9 ¹ А до би́шта шта́рто дэвэ́с адалэ́ско чёнэ́ско, скэдынэ́пэ кхэтанэ́ чявэ́ Израилё́скирэ исы́с сарэ́ до по́сто, и уридэ́ дэ ґоны́тко и́дя, и чивэ́нас пэ пэ́стэ пра́хо пхувья́ко. ² И ро́до Израилё́ско отґия́ сарэ́ндыр манушэ́ндыр. Ёнэ́ вштынэ́ приджиндэ́пэ дэ пэ́скирэ бэзэха́, и адя́кэж до на́ˍлаче ры́нды пэ́скирэ дадэ́нґирэ. ³ И тэрдынэ́ исы́с пэ е́кх штэ́то, и шта́рто коты́р дэвэсэ́ско ґинэ́нас Зако́но Я́хвэ, амарэ́ Дэвлэ́ско, а тэ́нче приджинэ́наспэ до бэзэха́ Дэвлэ́скэ, и поклонинэ́наспэ Я́хвэ, Дэвлэ́скэ пэскирэ́скэ. ⁴ И тэрдынэ́ по вучё́ штэ́то леви́ты, Иису́со, Вани́ё, Кадмии́ло, Шэвани́ё, Вунни́ё, Шэреви́ё, Вани́ё, Хена́но. И ґодлэ́нас барэ́ ґодла́са ко Дэвэ́л пэ́скиро Я́хвэ. ⁵ И пхэндэ́ леви́ты Иису́со, и Кадмии́ло, Вани́ё, Хашавни́ё, Шэреви́ё, Ґо́диё, Шэвани́ё, Пета́хиё: “Вштэ́нте, блаґословля́йте Я́хвэ, тумарэ́с Дэвлэ́с, Саво́ исы́с, исы́н и авэ́ла! И мэ́к ґадэ́н ла́в Тыро́, саво́ вучеды́р сарэ́стыр и барипэ́н Тыро́ нанэ́ ни кэ ко́н! ⁶ Ту – Я́хвэ, Ту е́кх ада́саво, Ту скэрдя́н болыбэ́н, и саро́ со до болыбэ́н и сарэ́н анґелэ́н, и пху́в и саро́ со пэ ла́тэ, мо́рё и саро́ со дэ лэ́стэ. И ту дэ́с сарэ́нґэ джиипэ́н, и а́нґелы ту́кэ поклонинэ́нпэ. ⁷ Ту – Я́хвэ Дэвэ́л, Саво́ выкэдыя́н Аврамо́с и вылыджия́н лэ́с Уро́стыр Халдейсконэ́стыр, и дыя́н лэ́скэ ла́в ‘Авраа́м’, ⁸ и попэя́н лэ́скиро ило́ чячюнэ́са анґи́л Ту́тэ, скэрдя́н лэ́са заве́то, со́б тэˍдэ́с пху́в ка́й дживэ́нас ханане́и, хетте́и, аморе́и, ферезе́и, и иевусе́и, и ґерґесе́и, тэˍдэ́с лэ́скирэ родо́скэ, и Ту зрикирдя́н Пэ́скиро ла́в, па́л адава́ со Ту чячюно́. ⁹ И Ту дыкхья́н дэ саво́ пхарипэ́н исы́с амарэ́ дада́ до Еґи́пто, и шундя́н исы́н ґодлэ́нас пашы́л мо́рё Тростнико́во, ¹⁰ и сыкадя́н Пэ́скири зо́р и ва́ст пэ фараоно́стэ, и пэ сарэ́ндэ бутярнэ́ндэ лэ́скирэндэ, и пэ сари́ пху́в лэ́скири, па́л адава́, со Ту джиндя́н сы́р кэ амэ́ нанэ́ ку́ч отлыджя́наспэ, и Ту гадыя́н Пэ́скиро ла́в, адя́кэ сы́р и дадэвэ́с. ¹¹ И мо́рё Ту роскэрдя́н анґи́л лэ́ндэ, и ёнэ́ проґинэ́ мо́рё пи́р шукипэ́н, а ко́н праста́лас па́л лэ́ндэ, Ту тасадя́н лэ́н сы́р ба́р до баро́ паны́. ¹² И лыджя́сас Ту лэ́н дэвэсэ́са до сто́лбо о́блочно и ратя́кэс до сто́лбо яґа́тыр, саво́ сыкавэ́лас лэ́нґэ дро́м, пи́р саво́ ёнэ́ джя́нас. ¹³ И пэ бэ́рґа Сина́й сґия́н Ту, и ракирэ́сас лэ́нса болыбна́стыр, Ту дыя́н лэ́нґэ сэ́нды чячюнэ́, и зако́ны, сы́р тэˍдживэ́н, и лаче́ свэ́нта лава́, савэ́ Ту припхэндя́н. ¹⁴ И па́л суббо́та свэ́нто Тыри́ Ту откэрдя́н лэ́нґэ, и саро́, со Ту припхэндя́н, и Зако́но дыя́н Ту вастэ́са Моисеевоскирэ́са, слуґа́са Тырэ́са. ¹⁵ И маро́ болыбна́стыр дэ́сас лэ́нґэ тэˍха́н сы́р ёнэ́ исы́с бокхалэ́, и паны́ барэ́стыр дыя́н лэ́нґэ сы́р ёнэ́ закамнэ́ тэˍпье́н, и Ту пхэндя́н тэˍджя́н тэˍзалэ́н пху́в, па́л сави́ Ту солахадя́н тэˍдэ́с лэ́нґэ. ¹⁶ Нэ амарэ́ дада́ исы́с пхуткирдэ́, и барунэ́ илэ́нса, и нэ шунэ́нас лава́ Тырэ́. ¹⁷ И наˍскамнэ́ тэˍшунэ́н и тэˍрипирэ́н, ры́нды савэ́ Ту кэрэ́сас анґи́л лэ́ндэ, и ёнэ́ закэрдэ́ пэ́скирэ илэ́, и выкэдынэ́ шэралэ́с, со́б ёв тэˍзалыджя́л лэ́н до ра́бство. Нэ ту – Дэ́вла простинэ́с, дэ́с лачипэ́н и ми́лость, Ту́тэ баро́ вырикирибэ́н и чячюно́ камлыпэ́н, и Ту наˍачядя́н лэ́н. ¹⁸ И сы́р ёнэ́ кэрдэ́ пэ́скэ сумнакунэ́с ґурувэ́с и пхэндэ́: ‘Адава́ Дэвэ́л тыро́, саво́ вылыджия́ ту́т Еґипто́стыр’ и дрыва́н холякирэ́нас Ту́т, ¹⁹ нэ кэ Ту ковло́ ило́ и Ту наˍачядя́н лэ́н дэ пусты́ня. И сто́лбо о́блочно наˍзалэ́сас лэ́ндыр дэвэсэ́, со́б тэˍлыджя́л лэ́н пи́р дро́м, и сто́лбо яґа́са ратя́кэс, со́б тэˍсыкавэ́л, дро́м пи́р саво́ ёнэ́ тэˍджя́н. ²⁰ И ду́хо Тыро́ лачё́ дыя́н Ту, со́б тэˍсыклякирэ́с лэ́н, и ма́нна Тыри́ наˍотлыя́н лэ́ндыр, и паны́ дэ́сас лэ́нґэ, со́б ёнэ́ тэˍпье́н. ²¹ И сара́нда бэ́рш чялякирэ́сас Ту лэ́н дэ пусты́ня. И саро́ со трэ́би лэ́ндэ исы́с. И́дя лэ́нґири наˍчинэ́ласпэ, и гэра́ лэ́нґирэ наˍшулё́нас. ²² И Ту дыя́н лэ́нґэ ца́рство и манушэ́н, и ёнэ́ залынэ́ пху́в Сиґоно́скири, и пху́в царё́ски Есевоно́скири, и пху́в О́ґо, царё́скири Васано́скири. ²³ И Ту дыя́н лэ́нґэ чявэ́н дрыва́н бу́т, сы́р черґэня́ до болыбэ́н, и Ту яндя́н лэ́н дэ пху́в, па́л сави́ Ту ракирдя́н лэ́нґирэ дадэ́нґэ, тэˍзалэ́н ла. ²⁴ И явнэ́ чявэ́, и залынэ́ адая́ пху́в, и Ту отдыя́н манушэ́н савэ́ дживэ́на одо́й, хананее́н, и отдыя́н лэ́н и лэ́нґирэн царе́н и сарэ́н манушэ́н савэ́ исы́с дэ одоя́ пху́в, дэ лэ́нґирэ васта́, со́б ёнэ́ тэˍкэрэ́н лэ́нса со камэ́н. ²⁵ И ёнэ́ залынэ́ зоралэ́ фо́ры и пху́в барвалы́, и залынэ́ кхэра́, пхэрдэ́ барвалыпна́са, выґанавдэ́ ганынґэ́нса, виноґрадникэ́нса, и оливконэ́нса садэ́нса и авирэ́нса муритконэ́нса дэмбэ́нса. И ха́нас ёнэ́ и чялё́нас и тхулё́нас, и лэ́нґэ исы́с ку́ч лачипна́стыр. ²⁶ И ёнэ́ наˍкандэ́нас, и ґадэ́наспэ пэ Ту́тэ, обрисинэ́ думэ́са ко зако́но Тыро́, и умарэ́нас пророкэ́н Тырэ́н, савэ́ ракирэ́нас лэ́нґэ, со́б ёнэ́ тэˍпорисё́н кэ Ту, и кэрэ́нас бари́ холы́. ²⁷ И Ту отдэ́сас лэ́н до васта́ лэ́нґирэ враґэ́нґэ савэ́ кэрэ́нас лэ́нґэ ду́кх. И до пхарэ́ дэвэса́ ёнэ́ ґодлэ́нас кэ Ту, и Ту шунэ́сас лэ́н болыбна́стыр, и пи́р Пэ́скири бари́ ми́лость бичявэ́сас манушэ́н савэ́ зракхэ́нас лэ́н враґэ́ндыр. ²⁸ И лэ́ндэ исы́с саро́ ку́ч, ёнэ́ рисё́нас тэˍкэрэ́н бэзэ́х анґи́л Тырэ́ якха́. И ту ачявэ́сас лэ́н до васта́ враґэ́нґирэ, савэ́ исы́с хулае́нса пэ лэ́ндэ. И ёнэ́ порисё́нас и ґодлэ́нас кэ Ту, и Ту шунэ́сас лэ́н болыбна́стыр, и зракхэ́сас лэ́н бу́т мо́лы па́л адава́, со Ту́тэ ковло́ ило́. ²⁹ И ту ракирэ́сас лэ́нґэ, со́б ёнэ́ тэˍрисё́н ко Зако́но Тыро́, нэ ёнэ́ пхирэ́нас пхуткирдыпна́са и наˍшунэ́нас, со Ту припхэндя́н. Сэ́нды Тырэ́ наˍполэ́нас, – савэ́ Ту дыя́н тэˍдживэ́л ману́ш. И ёнэ́ наˍкандэ́нас Ту́т, и наˍобмэкэ́нас пэ́скири мэ́н анґи́л Ту́тэ и наˍшунэ́нас Ту́т. ³⁰ И Ту вырикирэ́сас лэ́н бу́т бэрша́ и ракирэ́сас лэ́нґэ духо́са Пэскирэ́са, бичявэ́сас пророкэ́н Тырэ́н, нэ ёнэ́ наˍкандэ́нас. И Ту отдэ́сас лэ́н до васта́ враґэ́нґэ авирья́тыр пхувья́тыр. ³¹ И пи́р Тыро́ ковло́ ило́ Ту наˍумардя́н лэ́н и наˍачядя́н лэ́н, па́л одова́, со Ту Дэвэ́л дрыва́н лачё́ и ковлэ́ илэ́са. ³² И акана́, Дэвэ́л амаро́, Дэвэ́л баро́, зорало́ и савэ́стыр зджя́л да́р, саво́ ракхэ́л Пэ́скиро ла́в и чячюно́ камлыпэ́н, мэ́к наˍсыкадё́л анґи́л Ту́тэ, саро́ пхарипэ́н, саво́ пасия́ пэ амэ́ндэ, пэ амарэ́ндэ царе́ндэ, пэ амарэ́ндэ шэралэ́ндэ, и пэ рашае́ндэ амарэ́ндэ, и пэ пророкэ́ндэ, и пэ дадэ́ндэ амарэ́ндэ, и пэ сарэ́ндэ манушэ́ндэ Тырэ́ндэ, дэвэсэ́ндыр сы́р исы́с ца́рё дэ Асси́рия кэ адава́ дэвэ́с. ³³ И Ту чячюно́ дэ саро́, со кэрэ́лпэ амэ́нса, па́л адава́ со чячибэ́н кэрэ́сас Ту, а амэ́ кэра́сас бэзэ́х. ³⁴ Амарэ́ ца́ря, и амарэ́ шэралэ́, и амарэ́ рашая́, и дада́ амарэ́ наˍкандэ́нас Зако́но Тыро́, и наˍпришунэ́наспэ ко лава́ Тырэ́, савэ́ Ту ракирэ́сас лэ́нґэ. ³⁵ А ёнэ́ до ца́рство пэ́скиро, до лачипэ́н Тыро́ саво́ дыя́н Ту лэ́нґэ, и дэ бари́ и барвалы́ пху́в сави́ Ту дыя́н лэ́нґэ, наˍкандэ́нас и наˍотрисё́нас пэ́скирэндыр захалэ́ндыр рындэ́ндыр. ³⁶ И амэ́ дадэвэ́с бутярнэ́, и пху́в, сави́ дыя́н Ту амарэ́нґэ дадэ́нґэ, со́б ёнэ́ тэˍха́н и тэˍпье́н ла́тэр – амэ́ бутярнэ́ дэ ла́тэ, ³⁷ и хабэ́н саво́ ёй дэ́л исы́н барвалыпэ́н ва́ж царе́нґэ, савэ́н Ту чивдя́н пэ амэ́ндэ па́л амарэ́ бэзэха́, тэˍавэ́н хулае́нса пэ амэ́ндэ и пэ амаро́ хулаибэ́н. И амэ́ до баро́ пхарипэ́н. ³⁸ И па́л адава́, саро́ амэ́ доракира́спэ па́л чячюнуно́ заве́то и зачина́с лэ́с до лы́л, и чива́с печя́ть, амарэ́ шэралэ́, амарэ́ леви́ты, и амарэ́ рашая́”.