¹ ጊታይ ባሪዮ እድዮጝ ኣኩሉኬ እንካ እያንሼ ሃምካ መንፈስካ ኣኩሉክ ኦኬ እባጄንካ ኣኩሉክ ጌጳሲዬን ውርካ ዋድማካ ባሪዮዬ ጳውሎስ እን ኣይ ሐዋርያካ ኢየሱስ ክርስቶሱጝ፤ ² እምነት ኔኒዬ ኦኬ እባጄን ኔኒዬ ካርሲኬ ኦባዬ ኣምላክ እን ማር ሾራሺኔኑጝ ከኦካ ሌሜንካ ቦናን ከዻቆካ ቦን ጮል እን ሁሉኮጝ ሃኦካ ቃቦ ሹቃ። ³ እሺ ከሹ እን ቱምዮጝ ከእንካ ዻቆ ጉዋዩጝ ከኤርጎካ ባሪዮ ከታካ ኦኬ ሜይሺኔን እን ጌልቅምሺኔ ኣኑጝ ሻማ ክያጃ ኔኒ ጃ። ⁴ ከእን ኣይኬ ኡዋው ፓይላጝ ናንዳካ እን ኣይ ውዋ ናኒካ እምነቱጝ፤ ናንዳካ ቲቶ፣ ከባሪዮ ሹኔ፣ ከእን ኣይካ ዻዓሾ ጉዋዩዻ ከኢየሱስ ክርስቶስ ዻዹጝኔኔ ዎፖዬ ካኣይባ። {ቲቶ ከኦይን ኣኒኔ ቀርጤስ ጌጳሞ እን ኔኒ ኣኖጝ} ⁵ ሃኦቼ እን ቀርጤሱጝ ኦይ ካኒ ማሬ ኣሽክሼኑጝ ከኣሽክሼባዬ ከእያይ ሃሜይሼ እኑጝ ኦጉዋይካ ከተማጝ ከጌጳሲ ውር ጌጵሹጋኔ ጊያ። ⁶ ውር ጌጵሹጉ እን ማር ዻባሞ ኣኔኑጝ፣ ኡማካ ኚያጝ ክየም፣ ሃንታ ኔኒዻ ውርካ ይሁኔኔ [እያኒሺሼን] ወይ ከእን ማሬ ዋይሺኔኑጝ ካማቲባ ጊታኬናካ ማሬ ሮጝ ጊዬይ ቲቴን። ⁷ ኤጲስ ቆጶስ ከእያይ ጋዬ ውርካ ኤልቅሞካ ዋድማካ ባሪዮጝ ካኣዬ ኬናካ ማሬ ዻብሺዬኑጝ ሁሉኩሼባ፤ ይንዻ ካኣዬ ውርካ ቃያጝ፣ ካኣዬ ውርካ ጃካማጝ፣ ካኣዬ ውርካ ጮዩጝ፣ ካኣዬ ውርካ ዋራቄ ከጉዋር እን ማር ልኪ ኣዬን ካኣዬ ኬናካ ሪሺሼ ሃምካ ኦይካ ጌዬጵኑጝ ሁሉኩሼኬን። ⁸ ከኦካ ይን ሳጊ ውር ኬናካ ቾቺንሺ ኮማና፣ እንካ ናሺ ኦይን ኣይ ሹቃ፣ ኬና ኡዋሩጝ እሺ ኤምኑ፣ ውር ሹቃ፣ ይሁኔን ካኣዬካ ኣጅሺሼኑጝ ሁሉኩሼባ። ⁹ ከቁዋቅትሼ ዶክ ከእርሮ ኬና ኣይ ልኪዬ ውር ጊታይ ሚኔ እርሮጝ ካኖኩዮጝ ከእያይ የእርርዮጝ ከክያጃ እን ጌርምኖጝ ካኣዬ ኬናካ ቁዋቅትሾጝ ኣኔባ። ¹⁰ ውር ጊታይካ ሴሶጝ፣ ጊታይ ሃሳወኔ ጆል ሃሳዋካ ማሜ ጊታይ ኣይካ ቱዋኒኔኔ ውር ጁዋኑ ኣኔባ፤ ሳጊዻ ጊታጝ ኣኔን ከውር ጊታይ ቆሮጝ። ¹¹ ጊታጝ ሹውይ ሻምሼን ሁሉኩሼባ፤ ናንዳካ ከጉዋር እን ማር ልክ ኣዬኑጝ ሺጝ ናንዳካ ኦኬ ጌዬኔ እን እርርሲዬን ካማርሼ እንግን ሁሉኩሼኑጝ ከእርርሲዬን ጋኔን ውር ጶሮክ ጊዬይ ሄክሲዬን። ¹² v 12 ከኦካ ውርካ ቶካ ባሪዮ ጊዬይ ክየም ሃሳው ናንዳካ እንግንያጝ፣ «ውርካ ቀርጤስ ሹ ጮል ሃውርካ ሾሮ፣ ሺጛ ሃዳቢ ጋራኔ ቶልታ ድቃኔ። ¹³ ማኛሞጝ ሃኣኩሉክ፤ ዬ ጎሪ እንግን ሹቃ፤ ይንዻ እምነት እን ኣይ ልኩጝ ካኣኒኔ ኦግዬይዬ ¹⁴ ሃሳዋካ ማም ጊታይካ አይሁድ ወይ ካማር ኤርጎካ ውር ጊታይ ኣኔን ከኦካ እን ኣይ ኣኩሉክ ዹክ ዋዬኔ ጊያ። ¹⁵ ናንዳካ ውር ጊታይ ኣይ ጫንቃሉጝ ኦኬ ፓይላ ሃጫንቃል፤ ዬ ናንዳካ ጊታይ ኣሽክዬን ኦኬ ጋራዬ ማር ኣምኒዬኔ ኦኬ ኣይ ጫንቃል ክየምጵንዻ ኣኔኬን፤ ፕርዻ ሹቦ ጊዬይዬ መንፈስ ጊዬይዬ ሃኬና ኣሽክዬን ኦኬ ጋራ። ¹⁶ ሺጜንባ ሃእባጃያ ባሪዮ ኣይባዬ ከኦግታይ ጋሽክዮጝ ዴጪሼባ እንግን፣ ሃጊታይ ኣይካ ሚኒሺኔኔ፣ ጊታይ ማር ዋይሺኔኔ ጊታይ ማር ናንዳካ ዋድማ ሹቃ ሄክዬኔ።