¹ Nígbànáà ni Jésù bẹ̀rẹ̀ sí í fi òwe kọ́ wọn. Ó wípe, “Ọkùnrin kan gbin ọgbà àjàrà kan, Ó ṣe ọgbà yìí ká, ó sì wá ilẹ̀ fún ìfúntí wáìnì. Ó kọ́ ilé ìṣọ́, ó sì fi ṣe àgbàtọ́jú fún àwọn olùṣọ́gbà. Ó sì lọ sí ìrìnàjò. ² Lákokò tí ó tọ́, ọkùnrin náà rán ọ̀kan nínú àwọn ọmọ ọ̀dọ̀ rẹ̀ sí àwọn olùṣọ́gbà náà, kí ó gbà nínú èso ọgbà àjàrà náà lọ́wọ́ àwọn olùṣọ́gbà. ³ Ṣùgbọ́n wọ́n mú u, wọ̀n lù ú, wọ́n sì rán an padà lọ́wọ́ òfo. ⁴ Ó sì tún rán ọmọ ọ̀dọ̀ mìíràn sí wọn, ṣùgbọ́n wọ́n dá ọgbẹ́ sí i lórí, wọn rán an lọ ni ìtìjú. ⁵ Ó sì tún rán òmíràn, èyí nì wọ́n sì pa. wọ́n lu òmíràn wọ́n sì pa òmíràn. ⁶ “Ó ní ẹnìkan síi láti rán, èyí ni àyànfẹ́ ọmọ rẹ̀. Níkẹyìn ó ran an sí àwọn olùṣọ́gbà náà. Ó wípé, ‘Wọn yóò bu ọlá fún ọmọ mi.’ ⁷ “Ṣùgbọ́n àwọn olùṣọ́gbà wí fún ara wọn pé, ‘Èyí yìí ni àrólé. Ẹ wá, ẹ jẹ́ kí a pa á, ogún rẹ̀ yóò sì jẹ́ tiwa.’ ⁸ Wọ́n mú ọmọ, wọ́n sì pa á, wọ́n sì wọ́ òkú rẹ̀ jáde kúrò nínú ọgbà àjàrà náà. ⁹ Ńjẹ́ kí ni olúwa ọgbà àjàrà yóò ṣe? Òun yíò wá láti pa àwọn olùsọ́gbà ni run, òun yóò sì fún àwọn mìíràn ní ọgbà rẹ̀. ¹⁰ Tàbí ẹ̀yin kò ì tí ka ẹsẹ yìí nínú ìwé mímọ́?  ‘Òkúta tí àwọn ọ̀mọ̀lé kọ̀sílẹ̀, òun náà ni ó di pàtàkì igun ilé. ¹¹ Èyí wá láti ọdọ̀ Olúwa, ó sì jẹ́ ìyàlẹ́nu lójú tiwa’?” ¹² Wọ́n ń wá ọnà láti mú Jesu, ṣùgbọ́n ẹ̀rù ń bà wọ́n nítorí ọ̀pọ̀ ènìyàn tó wà lọ́dọ̀ rẹ̀, nítorí tí wọ́n mọ̀ pé àwọn ló ń pòwe mọ́. Nítorí náà wọ́n fi í sílẹ̀ lọ. ¹³ NÍgbànáà ni wọ́n rán àwọn Farisí pẹ̀lú àwọn kan tí í ṣe ọmọ-ẹ̀yìn Herodu wá sọ́dọ̀ Jesu, láti fi ọ̀rọ̀ rẹ̀ mú. ¹⁴ Bí wọn ti dé, wọ́n wí pé: “Olùkọ́, àwa mọ̀ pé ìwọ máa ń sọ òtítọ́ láìsí ìbẹ̀rù ẹnikẹ́ni. Òtítọ́ ọ̀rọ̀ Ọlọ́run ni ìwọ máa ń kọ́ni. Ńjẹ́ ó tọ́ tàbí kò tọ́ láti máa san owó orí fún Kesari?” Kí àwa kí ó san án, tàbí kí a máa san án? ¹⁵ Ṣùgbọ́n Jesu mọ ìwà àgàbàgebè wọn, Ó sì wí pé, “Èéṣe tí ẹ̀yin fi n dán mi wo? Ẹ mú owó idẹ kan wá kí n wò ó.” ¹⁶ Wọ́n mú owó idẹ kan fún Jésù. Ó wí fún wọn pé, “Àwòrán àti orúkọ ta ni èyí?” Wọ́n dáhùn pé, “Ti Kesari ni.” ¹⁷ Jesu wí fún wọn pé, “Ẹ fi ohun tí ó bá jẹ́ ti Kesari fún Kesari, ohun tí í ṣe ti Ọlọ́run fún Ọlọ́run.” Ẹnu sì yà wọ́n gidigidi. ¹⁸ Nígbànáà ni àwọn Sadusí, tí ó wípé kò sí àjíǹde, tún wá sọ́dọ̀ rẹ̀. Wọ́n biì léèrè pé, ¹⁹ “Olùkọ́, Mose fún wa ní òfin pé, 'Nígbà tí ọkùnrin kan bá kú láìbí ọmọ, arákùnrin rẹ̀ gbọdọ̀ ṣú ìyàwó náà lópó kí wọn sì bímọ ní orúkọ ọkọ tí ó kú náà. ²⁰ Àwọn arákùnrin méje kan wà; èyí tí ó dàgbà jùlọ gbéyàwó, ó sì kú ní àìlọ́mọ. ²¹ Arákùnrin rẹ̀ kejì ṣú obìnrin tí ó fi sílẹ̀ lópó, òun pẹ̀lú tún kú láìbímọ. Bẹ́ẹ̀ gẹ́gẹ́ ni arákùnrin kẹta. ²² Àwọn méjèèje kò sì fi ọmọ sílẹ̀, Ní ìkẹyìn gbogbo wọn, obìnrin náà kú pẹ̀lú. ²³ Ǹjẹ́ ní àjíǹde, nígbà tí wọ́n bá jíǹde, aya ta ni yóò ha ṣe nínú wọn? Àwọn méjèèje ni ó sá ni ní aya?” ²⁴ Jesu wí fún wọn pé, “Kì í há ṣe nítorí èyí ni ẹ ṣe ṣìnà, nítorí ẹ̀yin kò mọ ìwé Mímọ́ tàbí agbára Ọlọ́run? ²⁵ Nítorí pé, nígbà tí wọ́n bá jí dìde nínú òkú, a kò ní ṣe ìgbéyàwó fún wọn, ṣùgbọ́n wọn dàbí àwọn angẹli tí ń bẹ ní ọ̀run. ²⁶ Ṣùgbọ́n nípa àjíǹde tó ti kú, ẹ̀yin kò ì tí ka nínú ìwé Mósè, àkọsílẹ̀ pápá tí ń jó, bí Ọlọ́run se bá Mósè sọ̀rọ̀ tó wípé, ‘Èmi ni Ọlọ́run Ábráhámù, Ọlọ́run Ísáákì àti Ọlọ́run Jákọ́bù’? ²⁷ Òun kì í ṣe Ọlọ́run àwọn òkú, bí kò ṣe Ọlọ́run àwọn alààyè. Ẹ̀yin ṣe àṣìṣe gidigidi.” ²⁸ Ọ̀kan nínú àwọn olùkọ́ òfin wá ó sì fetísílẹ̀ gbọ́ àròyé wọn; ó ṣàkíyèsí pé Jesu ti dáhùn dáradára. Òun pẹ̀lú sì béèrè lọ́wọ́ Jesu pé, “Nínú gbogbo òfin, èwo ló ṣe pàtàkì jùlọ?” ²⁹ Jesu dáhùn ó wípé, “Èyí tó ṣe pàtàkì jùlọ ni, ‘Gbọ́ Ísráẹ́lì; Olúwa Ọlọ́run wa, Olúwa kan ni. ³⁰ Kí ìwọ kí ó fi gbogbo àyà rẹ, àti gbogbo ọkàn rẹ, àti gbogbo ẹ̀mí rẹ, àti gbogbo agbára rẹ fẹ́ Olúwa Ọlọ́run rẹ.' ³¹ Èkejì ni pé: ‘Fẹ́ ọmọnìkejì rẹ gẹ́gẹ́ bíi ara à rẹ.’ Kò sí òfin mìíràn tó ga ju èyí lọ.” ³² Olùkọ́ òfin náà dáhùn pé, “Olùkọ́, ìwọ sọ òtítọ́ pé Ọlọ́run kan ni ó wà, àti pé kò sí òmíràn lẹ́yìn rẹ̀. ³³ Àti kí a fi gbogbo ọkàn, àti gbogbo òye, àti agbára fẹ́ ẹ, àti fẹ́ ọmọnìkejì ẹni bí ara ẹni, ó ju gbogbo ẹbọ sísun, àti ẹbọ lọ.” ³⁴ Nígbà tí Jesu rí i dájú pé ó ti dáhùn pẹ̀lú òye, Ó wí fún un pé, “Ìwọ kò jìnà sí ìjọba Ọlọ́run.” Láti ìgbà náà lọ, ẹnikẹ́ni kò tún béèrè ohun kan lọ́wọ́ Jesu. ³⁵ Jesu dáhùn nígbà tí ó ń kọ́ ni nínú tẹ́ḿpílì, ó wípé, “Èéṣe tí àwọn olùkọ́ òfin fi wí pé Kristi ní ọmọ Dáfídì? ³⁶ Dáfídì tìkára rẹ̀, nípa Ẹ̀mí Mímọ́ sọ̀rọ̀ wí pé, “ ‘Olúwa sọ fún Olúwa mi pé,“Jókòó ní ọwọ́ ọ̀tún mi, títí èmi yóò fi sọ àwọn ọ̀tá rẹ di àpótí ìtìsẹ̀ rẹ.' ³⁷ Dáfídì tìkára rẹ̀ pè é ní ‘Olúwa,’ Báwo ni Olúwa tún ṣe lè jẹ́ ọmọ Dáfídì?” Ọ̀pọ̀ ènìyàn sì fi ayọ̀ gbọ́ ọ̀rọ̀ rẹ̀. ³⁸ Nínú ẹ̀kọ́ rẹ̀ Jésù wípé, “Ẹ ṣọ́ra fun àwọn olùkọ́ òfin, tí wọ́n fẹ́ láti máa wọ aṣọ gígùn káàkiri, tí wọ́n sì fẹ́ ìkíni ní ọjà ³⁹ àti ibùjókòó ọlá nínú Sínágọ́gù àti ipò ọlá níbi àsè. ⁴⁰ Wọ́n a tún máa jẹ ilé àwọn opó rún, tí wọ́n sì ń gbàdúrà gígùn fún àsehàn. Àwọn wọ̀nyí yíò wa ìdálẹ́bi púpọ̀." ⁴¹ Jésù sî jókòó ní òdìkejì kọjú sí àpótí ìṣúra ní tẹ́ḿpílì; ó ń wo ìjọ ènìyàn ti ń sọ owó sínú àpótí ìṣúra. Opọ̀ àwọn ọlọ́rọ̀ sì sọ púpọ̀ sí i. ⁴² Ṣùgbọ́n obìnrin opó kan wà, ó sì fi ààbọ̀ owó idẹ méjì síbẹ̀, tí ì ṣe ìdá méjì owó-babà kan sínú rẹ̀. ⁴³ Ó pe àwọn ọmọ ẹ̀yìn rẹ̀, ó sọ fún wọn wí pé, “Lóòótọ́ ni mo wí fún yin pé, tálákà opó yìí fi sínú àpótí ìṣúra ju gbogbo àwọn ìyókù to sọ sínú rẹ lọ. ⁴⁴ Nítorí pé, àwọn ìyókù mú nínú ọ̀pọ̀ ìní wọ́n wá. Sùgbọ́n ní ti opó yǐ, nínú àìní rẹ̀, ó fi gbogbo ohun tí ó ní sílẹ̀.