¹ ከእን ኣይ ውርካ ቁምኔንካ ኢየሱስ ክርስቶሱጝ ከጳውሎሴ ከጪኒጌን ጉዋዩ ጢሞቴዎሴ፤ ናንዳካ ውር ቁዋቃ እን ኣይካ ናሺዺ ጉዋዩዬ ናንዳካ ፊሞና እን ኣሽክዬን ከኡዋወ፣ ² ናንዳካ ጪኔ እንጉዋዩካ እጛሹጝ ናንዳ ኣፍብያ፣ ከእን ኣይ ከኡዋው ፓፃኖጝ ናንዳ ኣርክጳ ከቶኦካ ይሁኔን እን ኣኔን ኦካ ቶኦ ኑኑዻ፤ ³ ከባሪዮ ከሹኔ ጉዋዩ፣ ከኢየሱስ ክርስቶስ ታቺ እንዻ ኣይኔኔ ሆፎዬ ካኣይሼ እየውባ። ⁴ ከሹካጝ ሃቃቢዬ እን ከይሁኔን ናኑጝ ሃጎሺባ ኣምላክ ናኒ ሹ ጮል፤ ⁵ ናንዳካኦ እምነት እን ኑኑ ኣኔን ከኢየሱስ ታቺ እኔ ናሺማ እን ኑኑ ኣኔን ከውርካ ይሁኔን ፓይላዬ ሃዋይያ። ⁶ ኦኬ ሹቃ እን ጉዋዩ ኣኔን ከክርስቶስ ፓይላጝ ከእባጆጝ፣ ከውር ዶክ እምነት ኑኑ ካሺሼን ከቁዋቅትሾጝ ሃይወንባ። ⁷ ጪኔ ናኒ ዮ፤ ናንዳካ የቦውሺሼ ሻንካ ውር ጊታይካ ይሁኔን ኡሱጝ ከኦካ ናሺማ ኑኑ ሃጌይያ ዋዛ ታቺዬ ሌምዬኔ። ⁸ ዬ ኦግታይ ኣሽክዬን ካሁሉኩሼ እኑጝ ካኣሽክዮጝ ካሜይሼ እኑጝ ካኣኔ ሾያሞ ከክርስቶስያጝ ⁹ ሃይወን እንባ ከናሺማ፤ ኣኪ ውር ጌጵሹጉዬ የፕር ጋን ከኣን ጳውሎስ እን ኣይ ውርካ ቁምኔንካ ክርስቶሱጝ፣ ¹⁰ ሃኣኔን ቶኦካ ቁሜን ክያኒዬ ሃይወንባ ናንዳካ ውዋ እን ናኒ ሃቡሎጝ ናንዳካ ኣናሲሞስ። ¹¹ ከሌሜን ካኒ ማቲኬን ጊታኬናካ ጠቅምሼ እን፤ ዬ ጋን ማቲያ ውር ጊታኬና ጠቅምሼ እንዻ ጊታኬካ ጠቅምሼ ኣንዻ። ¹² ሃዋሻ ይዕሲሼባ ውር እን ኣይካ ሻን ናኒ ሃሚን ኑኑጝ። ¹³ ናንዳካ ክያጃ ሹቃ ከሹ እን ሃቁሙኖጝ ካኣኒንቴ ኦካ ባል ኑኑዬ ካዋድምሲኔ ኣኑጝ ሃዎሺያ እሺ ኦጝ ናኒ ሺዕሺዬን፤ ¹⁴ ኣይባዬ ኦኬ ሹቃ ጊታይ እን የኣሽክዬጝ ፓይላ ሃኬ ናሺዬን ዬ ማሬኬ ድዳሞ ኣዬኑጝ ሃካና ክሊኬን እኔ ከኣሽክዬ ኦኬ ክየምጵንዻ ሃዎሽኬን። ¹⁵ ካ ናንዳካ ሹ ጩዋማ ሃጌዬኬ ኦኑኑ ዋናጝ፣ ከቦወ ከኣጁጝ ኦኑኑ ማሜ ጊያ፤ ¹⁶ ዬ ካርሲኬ ጋኔ ማርኬ ውርካ ካይሳሞዬ ሃጪኔ እንካ ናሺዺ ኣይኬ ኦካ ካይሳሞ ሳጉጝ፤ ዬ ናንዳካ እን ከኣሩጝዻ ከታቺ እንዻ ሳጊ ሃውርካ ናሺዺ። ¹⁷ ኣኪ ሃኦኬና የሻሜ ኣን ባይዳ ኑኑዬ የኮሜያጝ ሻም ኣን ከእያይ ከቦወዬ ቦባ። ¹⁸ ኦኬና ሃጊያምሼ እን ኣኔያጝ ወይ ከእን ባጃ ኑኑ ኣኖጝ ኮምባ ከኣን። ¹⁹ ኣን ጳውሎስ ሃቶኩሼያ እን ይጝ ከቡዋ ናኒ፤ እን ኑኑ ኣኖጝ ኣን ሃካሺባ። እንዻ የኣዬ ናኑጝ ሃሜይሼኬን ኦኬ ክየምጵንዻ። ²⁰ ጪኔ ናኒ ዮ፤ ከጠቅምዬ ኣን ከታቺ እኑጝ ሃዎሺባ፤ ቦውሺሽባ ሻን ናኒ ኡሲ ከኢየሱስ ክርስቶስ። ²¹ ከኤርጎ ዋዬን ኑኑ ከኤርምኔን፣ ከኦካ እን ሃኣንሼ እንዻ ሳጊ ከሻሞጝ ከእባጄን ሃቶኩሼ እንባ። ²² ከኦካ ይንዻ እንቃ፣ ይሁኔን ጉዩ ካጌይ ኦካ ዋሼኔ ከዮጝ ጉዩ ኩኔን ናንዳካ ቃቦ ሹቃ ሻሜን ኣሽክቴ ኣንባ ኦካ ኡሲ ቦወን። ²³ ከኤጳፍራ እን ኣይኬ ኣን ውርካ ቁምኔንካ ኢየሱስ ክርስቶሱጝ ቦዋ እን ሆፎ፤ ²⁴ ፕርዻ ውር ጊታይ ኣሽክዬን ከኣኑጝ ማርቆስ፣ ኣርስጥሮኮስ፣ ዴማሴ ሉቃሴ ቦዋ እን ሆፎ። ²⁵ ኣይኔንካ ኢየሱስ ክርስቶስ ታቺ እን ካኣይባ ከመንፈስ ጉዩ።