1 ¹ Исы́с дэ дола́ дэвэса́, сы́р сэнда́рья рикирэ́нас саро́ дэ пэ́скирэ васта́, пэ пху́в наˍисы́с со тэˍха́. И ґия́ ману́ш Вифлеемо́стыр Иудаскирэсты́р тэˍдживэ́л пэ маля́ Моаво́скирэ – ёв и лэ́скири ромны́ и ду́й чяворэ́ лэ́скирэ. ² И кхарэ́н адалэ́с манушэ́с Елимеле́хо, ромня́ лэ́скирья кхарэ́н Ноеми́нь, а чяворэ́н Махло́но и Хилео́но, ефрафя́не Вифлеемо́стыр Иудаскирэсты́р. Явнэ́ ёнэ́ пэ маля́ Моаво́скирэ и ачнэ́пэ одо́й. ³ И мэя́ Елимеле́хо, Ноеминя́ко ро́м, и ачя́пэ ёй дуе́ чяворэ́нса. ⁴ И лынэ́ ёнэ́ ромне́н моавитянкэ́н – екха́ кхарэ́н О́рфа, а авирья́ Ру́фь. Дживэ́нас ёнэ́ одо́й варика́й дэ́ш бэ́рш. ⁵ И мэнэ́ ёнэ́ сарэ́ ду́й Махло́но и Хилео́но. И ачя́пэ адая́ ромны́ би чяворэ́нґэро и би ромэ́ско. ⁶ И скэдыя́пэ ёй пэ́скирэ борье́нса и ґия́ палэ́, мале́ндыр Моаво́скирэндыр адя́кэ, сы́р шундя́ пэ маля́ Моаво́скирэ, со Дэвэ́л наˍачядя́ Пэ́скирэн манушэ́н и бичядя́ лэ́нґэ маро́. ⁷ И выґия́ одолэ́ штэто́стыр, ка́й дживэ́нас ёй и ла́кирэ ду́й борья́. И ґинэ́ ёнэ́ пи́р дро́м, тэˍрисё́н пэ пху́в Иуда́скири. ⁸ И пхэндя́ Ноеми́нь пэ́скирэнґэ борье́нґэ: Джя́нте, рисё́нте сарэ́ ду́й до кхэ́р кэ пэ́скири да́й. Мэ́к дэ́л тумэ́нґэ Дэвэ́л ба́х, сы́р и тумэ́ кэрдэ́ пэ́скирэ ромэ́нґэ и ма́нґэ! ⁹ Мэ́к дэ́л тумэ́нґэ Дэвэ́л, со́б тумэ́ тэˍпопэрэ́н пэ́скэ се́мьи и тэˍавэ́н бахталэ́ пэ́скирэ ромэ́нса! И чямудя́ лэ́н. А ёнэ́ ґадынэ́ ґо́дла и зарондэ́. ¹⁰ И пхэндэ́: “На́т, амэ́ ту́са рисёва́са кэ мануша́ тырэ́”. ¹¹ А Ноеми́нь пхэндя́: “Рисё́нте, мирэ́ чяя́! Па́л со тумэ́нґэ тэˍджя́ ма́нса? Чи явэ́на ма́ндэ чяворэ́, со́б тэˍявэ́н тумэ́нґэ ромэ́нса? ¹² Рисё́нте, мирэ́ чяя́! Джя́нте, па́л одова́, со мэ пураны́ манушны́, со́б тэˍджя́в палэро́м. Сы́р мэ тэˍпхэна́в бы исы́н ма́ндэ патябэ́н дэ одова́, и сы́р мэ тэˍява́в бы дэ адая́ ра́т ромэ́са, и тэˍбияна́в авирэ́н чявэ́н. ¹³ Со тумэ́, дужакирэ́нас бы, сы́р ёнэ́ выбарьё́на? Чи адава́ тумэ́ камэ́н, со́б тэˍна́ˍджян палэро́м? На́т, мирэ́ чяя́, ма́нґэ дрыва́н пхаро́ па́л тумэ́ндэ, па́л одова́ со кэрдя́ ма́нґэ ва́ст Дэвлэ́ско”. ¹⁴ И ґадынэ́ ёнэ́ бари́ ґо́дла и лынэ́ тэровэ́н. И чямудя́ О́рфа пэ́скирья свекруха́, а Ру́фь ачя́пэ ла́са. ¹⁵ И пхэндя́ ёй: Дыкх, рисия́ одоя́ бори́ кэ пэ́скирэ мануша́ и кэ пэ́скирэ дэвэла́. Рисё́в и ту, сы́р рисия́ ёй. ¹⁶ И пхэндя́ Ру́фь: На́ˍуракир ма́н тэˍачява́в ту́т и тэˍна́ˍджяв па́л ту́тэ. Ка́й джя́са ту – дори́к джя́ва и мэ. Ка́й ту лэ́са тэˍдживэ́с – одо́й и мэ ла́ва тэˍджива́в. Тырэ́ мануша́ – мирэ́ мануша́, и тыро́ Дэвэ́л – миро́ Дэвэ́л. ¹⁷ Ка́й ту мэрэ́са – и мэ мэра́ва, и ма́н одо́й ґаравэ́на. Мэ́к Дэвэ́л ма́нґэ кэрэ́ла адя́кэ и адя́кэ, сы́р мэ ачява́ва ту́т екхджиня́. И сы́р мэ мэра́ва, то ачява́ва ту́т. ¹⁸ Удыкхья́ ёй, со Ру́фь камэ́л тэˍджя́л дрыва́н ла́са, то пирья́чя тэˍодракирэ́л ла. ¹⁹ И ґинэ́ ёнэ́ дуйджинэ́, и явнэ́ дэ фо́ро Вифлее́мо. И исы́с адя́кэ: сы́р явнэ́ ёнэ́ до Вифлее́мо, то заракирдя́ па́л лэ́ндэ саро́ фо́ро, и джювля́ ракирэ́нас: “Ада́ Ноеми́нь?” ²⁰ И ёй пхэндя́ лэ́нґэ: “Наˍкхарэ́нте ма́н Ноеми́нь. Кхарэ́нте ма́н Ма́ра, па́л одова́ со джиипэ́н миро́ дрыва́н кирько́ Дэвлэ́стыр. ²¹ Мэ выґиё́м кхэрэ́стыр пэ́скирэ семья́са, а Дэвэ́л ма́н рискирдя́ палэ́ би нисо́ско. Па́л со тэˍкхарэ́н ма́н Ноеми́нь, па́л одова́ сы́р Дэвэ́л ґия́ на́ˍпал ма́ндэ и Ёв кэрдя́ ма́нґэ кирько́ джиипэ́н?” ²² И рисия́ Ноеми́нь, и Ру́фь моавитя́нка, ла́ки бори́, дуйджинэ́ рисинэ́ Моаво́скирэ мале́ндыр. И явнэ́ ёнэ́ до Вифлее́мо, сы́р лынэ́ тэˍскэдэ́ маро́.