¹ Пхуро́м – выкэдынэ́ хуланя́кэ и ла́кирэнґэ чяворэ́нґэ, савэ́н мэ кама́в пи́р чячибэ́н. И на́ˍекх мэ, нэ сарэ́ ко́н джинэ́л чячибэ́н, ² па́л чячибэ́н саво́ исы́н дэ амэ́ндэ, и саво́ авэ́ла амэ́нса ве́чно. ³ Мэ́к авэ́л амэ́нса лачипэ́н, ми́лость и миро́ Дэвлэ́стыр Дадэ́стыр и Иисусо́стыр Христо́стыр, саво́ Чяво́ Дадэ́скиро, до чячибэ́н и камлыпэ́н. ⁴ Мэ дрыва́н лошало́, сы́р уджиндё́м со тырэ́ндыр чяворэ́ндыр исы́н одолэ́ ко́н пхирэ́л до чячибэ́н, сы́р припхэндя́ амэ́нґэ Да́д. ⁵ А кана́ манґа́в ту́т, хуланы́ – нанэ́ нэви́ за́поведь чина́в ту́кэ, нэ одоя́ сави́ амэ́ндэ исы́с гара́ амарэ́ дадэ́ндыр, – со́б амэ́ тэˍкама́с е́кх екхэ́с. ⁶ И ада́ исы́н камлыпэ́н: со́б амэ́ тэˍпхира́с пи́р за́поведь Лэ́скири. Адая́ за́поведь исы́н, сави́ тумэ́ шундэ́ гара́ амарэ́ дадэ́ндыр, со́б тумэ́ тэˍпхирэ́н дэ ла́тэ. ⁷ Па́л адава́ со бу́т хоханэ́ уґинэ́ до свэ́то, и наˍґинэ́н Иисусо́с Христосо́с, саво́ явья́ сы́р ману́ш. Да́саво исы́н хохано́ и анти́христо. ⁸ Дыкхэ́н па́л пэ́стэ, со́б тумэ́ тэˍна́ˍпхаґирэн буты́ одоя́, сави́ амэ́ кэра́сас, а наґра́да пхэрды́ лыя́м. ⁹ Сарэ́, ко́н джял анґи́л и наˍдживэ́л до сыклярибэ́н Христо́скиро, кэ ёв нанэ́ Дэвлэ́с. Ко́н дживэ́л дэ адава́ сыклярибэ́н, кэ одова́ Да́д и Чяво́ исы́н. ¹⁰ Сы́р ко́н явэ́л кэ тумэ́ и наˍянэ́л адава́ сыклярибэ́н, на́ˍприлэнте лэ́с до кхэ́р, и на́ˍподэнте лэ́скэ ва́ст, ¹¹ а ко́н подэ́л лэ́скэ ва́ст одова́ подрикирэ́л лэ́скирэ захалэ́ ры́нды. ¹² Бу́т исы́н со тэˍчина́в тумэ́нґэ вастэ́са до лы́л, нэ наˍкама́м, па́л одова́ со патя́в со ява́ва кэ тумэ́ и поракира́са тумэ́нса му́й ко му́й, со́б ло́ш тумари́ пхэрды́ тэˍавэ́л. ¹³ Покло́но пиридэ́н ту́кэ чяворэ́ тырэ́ выкэдымэ́ пхэня́кирэ.