¹ v 1 ውርካ ዋድማካ ኢየሱስ ክርስቶሴ ጪኔካ ያዕቆቤ ይሁዳ፤ ናንዳካ ጊታይ ሺዎጝ፣ ከባሪዮ ሹኔ ናንዳካ ጊታይ ናሺዬዬ ጊታይ ማንኪዬ ከኢየሱስ ክርስቶሴ፤ ² ዻዹጝኔኔ፣ ሆፎዬ ናሺማዬ ካጁዋንትሼ እየውባ። {ሴሶካ ውር ጊታይ ኣሽክዬን ኦኬ ጋራጋራዬ ኮምሼን እንካ ካሊ እንግኔ} ³ ውርካ ናሺዺ ናኒ ዮ፤ ናንዳካ ባይሼን እንካ ካሺሚንቴ ከጋጙጝ ካቶኩሼ እየው ካሎን ሃፎሽካዽያ፤ ኣይባዬ ናንዳካ ውር ጊታይካ ይሁኔን ናንዳካ እምነት እን ጋዬ እንግን ካካርሲዬ ካቱንሱጝ ከኒሺንቶጝ ናንዳካ ኪሊዬ ካቶኩሼ እየው ማቲሼያ ኣን ጊዲ። ⁴ ከሌሜንካ ሹ ጁዋኑ ናንዳካ ኮምሼን ይጝ ጊታይ ቶኮጝ ውር ክየም ክየም ቱሌ ሻዋ ሃሚን ጉዩጝ፤ እንግን ጋይ ጊታኬና ማር ባሪዮ ሪግሺኔን፣ ኣይኔንካ ኣምላክ እን ጉዋዩጝ ሃጊታኬና ሁቡሼ ሃምካ ኦኬ ጋራ ጊታይኔ እን እሺጵን ኣይ ልዑል ታቺ ጉዋዩዬ ማቲ ታቺ ጉዋዩጝ ሃጊታይ ቡድዬን ኢየሱስ ክርስቶሱጝ። ⁵ ዋንቲ ሌምሼ ጊባጃ ይጝ ፓይላያጝ፣ ታቺ እን ሻም እያን ቡሌ ዛርሲ ከኦካ ፔንካ ግብፁጝ፣ ዬ ከታካ ሁር ሻም እያን ጊታይ ማር ኣምኒዬኑጝ ሃዎሺያ እየው ጶቅሲሼን። ⁶ ጊታይ ማር ራቅካ ጌጳሞ ጉዋዩ ሹቃ ቶዬን ኣይባዬ ውርካ ኤርጎ ጊታይ ኦይዲ ኦካ ቆቤን ጊዬዩጝ ከኦካ ቁምኔን እንካ ቦን ጮሉጝ ሌይ ሃምካ ሹ ታቺ እንካ ኮምሼኑጝ ማንኪያ እንግን ኦይን ጋኒኔ ድሙጉ ኪያኑጝ። ⁷ ፕርዻ ሶዶሜ ጋሞራዬ፣ ኬከተማ ጊታይ ኣኔን ማራማራ ጊዬዩጝ ናንዳካ ኩጳሞዬ ናንዳካጝ ጋዬ ከኦካ ኦግታይ ሙኔ ሹኑኩጝ ናንዳካ ኣሩጝ እንግዬይ ኣይ [ሩካቤ ሳስክዬ ጋዬና እንግን ኤታጋን፤ እንግንዻ ከጉ እን ኣይካ ቦን ጮል ቃጥዬን ማቲያ ሄክንሶካ ጊታይ ጋሊዬን። ⁸ ከዴንታ እን ጊታይ ሹኬን ከሹካጝ ሴሲሲባ ኣሩጝ ጊዬይ፤ ኖኪዬንባ ጌጳሞ፤ ይርባ ኦግታይ ሙኔዬ ኣኔ ጎቢንታዬ ኣኔን ፎላ ዾዮኩጝ። ⁹ ኣይኒን ሚካኤል እን ኣይ ታቺካ ውርካ ኤርጎጝ ናንዳካ ኣሩጝካ ሙሴ ከሹ እን ዜርምኔኬ ዲያብሎሱጝ፣ ሺጝ ታቺ እን ካጎሪ እንባ ዬ ከክያጃካ ይርኔን ሃሳወን ካኒ ዎሽኬንካ ካሲሲዬን። ¹⁰ ዬ እንግን ውራን ጊታጝ ይርባ ኦግታይ ማሬ እባጄንዻ ፓይላ፤ ከዳቢ ኮኑጝ ማር ሹቦ ኣኔኑጝ ካይባ ከኦግታይ ጊባጄኬ ናፒሲካ ኒያቡጝ። ¹¹ ሃይ/ ፓያ ከጉዋርካ ቃየን፤ ከዛላሞካ ቢሬ ቡዳ [ከኦኬ ጊያምሼንካ በበላዓም ቱዎጝ]፤ ካህያ ከኦኬ ጋራ ኣሽክዬንካ ቆሬዻ። ¹² ውራን ጊታጝ ከኦካ ኣማካ ናሺማ ጉዩ ጋኔኬን ቦኩንዾዬ ፓዬን ከእየወ ሃውር ጋራ ጊታይካ ኣም፤ ፕርዻ ጋይ ውርካ ዻውኔን ጊታይካ ኣምካ ጊዬይጵን፤ እንግንዻ ጋይ ሉፍ ጊታይ ቦወኬ ፑጉዬ ማር ጎት ኣኔኑጝ፤ ከትጌሻን ጊታይካ ባርጊን ጊታይ ማሬ ካርቡ ጌዬኔ ሃሻሪ ጊታይካ ቡጬኬ ጊሜይ ክያጝ ዻወ ካቁዋቅሽ። ¹³ ዱቦካ ኦኬ ዴንታ ጋራ እን ጊዬይዻ ጋይ ሄሎቆንካ ኛፓስ ጊታይ ሜንሾጝ፣ ጋይ ኡጉድ ጊታይ ካሊያ ቢሊ ጊታይ ላላቅሜን ቦን ጮሉጝ። ካርሲኬ ኣዳሜ ሄኖክ እን ኣይካ ሶጵሳጝ ናንዳካ ውራን ጊታጝ ሺግ እያጜ ሃሳዋ፤ «እየዎ፤ ታቺ እን ኩንባ ከውር ጊታይካ ይሁኔን ሳጊዬ ጆሉጝ፤ ¹⁴ ካርሲኬ ኣዳሜ ሄኖክ እን ኣይካ ሶጵሳጝ ናንዳካ ውራን ጊታጝ ሺግ እያጜ ሃሳዋ፤ «እየዎ፤ ታቺ እን ኩንባ ከውር ጊታይካ ይሁኔን ሳጊዬ ጆሉጝ፤ ¹⁵ ይንዻ፣ ሃኬ ኦካ ውር ፓይላ ኮምሼን ፕርዻ ውር ጊታይ ኣሽክዬን ኦኬ ጋራጝ ፓትላ ከኦካ ጉዋር እን ጋሽክዬ ኦኬ ጋራዬ ናንዳካ ክያጃካ ይርኔን እን ሃሳውሼ እሺዻ ፓይላ ሃኬ እን ጋዬ ውርካ ካህሲኔን ጃ ሻሜን። ¹⁶ ውራን ጊታጝ ሃጊታኬና ጉንዱሜኔ ካሲሲዬን ውራን ዶኬ፤ ዻዬባ ኣርግማ ጋራ እን ጊዬይዻ፤ ቃይዬንባ ከእንግን ኤታጋንዻ፤ ሺጝ ናንዳካ ኦኬ ጌዬንያጝ ላጜ ቆቤባ ውር ዶክ። {ናንዳካ ቁዋቅትሼ ጎሬን ሺውኔን እን ሻሞጝ} ¹⁷ ኣይባዬ ውርካ ናሺዺ ናኒ ዮ፤ ጶቅሲባ ኦግታይ ሐዋርያታንካ ኢየሱስ ክርስቶስ ታቺ እን ጉዋዩ ሌምሼ ክያጆጝ። ¹⁸ እንግንዻ፣ ከቦን እንካ ቱንሱጝ ጊታይ ዻዬ ኣርግማ ጋራ ጊታይ ጊዬዩጝ ፓዬንባ» ዋይሼያ እየው እያይ። ¹⁹ ውራን ጊታይ ካሻሜ ኦካ ጫቃን ጊዬይ ላልምኔኑጝ፣ ጋይ ኒያቡ ጊታይ ሻሜኬ ናፒሲዬ ማር መንፈስ ኣኔኑጝ። ²⁰ ዬ እየው ውርካ ናሺዺ ናኒ ዮ፤ ካሎን ከእምነት እንጉዩ ኣይ ቅድሱጝ ቁዋቅትሽባ ካእየው ኤታጋን ጫንቃል ሻሜን፤ ይወንባ ከመንፈስ ቅዱስዻ። ²¹ የኣኒናባ ዻዹጝኔንካ ኢየሱስ ክርስቶስ ታቺ እን ጉዋዩ ካሄክሼ ሃምካ ዻቆካ ቦን ጮሌ የኣንቴባዬ፣ ማንኪባ እየው ኤታጋን ከናሺማካ ባሪዮ። ²² ናንዳካ ጊታይካ ቃጋሲንቶጝ ዻዹጚንቴ እንግንባ፤ ²³ ኬሊ ክየም ክየም ከኦካ ጉወ ዻዓሺ እንግንባ፤ ፕር ዶክ ኣይኒን ኣፓላ ጊታይ ጊዬይ ሄክሲዬ ከኣሩጝ ጋራጝ ሚንቴ ዹዋልሺቴ እንግንባ ሺዕሺኔን። {ክያጃካ ጎሺ} ²⁴ ከማር ቡዴኔ ካማንኪ እየወ ከኣንቴኬን ዻብሾዬ ከዋዛ ካቻሊዬ እየው ኦካ ሌሜንካ ጎቢንታ ኔኒ ቦሼኑጝ፣ ²⁵ እን ኣይ እሺጵን ኣምላካ ዻዓሾ ጉዋዩጝ ከታካ ኢየሱስ ክርስቶስ ታቺ እን ጉዋዩጝ ከኦካ ሌሜንካ ቦናን ፓይላ፣ ከጋኔ ሌይ ሃምካ ቦን ጮሉጝ ጎቢንታ፣ ጌጳሞ፣ ቁዋቅትዬ ጌጳማዬ ካኣይ ኔኒ፤ ኣሜን።