8 ¹ И скэдынэ́пэ сарэ́ мануша́, сарэ́ сы́р е́кх ману́ш, явнэ́ пэ пло́щядь, сави́ исы́с анґи́л Паны́тка Вуда́ра. И пхэндэ́ ёнэ́ Ездра́скэ сыклымарё́скэ тэˍянэ́л лы́л дэ саво́ зачиндя́ Моисе́ё, сы́р Я́хвэ ракирэ́лас Израилё́скэ. ² И яндя́ раша́й Е́здра лы́л и откэрдя́ анґи́л сарэ́ндэ, манушэ́ндэ, муршэ́ндэ и джювле́ндэ, дэ пе́рво дэвэ́с эфта́то чё́н. ³ И ёв ґинэ́лас адава́ лы́л пэ пло́щядь, сави́ исы́с анґи́л Паны́тка вуда́ра, ёв ґинэ́лас утро́стыр кэ па́ш дэвэ́с, анґи́л муршэ́ндэ и джювле́ндэ, и сарэ́ ко́н полэ́лас, и манушэ́нґирэ кана́ исы́с обрисимэ́ тэˍшунэ́н со чиндо́ до Зако́но. ⁴ И тэрдо́ исы́с Е́здра по вучё́ каштуно́ штэ́то саво́ скэрдэ́ мануша́ пхале́ндыр, и тэрдэ́ исы́с па́ш лэ́стэ по пра́во ва́ст Маттфи́ё, и Шэ́мо, и Ана́иё, и У́риё, и Хе́лхиё, и Маа́сеё, а по ле́во ва́ст, Фада́иё, и Мисаи́ло, и Малхи́ё, и Хашу́мо, и Хашбадда́но, Заха́риё, Мешулла́мо. ⁵ И откэрдя́ Е́здра лы́л анґи́л сарэ́ндэ манушэ́ндэ, па́л адава́ со ёв исы́с тэрдо́ вучеды́р сарэ́ндыр. И сы́р ёв, откэрдя́ лы́л тэ́нче сарэ́ мануша́ вштынэ́. ⁶ И тэ́нче Е́здра прославиндя́ барэ́ Дэвлэ́с Я́хвэ, и сарэ́ мануша́ ракирэ́нас: “Ами́нь Ами́нь”, ґадэ́нас пэ́скирэ васта́ упрэ́. И Манґэ́наспэ ёнэ́ и поклониндэ́пэ анґи́л Я́хвэ кэ пху́в. ⁷ И Иису́со, и Ванаи́ё, и Шэреви́ё, и Иами́но, Акку́во, Шавта́ё, Ґо́диё, Маа́сеё, Кли́то, Аза́риё, Иозава́до, Хана́но, Фела́иё и леви́ты роспхэнэ́нас манушэ́нґэ Зако́но Моисеё́ско. И мануша́ исы́с тэрдэ́ пэ пэ́скирэ штэ́ты. ⁸ И ґинэ́нас ёнэ́ со исы́с чиндо́ до лы́л, Зако́но Дэвлэ́ско и роспхэнэ́нас лэ́с адя́кэ, со́б тэˍполэ́н сарэ́ мануша́. ⁹ И пхэндя́ Нееми́я сарэ́ манушэ́нґэ, саво́ исы́с тиршафо́са, и раша́й сыклыма́рё Е́здра и леви́ты, савэ́ роспхэнэ́нас манушэ́нґэ: “Адава́ дэвэ́с – свэ́нто ва́ш амарэ́скэ Дэвлэ́скэ Я́хвэ, на́ˍровэн дадэвэ́с”. Ёв пхэндя́ адава́, со сарэ́ мануша́ ровэ́нас сы́р шунэ́нас, со исы́с чиндо́ до Зако́но. ¹⁰ И пхэндя́ ёв лэ́нґэ: “Джя́нте, ха́нте тхулыпэ́н, и пье́нте ґудлыпэ́н, и бичявэ́нте хабэ́н одолэ́нґэ, конэ́стэ нанэ́, со тэˍха́н, па́л одова́, со свэ́нто адава́ дэвэ́с ва́ш амарэ́скэ Дэвлэ́скэ. И на́ˍровэнте па́л одова́ со, ло́ш сави́ дэ́л Я́хвэ – адава́ исы́н зо́р тумари́”. ¹¹ И леви́ты манґэ́нас манушэ́н тэˍна́ˍровэн и ракирэ́нас: “Пирьяче́н па́л адава́, со дэвэ́с дадэвэ́с свэ́нто. И на́ˍровэнте!” ¹² И ґинэ́ сарэ́ мануша́ тэˍха́н, и тэˍпье́н и тэˍдэ́н авирэ́нґэ, и исы́с мануша́ дэ бари́ ло́ш, па́л одова́, со полынэ́ лава́ савэ́ лэ́нґэ роспхэнэ́нас. ¹³ Пэ ави́р дэвэ́с шэралэ́ родо́скирэ, рашая́ и леви́ты, скэдынэ́пэ ко сыклыма́рё Е́здра, со́б тэˍсыклё́н со зачиндо́ до Зако́но. ¹⁴ Ёнэ́ проґиндэ́ до лы́л со пхэндя́ Я́хвэ вастэ́са Моисеевоскирэ́са, со́б сарэ́ чявэ́ Израилё́скирэ тэˍдживэ́н дэ ша́тры по свэ́нко до эфта́то чё́н ¹⁵ и со́б тэˍракирэ́н дэ сарэ́ фо́ры Иерусалимо́скирэ лава́: “Джя́нте пэ бэ́рґа и янэ́н кашта́ маслина́тыр, и кашта́ авирья́тыр маслина́тыр, и кашта́ мирта́тыр, и кашта́ пальма́тыр, и авирэ́ндыр каштэ́ндыр, со́б тэˍкэрэ́н ша́тры сы́р зачиндо́”. ¹⁶ И ґинэ́ мануша́, и яндэ́ кашта́, и скэрдэ́ ша́тры упра́л пэ пэ́скирэ кхэра́, и до ґря́ды пэ́скирэ, и до ґря́ды Дэвлэ́скиро Кхэрэ́ско, и пэ пло́щядь па́ш вуда́ра Паны́тка, и пэ пло́щядь Ефремо́воски. ¹⁷ И кэрдэ́ сарэ́ мануша́ савэ́ явнэ́ плено́стыр ша́тры, и дживэ́нас дэ лэ́ндэ. Адя́кэж сы́р чявэ́ Израилё́скирэ наˍкэрэ́нас адава́, дэвэсэ́ндыр Иисусо́скирэндыр, саво́ исы́н чяво́ Навино́скиро, кэ адава́ дэвэ́с. И исы́с бари́ ло́ш кэ сарэ́ мануша́. ¹⁸ И ёв ґинэ́лас лылэ́стыр Зако́но Дэвлэ́скиро дэвэ́с до дэвэ́с, саро́ курко́. И ёнэ́ кэрэ́нас свэ́нко эфта́ дэвэ́с, а до охто́то дэвэ́с – пролыджя́нас адава́ свэ́нко сы́р исы́с чиндо́ до лы́л.