¹ Мэ солахав тут ангил Дэвдэстэ и Иисусостэ Христостэ, саво лэла тэ сындякирэл мулэн и джидэн, сыр явэла Ёв , Пэскирэ Царствоса, - ² ракир Лав, сыр тукэ локхэс и сыр ту до пхарипэн. Сыкав по бангипэн, запхэн, подрикир сарэса вырикирибнаса и сыклякирбнаса. ³ Пал дова со авэна дэвэса, со чячуно сыклярибэн тэ прылэн на лэна, нэ пир пэскиро камлыпэн лэна тэ выкэдэн пэскэ сыклярибнарен, савэ ракирэн дова со ёнэ камэн тэ шунэн, ⁴ а чячибнастыр отрисёна, и лэна тэ шунэн парамицы. ⁵ Нэ ту яв годявир дэ саро, пирилыджя пхарипэн, лыджя Дэвлэскиро Лав, кэр буты тыри сыр трэби. ⁶ Пал дова со мэ отдавпэ мирэ Дэвлэскэ всаро, и джиипэн миро подгия кэ дова соп тэ уджял. ⁷ Бут зор причудём мэ кэ буты, саро скэрдём, патябэн зракьём. ⁸ Акана дужакирэл ман Свэнто венцо, саво дэла мангэ амаро Рай дэ дова Дэвэс, чячуно Сындарё. И нанэ екхэскэ мангэ, нэ и сарэнгэ кон до камлыпэн дужакирэл Лэс. ⁹ Мангав тут сыгэс яв кэ мэ, ¹⁰ дякэ сыр Димасо ман ачкирдя, со воскамья адава свэто, и угия дэ Фисалоника, Крискето дэ -Галия, Тито - дэ Далматия. ¹¹ Екх о Лука манса. Маркос лэ пэса, пал дова со ёв мангэ трэби ваш свэнто буты. ¹² Тихикос мэ бичавдём до Ефесо. ¹³ Плащо, саво мэ ачкирдём дэ Троада ко Карпо, ян мангэ сыр лэса тэ джяс, и лыла набистыр, долэ савэ цыпытка. ¹⁴ Александро кузнецо дрыван бут кэрдя мангэ холы, Мэк дэл лэскэ амаро Рай пир лэскирэ рынды. ¹⁵ Лэстыр и ту ракхпэ, пал дова со ёв дрыван гадэласпэ пэ амарэ лава. ¹⁶ Пэ сэндо манса никонэс на сыс, сарэ ман ачкирдэ. Мэк лэнгэ дава на загинэлапэ. ¹⁷ Амаро Рай сыс манса и дыя мангэ зор, соб лав саво мэ ракирав тэ авэл пхэрдо и тэ шунэн сарэ мануша. И Дэвэл зракья ман барэ бидатыр. ¹⁸ Зракхэла ман миро Рай сарэндыр захалэндыр рындэндыр и зракхэла ман ваш Царство Пэскиро Болэбнытко . Лэскэ слава дэ сарэ бэрша, аминь! ¹⁹ Пиридэ поклоно Прискиласкэ и Акиласкэ и до кхэр Онисифороско. ²⁰ Ерасто ачкирдяпэ до Коринфо. А Трофимос мэ ачкирдём насвалэс до Милито. ²¹ Яв кэ мэ ко мразы. Пиридэл тукэ поклоно Еввуло, и Пудо, и Лино, и Клавдия, и пшала. ²² Амаро Рай духоса тырэса. Лачипэн тумэнгэ.