí ọmọdékùnrin kan tí ó wọ asọ funfun, jókọ ní ọwọ́ ọ̀tún, ẹnú sì yàwọ́n. ⁶ Ó wí fún wọn pé , "Ẹ má bẹ̀rù. Ẹ̀yin ń wá Jésù ará Násárẹ́tì, Ẹni tí a kàn mó àgbélèbú. Ó ti jí dìde. Kòsí ní ìhín. Ẹ wo ibi tí a tẹ́ sí. ⁷ Sùgbọ́n ẹ lọ, sọ fún àwọn ọmọ ẹ̀yìn rẹ̀ àti Pétérù pé ó ti síwájú yín lọ sí Gálílì. Níbẹ̀ ni ẹ̀yin yóò ri, bí ó ṣe sọ fún yín." ⁸ Wọ́n jáde wọ́n sì sá kúrò nínú ibojì náà; ẹ̀rù bà wọ́n, ẹnu sì yà wọ́n. Wọ́n kò sọ ohunkóhun fún ẹnikẹ́ni nítorítí ẹ̀rù bà wọ́n gidi gan. ⁹ Ní kùtùkùtù òwúrọ̀ ní ọjọ́ ìkíní ọ̀sẹ̀, lẹ́yìn tí ó ti jí dìde, ó kọ́kọ́ farahàn Màríà Magdalénì, lára ẹni tí ó ti lẹ́ ẹ̀mí èsù méje jáde. ¹⁰ Ó lọ sọ fún àwọn tí ó wà lọ́dọ̀ rẹ̀, níbi tí wọ́n tí ń sọ̀fọ̀ tí wọ́n sì ń sọkún. ¹¹ Wón gbọ́ pé ó wà láàyè àti pé ó ti rí i, sùgbọ́n wọn kò gbàgbọ́ ¹² Lẹ́hìn ǹkan wọ̀nyí ó farahàn ní orísirísi ọ̀nà fún méjì nínú wọn bí wọ́n sé ń jáde lọ sí inú orílẹ̀ èdè náà. ¹³ Wọ́n lọ sọ fún àwọn ọmọ ẹ̀yìn tó kù, sùgbọ́n wọn kò gbà wọ́n gbọ́. ¹⁴ Jésù sì tún farahàn fún àwọn mọ́kànlá bí wọ́n tí ń jẹun lórí tábìlì, ó sì bá wọn wí fún àìgbàgbọ́ àti líle àyà wọn, nítorí wọn kò gba àwọn tí ó kọ́kọ́ rí i, lẹ́yìn tí ó jí dìde gbọ́. ¹⁵ Ó sọ fún wọn pé, "Ẹ lọ sí gbogbo ayé kí ẹ lọ wáásù ìhìnrere fún gbogbo ẹ̀dá. ¹⁶ Ẹnikẹ́ni tí ó bà gbàgbọ́ tí a sì baptìstì rẹ̀ ni a ó gbàlà, àti ẹnikẹ́ni tí kò bá gbàgbọ́ a ó dá a lẹ́jọ́. ¹⁷ Àmìn wọ̀nyí ni yóò ma bá àwọn tí ó gbàgbọ́ lọ: Ní orúkọ mi ni wọn yóò ma lé àwọn ẹ̀mí òkùnkùn jáde. Wọn yóò ma fi èdè titun sọ̀rọ̀. ¹⁸ Wọn yóò gbé ejò sókè ní ọwọ́ wọn, bí wọ́n bá mu ohunkóhun tí ó lóró, kì yóò pa wọ́n lára. Wọn yóò gbé ọwọ́ lé àwọn aláìsàn, ara wọn yóò sì dá. ¹⁹ Lẹ́yìn tí Olúwa ti báwọn sọ̀rọ̀ tán, a gbà á lọ sí ọ̀run, ó sì jókòó sí ọwọ́ ọ̀tún Ọlọ́run. ²⁰ Àwọn ọmọ ẹ̀yìn kúrò wọ́n sì ń wásù níbi gbogbo, nígbàtí Olúwa ń bá wọn ṣiṣẹ́, ó sì ń fi ìdí ọ̀rọ̀ wọn kalẹ̀ nípa iṣẹ́ àmìn tí ó ń tẹlẹ wọn.