10 ¹ И лыла́ пэ савэ́ исы́с печя́ть: Нееми́я, тирша́фо, чяво́ Ґахалиё́ско, и Седе́кия, ² Сера́ия, Аза́риё, Иереми́я, ³ Пашху́ро, Амари́я, Ма́лхия, ⁴ Хатту́шо, Шэвани́я, Ма́ллхо, ⁵ Хари́мо, Меремо́фо, Ова́дия, ⁶ Дании́ло, Ґиннефо́но, Вару́хо, ⁷ Мешулла́мо, Ави́я, Миями́но, ⁸ Маази́я, Виґа́я, Шэма́ия, ада́ рашая́. ⁹ левитэ́н: Иису́со, чяво́ Азаниё́ско, Бину́ё чявэ́ндыр Хенададо́скирэндыр, Кадми́ло, ¹⁰ и пшала́ лэ́нґирэ: Шэвани́я, Ґо́дия, Кли́то, Фела́ия, Хана́но, ¹¹ Ми́хо, Ре́хо, Хашави́я, ¹² Закху́ро, Шэреви́я, Шэвани́я, ¹³ Ґо́дия, Вани́я, Венику́я. ¹⁴ Шэралэ́ манушэ́нґирэ: Паро́шо, ПахафˉМоа́во, Ела́мо, За́тто, Вани́я, ¹⁵ Вану́ё, Азґа́ро, Бева́ё, ¹⁶ Адо́ния, Биґва́ё, Ади́но. ¹⁷ Ате́ро, Езе́кия, Азу́ро, ¹⁸ Ґо́дия, Хашу́мо, Беца́ё, ¹⁹ Хари́фо, Анафо́фо, Нева́ё, ²⁰ Маґпиа́шо, Мешулла́мо, Хези́ро, ²¹ Мешэзаве́ло, Садо́ко, Иадду́ё, ²² Фела́тия, Хана́но, Ана́ия, ²³ О́сия, Хана́ния, Хашшу́во, ²⁴ Лохе́шо, Пи́лхо, Шошэ́ко, ²⁵ Реху́мо, Хаша́вно, Маасе́я, ²⁶ и А́хия, Хана́но, Ана́но, ²⁷ Маллу́хо, Хари́мо, Ваа́но. ²⁸ И ави́рта мануша́, рашая́, леви́ты, ко́н ракхэ́л вуда́ра, ко́н баґэ́л, нефине́и и сарэ́ ко́н порисия́ ко Дэвлэ́скиро Зако́но, лэ́нґирэ ромня́, лэ́нґирэ чявэ́, и чяя́ лэ́нґирэ, и сарэ́ ко́н джинэ́л и полэ́л, ²⁹ кхэтанэ́ пэ́скирэ пшалэ́нса, и барэ́ манушэ́нса, солахавдэ́ тэˍпхирэ́н до Зако́но Дэвлэ́скиро, саво́ исы́с дыно́ вастэ́са Моисеевоскирэ́са, слуґа́са Дэвлэ́скирэса, со́б тэˍракхэ́н, и тэˍдживэ́н, сы́р припхэндя́ Я́хвэ, амаро́ Дэвэ́л, и пи́р Лэ́скирэ зако́ны, сы́р Ёв Пхэндя́, ³⁰ и со́б амэ́ тэˍна́ˍотдас амарэ́н чяе́н манушэ́нґэ авирья́тыр пхувья́тыр и лэ́нґирэн чяе́н тэˍна́ˍлас па́л амарэ́ндэ чявэ́ндэ, ³¹ а ко мануша́ одолэ́ пхувья́тыр, савэ́ янэ́н тэˍбикнэ́н тава́ро и зёрно́ дэ суббо́та, тэˍна́ˍкинэн кэ ёнэ́ дэ адава́ дэвэ́с, и до дэвэ́с сы́р исы́с свэ́нко, и со́б амэ́ тэˍачява́с эфта́то бэ́рш тэˍна́ˍкэрас пэ маля́, и тэˍачява́с банґипэ́н. ³² И сарэ́ амэ́ доракирдя́мпэ тэˍда́с пэ́стыр по шта́р ґра́ммы ру́п до бэ́рш до Кхэ́р амарэ́ Дэвлэ́скэ: ³³ по маро́ саво́ чивэ́н анґи́л Дэвлэ́стэ, пэ саро́ со янэ́н по жэ́ртвенико до дэвэ́с, и саро́ со схачкирэ́н до дэвэ́с, по суббо́ты, пэ нэвэ́ чёна́, пэ сарэ́ свэ́нки, и по свэ́нта ры́нды, и пэ жэ́ртва па́л бэзэ́х тэˍавэ́л жужо́ Изра́илё, и пэ сари́ буты́ ва́ш Кхэ́р амарэ́ Дэвлэ́скиро. ³⁴ И чюрдыя́м амэ́ жре́биё рашая́, леви́ты и мануша́ савэ́ авэ́на тэˍянэ́л кашта́ дэ Дэвлэ́скиро Кхэ́р, конэ́скэ, савэ́ родо́скэ и дэ саво́ дэвэ́с, тэˍянэ́н кашта́ со́б тэˍхачё́л яґ бэ́рш бэршэ́стыр по жэ́ртвенико амарэ́ Дэвлэ́скиро Я́хвэ, сы́р чиндо́ до Зако́но, ³⁵ и со́б тэˍянэ́н пе́рво пло́до амарэ́ пхувья́ко и пе́рво пло́до сарэ́ндыр дэмбэ́ндыр, бэ́рш палэ́ бэ́рш, до Кхэ́р Я́хвэ, ³⁶ и первонэ́н чявэ́н амарэ́н и ското́стыр амарэ́стыр тэˍяна́с сы́р чиндо́ до Зако́но, и первонэ́н барэ́стыр и тыкнэ́стыр ското́стыр тэˍлыджя́с ко рашая́ до Кхэ́р амарэ́ Дэвлэ́скэ. ³⁷ И пе́рво маро́ амаро́ ла́са тэˍяна́с амэ́, и пло́ды сарэ́ндыр дэмбэ́ндыр, ви́но и кси́л, амэ́ ла́са тэˍяна́с рашае́нґэ до Кхэ́р амарэ́ Дэвлэ́скэ, а дэ́што коты́р пхувья́тыр амарья́тыр левитэ́нґэ отда́са. И леви́ты лэ́на тэˍприлэ́н дэ́што коты́р пхувья́тыр дэ сарэ́ фо́ры ка́й амэ́ кэра́с буты́. ³⁸ И авэ́ла левитэ́нса, раша́й чявэ́ндыр Аароно́скирэндыр, саво́ лэ́ла тэˍдыкхэ́л сы́р леви́ты лэ́на тэˍлэ́н дэ́што коты́р. И леви́ты янэ́на дэ́што коты́р пэ́скирэстыр котырэ́стыр до Кхэ́р амарэ́ Дэвлэ́скэ, до штэ́то ка́й саро́ ракхэ́лпэ. ³⁹ Па́л одова́ со дэ адалэ́ штэ́ты ка́й саро́ ракхэ́лпэ лэ́на тэˍзлыджя́н сарэ́ чявэ́ Израилё́скирэ и чявэ́ Левиё́скирэ сарэ́ пло́ды: зёрно́, ви́но, и кси́л. И одо́й свэ́нто посу́да, и рашая́, и ко́н ракхэ́л вуда́ра, и ко́н баґэ́л. И наˍачкира́са амэ́ Кхэ́р амарэ́ Дэвлэ́ско.