¹ ردوا بالكم من المحايلة يا خاوتي, و انتوما في الايمان تاعكم بالرب يسوع المسيح, رب المجد, ما تديروش المحايلة. ² اذا كان دخل عندكم واحد لابس الذهب و قش مليح, و ثاني دخل واحد فقيرو قشوا موَسخ, ³ وكي شفتوا هاذاك اللي لابس مليح و قلتولوا: "ارواح اقعد هنا خير". و قلتوا للفقير: "انت روح اقعد لهيك" و الا : "اقعد في لرض". ⁴ موش لو كان تخمموا مع ارواحكم تلقاو باللي تخمامكم شر؟ ⁵ اسمعوا يا خاوتي لعزاز: يا خي الله هو اللي خاير الفقراء تع هاذي الدنيا باه يكونوا اغنياء في الايمان, و يكونوا وراثة للملكوت اللي وعد بيه الناس اللي يحبوه؟ ⁶ و انتوما تحقروا الفقير. ياخي الاغنياء همّا اللي يتسلطوا عليكم و يكركروكم للشروعات؟ ⁷ و همّا اللي يعايروا في الاسم لمخير اللي تسميتوا بيه؟ ⁸ و اذا كنتوا تمشيو بشريعة الشرايع كاملة اللي في لكتاب اللي تقول: "تحب قريبك كيما تحب روحك", تكونوا عملتوا مليح. ⁹ بالصح اذا كنتوا تحايلوا بين الناس. توليو تديروا في المعصية, و يحكم عليكم شَرْع الله على خاطر خالفتوه. ¹⁰ على خاطر اللي يدير كل واش يقول عليه شرع الله, و يخالف غير حاجة وحدة برك, يسمى خالف شرع الله كامل. ¹¹ على خاطر اللي قال: "ما تزنيش", قال ثاني: "ما تقتلش". اذا كان ما زنيتش بالصح قتلت, تسمى خالفت شرع الله. ^{12 13} اهدروا و اعملوا كيما الناس اللي راح يحاكمهم الله بالشَرْع تاع الحرية. اللي ما يرحمش غيرو حتى الحكم ما يرحموش, و الرحمة تغلب الحكم. الايمان و لعمال ¹⁴ واش الفايدة يا خاوتي اذا كان واحد يقول باللي عندو الايمان بالصح ما عندوش لفعايل تاع الايمان, كيفاه يقدر الايمان كيما هاذا يمنعوا؟ ¹⁵ اذا كان اخ و الا اخت عرايا و ما عندهم ما ياكلوا, ¹⁶ واش الفايدة كي يجي واحد منكم و يقول لهم: "روحوا متهنيين, ادفاو و اشبعوا",بالصح ما يعطيهم حتى شيء يستنفعوا بيه؟ ¹⁷ هكا ثاني حتى الايمان, اذا ما كانتش عندو فعايل تبينوا, يكون هو في ذاتو ميت. ¹⁸ بالصح كي الواحد يقول: "انت عندك ايمان, اما انا عندي لفعايل. وريلي ايمانك بلا فعال, وانا نوريك فعايلي بإيماني". ¹⁹ راك تامن باللي الله واحد. تعمل مليح. حتى الشواطن يامنوا و يترعدوا من الخوف! ²⁰ تحب تعرف يا الانسان الفاني كيفاه يكون الايمان ميت بلا فعايل؟ ²¹ جدنا براهيم ياخي تبرر بالافعال تاعو, نهار اللي قدم اسحاق ولدو على المذبح؟ ²² تشوف باللي الايمان عندو لفعايل تاعو, و بالفعال يتم الايمان و يولي كامل, ²³ و هكا تمم المكتوب عليه في لكتاب اللي يقول: "كي امن براهيم بالله اعطاه الله البر على جال ايمانو", و تسمى ابراهيم الخليل. ²⁴ شفتوا كيفاه يتبرر الانسان بالفعال تاعو , موش برك بالايمان وحدو. ²⁵ و حتى راحاب الزانية ثاني, حتى هي تبررت بالفعال, نهار اللي ضيْفت الرسل عندها و من بعد هرْبتهم في طريق اُخرى؟ ²⁶ هكا كيما يكون لبدن اللي بلا روح ميت, يكون ثاني الايمان اللي بلا فعال ميت.