12 ¹ И ґэ́на рашая́ и леви́ты, савэ́ явнэ́ Зоровавелё́са, чявэ́са Салафиило́сккирэса, и Иисусо́са: Сера́иё, Иереми́я, Е́здра, ² Амари́я, Маллу́хо, Хатту́шо, ³ Шэха́ния, Реху́мо, Меремо́фо, ⁴ И́ддо, Ґиннефо́ё, Ави́ё, ⁵ Миями́но, Маади́ё, Ви́лґо, ⁶ Шэма́иё, и Иоиари́во, Иеда́иё, ⁷ Са́лло, Амо́ко, Хе́лкиё, Иеда́иё. Ада́ шэрало́ рашае́нґирэ и пшала́ лэ́нґирэ до дэвэса́ Иисусо́скирэ. ⁸ И леви́ты: Иису́со, Бинну́ё, Кадмии́ло, Иу́да, Матфа́ния, ёв и пшала́ лэ́скирэ исы́с шэрало́ пи́р ґиля́ Дэвлэ́скэ. ⁹ И Бакбуки́ё, и Унниё́, пшала́ лэ́нґирэ, исы́с тэрдэ́ пашы́л лэ́ндэ и исы́с шэралэ́са по хо́ро саво́ баґа́лас. ¹⁰ И Иису́со да́д Иокимо́ско, и Иоки́мо да́д Елияшыво́ско, и Елияшы́во – Иоиа́да, ¹¹ и Иоиа́до да́д Ионафано́ско, и Ионафа́но да́д Иаддуё́ско. ¹² До дэвэса́ Иокимо́скирэ исы́с рашая́, шэралэ́ родо́скирэ: Сераиё́стыр – Мераи́ё, Иеремиё́стыр – Хана́ниё, ¹³ Ездра́стыр – Мешулла́мо, Амариё́стыр – Иохана́но, ¹⁴ Мелухо́стыр – Ионафа́но, Шэваниё́стыр – Ио́сифо, ¹⁵ Харимо́стыр – А́дно, Мераиофо́стыр – Хе́лкия, ¹⁶ Иддо́стыр – Заха́рия, Ґиннефоно́стыр – Мешулла́мо, ¹⁷ Авиё́стыр – Зихри́ё, Миниамино́стыр. Моадиё́стыр – Пилта́ё, ¹⁸ Вилґо́стыр – Шамму́ё, Шэмаиё́стыр – Ионафа́но, и ¹⁹ Иоиариво́стыр – Мафна́ё, Иедаиё́стыр – Уззи́ё, ²⁰ Саллаё́стыр – Калла́ё, Амоко́стыр – Еве́ро, ²¹ Хелкиё́стыр – Хашави́я, Иедаиё́стыр – Нафанаи́ло. ²² Леви́ты до дэвэса́ Елияшыво́скирэ, Иоиадо́скирэ, и Иоханано́скирэ, и Иаддуё́скирэ исы́с зачиндэ́ шэралэ́нса родо́скирэнса, и рашая́, сы́р Да́риё исы́с царё́са дэ Пе́рсия. ²³ Чявэ́ Левиё́скирэ, шэралэ́ родо́скирэ, исы́с зачиндэ́ до лы́л саво́ лыджя́ласпэ дэ одолэ́ дэвэса́, и ко дэвэса́ Иоханано́скирэ, саво́ исы́н чяво́ Елияшыво́ско. ²⁴ И шэралэ́ левитэ́нґирэ: Хашави́ё, Шэреви́ё, и Иису́со, чяво́ Кадмиило́ско, и пшала́ лэ́нґирэ тэрдынэ́ му́й ко му́й и лынэ́ тэˍшарэ́н, и тэˍпхэнэ́н наи́с, пи́р лава́, савэ́ припхэндя́ Дави́до, саво́ исы́н Дэвлэ́скиро ману́ш ёнэ́ славиндэ́ Дэвлэ́с е́кх па́л екхэ́стэ. ²⁵ Матфа́ниё и Бакбуки́ё, Ова́диё, Мешулла́мо, Талмо́но, Акку́во – исы́с тэрдэ́ тэˍракхэ́н вуда́ра. ²⁶ Ёнэ́ исы́с до дэвэса́ Иоакимо́скирэ, савэ́ исы́н чяво́ Иисусо́ско, чявэ́ско Иоседеко́ско, и до дэвэса́ Неемиё́скирэ, саво́ исы́с шэрало́ пи́р фо́ры, а Е́здра исы́с, раша́са и сыклымарё́са. ²⁷ Сы́р явья́ дэвэ́с тэˍсвэнтсынэ́ сте́на до Иерусали́мо кхардэ́ левитэ́н сарэ́ндыр штэтэ́ндыр, со́б тэˍявэ́н до Иерусали́мо, и тэˍкэрэ́н свэнтсымо́ лоша́са, и бахталэ́ илэ́са, ґиле́нса, кимвалэ́нса, арфэ́нса, и лирэ́нса. ²⁸ И скэдынэ́пэ чявэ́ савэ́ баґэ́н Иерусалимо́стыр и ґавэ́ндыр Нетофафо́скирэндыр, ²⁹ и БефˉҐаґґилґло́стыр, и мале́ндыр Ґевоскирэ́ндыр и Азмавето́скирэндыр, па́л одова́ со чявэ́ савэ́ баґэ́н кэрдэ́ кхэра́ до ґава́ пашы́л Иерусали́мо. ³⁰ И жужакирдэ́пэ рашая́ и леви́ты, и жужакирдэ́ манушэ́н и вуда́ра, и сте́на форо́ски. ³¹ И мэ скэдыё́м Иудейсконэ́н шэралэ́н упрэ́ пэ сте́на, и чивдё́м ду́й барэ́ хо́ры тэˍґадэ́н Дэвлэ́скири сла́ва, и тэˍджя́н пи́р сте́на пи́р пра́во ва́ст ко Наво́зна вуда́ра. ³² И ґия́ па́л лэ́ндэ Ґошаи́ё и па́ш шэралэ́ Иуде́йка, ³³ и Аза́рия, Е́здра, и Мешулла́мо, ³⁴ Иу́да, и Вениами́но, И Шэма́иё, Иерими́я, ³⁵ и чявэ́ рашае́ґирэ, баґа́нас до тру́бы: Заха́рия, чяво́ Ионафано́ско, чяво́ Шэмаиё́ско, чяво́ Матфа́ниёско, чяво́ Михеё́ско, чяво́ Закхуро́ско, чяво́ Асафо́ско, ³⁶ и пшала́ лэ́скирэ – Шэма́иё, и Азарии́ло, Миллала́ё, Ґилала́ё, Маа́ё, Нафанаи́ло, и Иу́да, Хана́ниё и баґэ́нас по инструме́нты ґиля́ Давидо́скирэ, саво́ исы́н ману́ш Дэвлэ́скиро, и Е́здра, сыклыма́рё, джя́лас анґи́л амэ́ндэ, ³⁷ пашы́л вуда́ра Источнико́скирэ гадыя́мнэ упрэ́ до фо́ро Давидо́скиро, ко вуда́ра Паны́тка. ³⁸ И ави́рто хо́ро саво́ ґадэ́лас Дэвлэ́скири сла́ва, и джя́лас по ле́во ва́ст, и мэ па́л лэ́ндэ, и па́ш мануша́ ма́нса, пи́р сте́на башня́тыр Бовэ́скирьятыр кэ сте́на буґлы́, ³⁹ и вударэ́ндыр Ефримо́скирэндыр, и пашы́л вуда́ра пуранэ́, и пашы́л вуда́ра Мачи́тка и пашы́л ба́шня Хананело́ски, и ба́шня Меао́скири, и ко вуда́ра Бакры́тка, и тэрдынэ́ ёнэ́ пашы́л вуда́ра Темни́чна савэ́ лыджя́н ко дво́ро Дэвлэ́скиро. ⁴⁰ И тэрдынэ́ пашы́л Кхэ́р Дэвлэ́скиро сарэ́ ду́й хо́ры и ґадэ́нас сла́ва Дэвлэ́скэ, мэ и бу́т шэралэ́ ма́нса, ⁴¹ и рашая́: Елиаки́мо, Маа́сеё, Миниами́но, Михе́ё, Елиоена́ё, Заха́риё, Хана́ниё, трубэ́нса, ⁴² и Маа́сеё, и Шэма́иё, и Елиаза́ро, и Иззи́ё, и Иохана́но, и Малхи́ё, и Ела́мо, и Езе́ро. И баґэ́нас, а Израхи́ё исы́с лэ́нґиро шэрало́. ⁴³ И янэ́нас ёнэ́ до одова́ дэвэ́с бу́т жэ́ртвы и исы́с лошалэ́, па́л одова́, со Дэвэ́л дыя́ лэ́нґэ бари́ ло́ш. Адя́кэж и джювля́, и чяворэ́ исы́с лошалэ́, и ду́р шунды́ ло́ш сави́ исы́с до Иерусали́мо. ⁴⁴ И до одова́ дэвэ́с выкэдынэ́ манушэ́н савэ́ лэ́на тэˍдыкхэ́н па́л штэ́ты ка́й ракхэ́нпэ ловэ́, хабэ́н, зёрно́, и дэ́што коты́р, саво́ мануша́ янэ́нас пэ́скирэндыр мале́ндыр савэ́ исы́с пашы́л фо́ро, сы́р зачиндо́ до Зако́но ва́ш рашае́нґэ и левитэ́нґэ. Па́л одова́, со мануша́ Иуде́йска исы́с лошалэ́ па́л ры́нды савэ́ кэрэ́нас рашая́ и леви́ты. ⁴⁵ И лыджя́нас слу́жба пэ́скирэ Дэвлэ́скэ и жужакирэ́наспэ анґи́л Лэ́стэ, и одолэ́ ко́н баґэ́л, и ко́н ракхэ́л вуда́ра, кэрэ́нас пэ́скиро ры́ндо, дя́кэ сы́р пхэндя́ Дави́до, и Соломо́но чяво́ лэ́скиро. ⁴⁶ Дя́кэ сы́р до дэвэса́ Давидо́скирэ и Асафо́скирэ гара́ исы́с чивдэ́ шэралэ́ пэ одолэ́ндэ ко́н баґэ́л, и ґиля́ савэ́ ґадэ́н Дэвлэ́скиро ла́в. ⁴⁷ И саро́ Изра́илё до дэвэса́ Зоровавелё́скирэ и до дэвэса́ Неемиё́скирэ лыджя́нас дэвэ́с до дэвэ́с коты́р одолэ́нґэ ко́н баґэ́л и ко́н ракхэ́л вуда́ра адя́кэж лыджя́нас свэнтсымо́ левитэ́нґэ, а леви́ты лыджя́нас свэнтсымо́ чявэ́нґэ Аароно́скирэнґэ.