¹ Павло, апостоло Иисусоско Христоско пир воля Дэвлэскири, дякэ сыр ракирдо пал джиипэн, саво дэ Христостэ Иисусостэ,- ² Тимофеёскэ чявэскэ савэс мэ камав. Лачипэн, милость, миро Дэвлэстыр Дадэстыр и Христостыр Иисусостыр амарэстыр Раестыр. ³ Наис пхэнав Дэвлэскэ, савэс гинав мирэ дадэндыр жужэ патываса, сыр напирьячяв тэ зрипирав тут до мангипэн миро рат и дэвэс, ⁴ рипирав тырэ ясва и камав тэ дыкхав тут соб тэ пхэрдёл лошаса миро ило, ⁵ дякэ ж зрипирав чячуно патяибэн дэ тутэ, саво сыс дэ тырэ пхуромнятэ Лоидатэ и кэ тыри дай Евника. Патяв со, ёв и дэ тутэ. ⁶ Пал дава ракирав тукэ тэ росхачкирэс яг дэ даро Дэвлэскиро, саво исын кэ ту сыр мэ чудём васта мирэ пэ тутэ. ⁷ Пал дава со Дэвэл на дыя амэнгэ духо тэ дарас, нэ дыя зор и камлыпэн, и годяса тэ полас. ⁸ Пал адава наладжя тэ роспхэнэс пал амарэ Раестэ Иисусостэ, и мандыр наладжя саво до бэшибэн , нэ пирилыджя пхарипэн пало Лав, зорьяса дэ Дэвлэстэ, ⁹ саво зракья и прикхардя амэн тэ авас свэнта нанэ пир амарэ рынды, нэ дякэ сыр скамья Ёв тэ дэл лачипэн амэнгэ дэ Иисусостэ Христостэ кэ дова сыр сыс скэрдо свэто, ¹⁰ сыкадо кана сыр явья амаро Зракхипнарё, Иисусо Христосо, саво на ачкирла мулэнса, и дэла вечно джиипэн сыр чиндо дэ Лэскиро Лав, ¹¹ ваш саво ман чудя апостолоса, и сыклымарёса саво лыджял Лэскиро лав. ¹² Пал дава и лыджяв адава пхарипэн и на ладжяв, пал дава со джинав, Конэскэ патяндыём, и джинав , со Ёв зорало тэ зракхэл миро залого кэ дова Дывэс. ¹³ Дык пэ чячуно сыклярибэн, саво ту шундян мандыр до патябэн и камлыпэн дэ Христостэ Иисусостэ. ¹⁴ Ракх лачо залого дэ зор Свэнтонэ Духоса, саво дживэл дэ амэндэ. ¹⁵ Ту дава джинэс, со отрисинэ мандыр сарэ, кон дэ Асия, машкир лэндэ Фигело и Ермогено. ¹⁶ Мэк дэл Рай амаро милость до кхэр Онисифороскэ, долэскэ со ёв бут молы ман подрикирдя и мирэ бэшибнастыр на поладжяндыя, ¹⁷ нэ сыр сыс до Римо зоралэс родэлас ман и попэя. ¹⁸ Мэк дэл лэскэ Рай амаро тэ попэрэл милость ко Дэвэл дэ дова Дэвэс. А соса до Ефесо ёв мангэ дыя рада, ту хэдыр джинэс.