¹ ያዕቆብ እን ኣይ ውርካ ዋድማ ባሪዮዬ ካኢየሱስ ክርስቶስ ታቺ እኔ፤ ናንዳካ ውር ታጲ ላማ ጊታይ ላልሜን፤ ሆፎ ካኣይሼባ እየው። {ጋሎዬ ፓታናዬ} ² ጪኒጌን ናኒ ዮ፤ ጋሎ ዋናዋና ሄክሻ እየውያጝ ኮምቴኬ ዋዛ ኮኑጝ ኣይ ካኖኑጝ፤ ³ ናንዳካኦ ፓታኒዬንካ እምነት ጉዩ ናንዳካጝ ካጌይሼ ኦኬ ዶንሺዬኑጝ የእባጃያ። ⁴ ከማርቴ ጊታኬና ኦኬ ክየምጵንዻ ካማሬ ጆግዬኔ ካኣይቴ ካሎኔ [ምሉኣኑጝ] ኦኬ ዶንሺዬን ካሹዋጵሽባ ዋድማ ኔኒ። ⁵ ከኦካ ጫቃን ጉዩ ውር ክየምጵንዻ ፓካልማሞ ጆግሼያያጝ፣ ካማር ዻብሺዬኔ ካይሁንቴባ ባሪዮ እን ካኣይ ፓይላጝ፤ ጋይባ እሺዻ። ኣይባዬ ካማርኬ ቃጊማ ኣዬኔ ካይሁንቴባ ከእምነት፤ ናንዳካኦ ውር እን ቃጋዺ ሃሄሎቆንካ ኛፓስ እን ፑጉ ሻሜዬ ይንግሼኑጝ። ⁶ ኣይባዬ ካማርኬ ቃጊማ ኣዬኔ ካይሁንቴባ ከእምነት፤ ናንዳካኦ ውር እን ቃጋዺ ሃሄሎቆንካ ኛፓስ እን ፑጉ ሻሜዬ ይንግሼኑጝ። ⁷ ውር እን፣ ሺጝ ሃጌይባ ኦኬ ክየምጵንዻ ከኦካ ታቺ እኔ ካማር ቃቢዬን፤ ⁸ እሺ ሃኬና ጎሜኬ ቃቦ ዻዌ ከኦካ ጉዋር ፓይላ ሃኬና ቁዋጬ። ⁹ ጪን እን ኣኔን ዱቡጝ ኬካች ጌዬን ኔኒ ካቃይባ። ¹⁰ ውር ሆድሞ እንዻ ከእን ኣኒኔ ዱቡጝ ካቃይባ፤ ትርኪሲባ ከኦላካ ሹጩዬ። ¹¹ ሹሽዻ ከቄጪቲ እን ኔኒካ ዻሙጝ ቱሌ ሩጵሽባ ሹጩ፤ ኦላዻ ትርኪባ፤ ባሺ ኣዬን ኔኒዻ ካይባ፤ ፕርዻ ውር ጊታይ ኣይ ሆድሞጝ ቦዋ ዴንታ ጊታይ ኔኒያጝ ኣኔባዬ ካይባ። ¹² ውር እን ቁዋቅትሽ ከኦካ ፓታናጝ ሃኬና ጉዋኔ፤ ናንዳካኦ ሪባ ፓታናያጝ ባሪዮ ናንዳካ ጊታይ ናሺዮጝ ቃቦ ሹቃ እን ኣይኖጝ፣ ጌይባ ኣክሊልካ ዻቆ። ¹³ ውር ክየምጵንዻ ፓታንያያጝ፣ «ካማር ባሪዮ ፓታንሲያ ኣን ሺጜን፤ ናንዳካኦ ባሪዮ ፓታንሲኬን ከኦኬ ጋራ፤ ውር ክየምጵንዻ ፓታንሲኬን እሺ፤ ¹⁴ ኣይባዬ ውር ክየም ክየም ፓታኒያጝ ሃኬ ኣርግማ ጋራ እን ኔኑጝ ቦሼ እሺ ኤምኑዬ ቱዋኔንያ ጊያ። ¹⁵ ኣርግማዻ ኡሩካያጝ ጩዋ ጅሽባ ሴሶ፤ ሴሶዻ ጌጵሻያግ ጩዋ ጅሽባ ኣርሼን። ¹⁶ ጪኒጌን ጊታጝ ናኒ ናሺዬ ዮ፤ ኦይድ ቱዋኒንቴን። ¹⁷ ኣይኔን ሹቃዬ ኡዋኒኔን እን ኣይ ካሎኔ ፓይላ ከፎላ ዾዮክ ሹቡጌን ጊታይ ኣይ ሜሌሉጝ ጎባ፤ ኬታይ ኔኒ ሁቡኔን፣ ከእን ናሹጝኬ ሺሪዬኑጝ ሙዎል እንካ ቡወ ኡሲዻ ኣኔኬን። ¹⁸ ካኣይ ቶይድካ ሙኒኔኑጝ ከክያጃ ኔኒ ጅሻ ኡዋው ከክያጃ እን ኣይ ኣኩሉኩጝ። {ዋዬ ከእሺ ዋድምኔን} ¹⁹ ጪኒጌን ጊታይ ናሺዬ ዮ፤ ጶቅሲባ ይዕጝ፤ ውር ፓይላ ናንዳካ ካኣይ ኬና ኣይ ቤርቢ፣ ናንዳካ ሃሳወን ካኣይ ኬና ኣይ ፓል፣ ናንዳካ ማኒትዻ ካኣይ ኬና ኣይ ፓል፤ ²⁰ ማኒትካ ውር ቦኩኔኬን ጫንቃል ኣዬንካ ባሪዮዬ። ²¹ ዬ ኦኬ ጋራ ጊታይኔ ቡሊ ጋራቲ ጊታይ ጌዬኔ እን ቻሊ ናፒሲ ጉዩ ባይሼኑጝ፣ ቦውባ ክያጃ እን ዾቅዬ ኦጉዩ ቱዎጝ ከሹቃቲ። ²² ሻሚባ ኦግታይ ክያጃ ሃሳዎጝ ዬ ኦይዲ ጊታኬና ዋይጵን ኣዬኔ ኦይዲ እየው ኤታጋን ቱዋንቴን። ²³ ውርካጝ ዋይ ክያጃጝ፣ ኣይባዬ ውር እን ማር እን ክያጃ ሺጜ ሙኔኑጝ ሃኬ ውር ኮኑጝ ቶይ ማሪ ኔኒ ከሼዴያጝ፤ ²⁴ ቶይ እሺ እምኑዬ ኩይባ፤ ይሪካዻ ሙኒኔ ኦውጝ ጌርሺኔባ፤ ²⁵ ኣይባዬ እን ቶይ ሕግ እንካ ቡል ነጻዬ እን ቁዋቅትሹጝ፣ እን ዋዮጝ ካጝ ኣሽኪዬ ውር እን ማር ጌርሺኔኔ ከኦካ ዋድማ ኔኒ ማቲባ ኬና ጉዋኔ። ²⁶ ውር እን ካኒ ሪብኬን ቶግ ኔኒዬ፣ ጊያምሽ ሻን ኔኒዬ ሺጝ ኣን ሃኣይ ውርካ ቶኦካ ይሁኔኑጝ፤ ቱዋንባ እሺ ኤምኑ፤ ቶኦካ ይሁኔን ኔኒዻ ሃማም እያይ። ²⁷ ከኦካ ማሪካ ባሪዮ ቶኦካ ይሁኔን እን ኣይ ጫንቃሌ ማር ኦኬ ጋራ ኣኔኑጝ ሃይዕጝ፤ ሃንታ ጊታይ ውራን ጊዬይ ኣርሼዬ ሃኣጛን ጊታይ ጁማንቴን ኣርሼዬ ከኦካ ጋሎ ጊዬይ እንግን ኬልሺዬኔ እን ኤምኑ ከኦካ ኦኬ ጋራ ጊታጝካ ፔኑጝ ማንክዬኔ።