¹ ከክያጃካ ባሪዮ ከእን ኣይ ሐዋርያካ ኢየሱስ ክርስቶኦስ ከጳውሎሴ ከጪኔ ጉዋዩ ጢሞቴዎሴ፤ ² ጊታይ ቆቤን ቆላስይስ፣ ውርካ ይሁኔን ጊታይ ኣይኬ ክርስቶሴ ጪኒጌን ጊታይ ኣይ ሹቃዬ፤ ከባሪዮ ከሹኔ ጉዋዩዻ ኣይኔኔ ሆፎዬ ካኣይሼ እየውባ። {ጎሺዬ ይሁኔኔ} ³ ከሹካጝ ሃይሁኔ ናንዳካ እየውጝ ሃጎሺያባ ሹኔካ ኢየሱስ ክርስቶስ ታቺ እን ጉዋዩ ባሪዮ ሹ ጮል፤ ⁴ ናንዳካኦ ከኢየሱስ ክርስቶስ እምነት እን ጉዩ ኣኔዬ ናንዳካ ውርካ ይሁኔን ፓይላ ናሺማ እን ጉዩ ኣኖጝ ፓይላ ሃዋያያ፤ ⁵ ይንዻ ኣዮጝ ሃእን ናሹጝኬ ቃቦ ሹቃ እን ጋሽክሼ እየው ፎላ ዾዮኬ ኣኖጝ፤ ዬ ቃቦ ከክያጃ ሹቃ የሌምሻዬ የዋያያ ክያጃካ ኣኩሉክ፤ ⁶ ይንዻ ሄክሻ ሃሚን ጉዩጝ። ክያጃ ሹቃ ይንዻ ካርሲኬ ሹ እን የዋይቴዬ የእባጅቴ ከኣኩሉክ ኣይኔንካ ባሪዮጝ ከእያይ ጋኒኔ ፔን ፓይላ ኣሽክዬኑጝ ከኦጉዩዻ ኣኔን ካርቡ ኡፑቴኔ ጌጵሼኔ። ⁷ ይንዻ ናንዳካ ኡዋው እን ኣይ ውር ሹቃካ ዋድማካ ክርስቶሱጝ፣ እን ኣይኬ ጋጝ ከዋድማዻጝ ኤጳፍራ እን ናሺዮጝ እርርሲያ እየው፤ ⁸ ፕርዻ ሜይሼያ ኡዋው ናሺማ እን ጉዩ ኣይኬ መንፈስ ቅዱሱጝ። ⁹ እን ናሹጝኬ ይንዻ ኡዋዻ ካርሲኬ ሹ እን ሃዋይቴዬ ኦኬ እባጄን እን ባሪዮ ናሺዬዬ ከፓካልማሞካ መንፈሴ እባጄኔ ፓይላ ካቋቁሼ እየውጝ፤ ናንዳካ እየው ይሁሺኔኔ ኦኬ ይሁኔኔ ሃካና ጵዺቴኬን፤ ¹⁰ ሃይሁንቴዻ ከኣይ ጊታኬና ካሁሉኩሼ ታቺ እኔ ከቆብቴዬ ከዋዝንዽኬ ኦኬ ፓይላዬ ጊያ፤ ይንዻ ከዋድማ ፓይላ ኡፑቲ ካርቡዬ ሻሚኬ ባሪዮ እባጄንዻ ፓይላዬ፣ ¹¹ ቁዋቅትሼን ታቺዬ ኦኬ ዶንሺዬኔ ካኣኔ ኦጉዩጝ፣ ከካንታካ ጎቢንታ ኔኒ ከኦካ ቁዋቅት ፓይላ ቁዋቅትሺዬ፣ ዋዝንዽዬ፣ ¹² ከኦካ ውርካ ይሁኔን ከኦካ ኦሜሌል ከጋጝ ኣዬን ሄክሺሼ ኡዋውጝ ከጎሺ ሹኔዬ ጊያ። ¹³ እሺ ዻዓሺያ ኡዋው ከኦካ ዴንታካ ድሙጉ፤ ሳስክሼያ ኡዋው ሃምካ መንግስትካ ውዋ እን ኔኒ ናሺዮጝ፤ ¹⁴ ከእሺዻ ኬራፌን ጌያ ኡዋው ከኒያቡ፤ ይንዻ ሃሺዕሺኔንካ ሴሶ። {ክርስቶስ ሃኬ ኦካ ፓይላ ሳጊ} ¹⁵ እሺ ኣምላክ እን ማር ጌይኔን ሃኬና ሙኔን፤ ከኦካ ሌሜንካ ኦኬ ጊታይ ሙኔ ፓይላ ሃእንካ ሌሜኑጝ፤ ¹⁶ ኦኬ ፓይላ ሙና ከእሺ፤ ኦግታይ ኣኔን ከፎላዬ ከዳሊዬ፣ ጊታይካ ጌይንቴዬ ጊታይ ማርካ ጌይኔኔ፣ ኣይኒን ጊታይካ [ካራሙጝ] ወይ ኣይኒን ጊታይ ኣይ ቁዋቃጝ፣ ኣይኒን ጊታይ ኣይ ታታቹጝ ወይ ኣይኒን ጊታይ ጌጳሲዮጝ፣ ኦኬ ፓይላ ሙና ከእሺዬ ናንዳካ እሺዬ። ¹⁷ እሺ ሃኬ ሌሜንካ ኦኬ ፓይላ ኦኬ ፓይላ ጎሜ ጋጝ ክየምጵኔ ቁዋቅትሾጝ ሃኬ እሺ። ¹⁸ እሺ እን ኣይ ሩዋ ኔኑጝ ሃሺቦካ ቶኦካ ይሁኔን፤ ከኦኬ ፓይላ ካኣይ ሳጉጝ እሺ እንካ ሌሜኑጝ፣ ከኦካ ጫቃንካ ኣርሼንዻ ማቲያ እንካ ሌሜኑጝ። ¹⁹ ባሪዮዻ ቋቄንካ ኦኬ ፓይላ ካኣኒኔ ኦኔኑጝ ናሺያዬ፤ ²⁰ ከኒያቡ እን ኔኒ እርሺሼ ጻጵኔን ክያኑጝ ከኦኬ ሹቃ ሻሜን ኣይኒን ከዳሉጝ ኣይኒን ከፎላጝ ኦግታይ ኣኖጝ ፓይላ ኬታይ ኔኑጝ ቃሺሺያ ከእሺ ኤምኑ። ²¹ እን ናሹጝኬ ዴንታ ጋራ እን ጉዩጝ ከሌሜን የጌያኬ ኦካ ባሪዮ ዋናዬ ከቃቦ ጉዩዻ የኣያ ጋል። ²² ዬ ጋን ሻም እየው ውርካ ይሁኔን ጊታኬና ማር ኦኬ ጋራ ኣኔኔ ዻባሞ ኣኔኔ ካቦሼ እየው ኦካ ማሪ ኔኑጝ፣ ከኣሩጝካ ክርስቶስ ከታካ ኣርሼን ቃሺያ እየው። ²³ ይንዻ ካኣዮጝ ከኣሽክዬን ከእምነት ጉዩዬ ከናሹጜ ጎሬን ከኦካ ክያጃ ሹቃካ ቃቦ እን የዋይቶጝ ከማር ላላቅምኔኔ ከቁዋቅትሼ ጎርባዬ ጊያ። እን እየው የዋይቴዬ ከኦግታይ ሙኔዬ ኣኔን ከኦካ ዳሊ ዱቡጝ ፓይላ ክያጃ ሹቃ እን ሜይሺኔዻ ሃይዕጝ፤ ኣን ጳውሎስዻ ናንዳካ ክያጃ ሹቃጝ ሃማቲያ ውርካ ዋድማ። {ቁዋቅትሼን እን ጳውሎስ ዹዋልሺኔ ናንዳካ ቶኦካ ይሁኔኑጝ} ²⁴ ካንዻ ናንዳካ ጋሎ እን ሃጌዬ ናንዳካ እየው ዋዝንሲ ኣንባ፤ ክርስቶስ ናንዳካ ጋሎ እን ጌዬ ናንዳካ ሩዋ ኔኑጝ ናንዳካ ቶኦካ ይሁኔን እን ጆጊ ሃቋቁሽባ ከኣሩጝ ናኒ። ²⁵ ካቦሼ እየው ክያጃካ ባሪዮ ከቋቄኑጝ ከኤልቅሞ እን ጋዬ ኣን ከኦካ ባሪዮጝ ሃማቲያ ውርካ ዋድማካ ቶኦካ ይሁኔን፤ ²⁶ ክያጃ ይንዻ ድክ ከኦካ ቦናኔ ውር ጊታይ ጅሼዬ ማቲ ኦካ ድኬኔ ኡፔኔ ኣኔባ፤ ዬ ጋን ዹዋልሼያ ውር ጊታይካ ይሁኔኑጝ። ²⁷ ናንዳካ እንግንዻ ባሪዮ እን ኣዬ ሆድሞካ ኦኬ ድኬንካ ጎቢንታጝ ከኦካ ጫቃንካ ዛርሲ ኣዬ ኦውጝ ናንዳካ ሜይሺኔን እድያ፤ እሺዻ እን ኣይ ጎቢንታጝ ኣይ ቃቦ ሹቃጝ ሃክርስቶስ እን ኣኔን ከእየው። ²⁸ ኡዋውዻ ካሻምቴ ውር ክየም ክየም ከክርስቶስ ካሎኔ ካቻሊቴ ቦፓይኔኑጝ፣ ሃክሊና ውር ፓይላ ከፓካልማሞ ፓይላዬ ሃእርርሲናዬ ሃሜሺናባ እሺ፤ ²⁹ ኣንዻ ከቁዋቅት እን ኣሽክዬን ኦናኒ ቱዎጙጝ ከቁዋቅት ኔኒ ፓይላ ሃዳርጊዬ ሃዾርባ ናንዳካ ዳቡጝ።