¹ ኣይባዬ ከቦን እንካ ቱንሱጝ ሹ እንካ ጫንቅሺ ውር ካኩዋዎጝ እባጅባ ይዕጝ። ² ውር ማቲባ ጊታኬና ናሺ እንግን ኤታጋን፤ ጊታይካ ናሺ ቢሮጝ፣ ጊታይካ ፎኮር፣ ጊታይካ ጵራጵራጝ፣ ጊታይ ይሬን ውር፣ ጊታይ ማር ውራን ጊዬይ ዋይሺኔኑጝ፣ ጊታይ ማር ጎሺዬኑጝ፣ ጊታይ ማር ይሁኔን ኣኔኑጝ፣ ³ ጊታይ ማር ናሺማ ኣኔኑጝ፣ ጊታይ ማር ናንዳካ ቃሽ ባሺምኔኑጝ፣ ጊታይካ ኮፓች፣ ጊታይ ማር እንግን ኤታጋን ኡዋሩጜኑጝ፣ ጊታይ ኣይ ጋራጝ፣ ጊታይ ማር እን ኣይ ሹቃ ናሺዬኑጝ፣ ⁴ ጊታይካ ቡዲይንቶጝ፣ ጊታይካ ጊቦጝ፣ ጊታይ ጎሜኬ ማም ኣዬኔ ከጵራጵራዬ ከኦካ ባሪዮ ሳጊ ማቲባ ጊታይካ ናሺ ባሉጝ። ⁵ ጋኔባ ዴንታካ ቶኦካ ይሁኔን፤ ዬ ቡድያ ቁዋቅት ኔኒ። ካምባ ዹክ ከኦካ ጊታይ። ⁶ እንግንዻ ሁሉክ ኦጉዋይካ ቶኦዬ ጋይሼ እንግን ጁዋንትካ ሴሶዬ፣ ሁሉክ ኦጉዋይካ ኣርግማ ጋራዬ መንፈስ ጊታይ ድቤኑጝ ሃጊታይ ቶሊ ሃኣጚ ዻቹጋን ጊታይ፤ ⁷ ሃኣጚ ጊታይ ኣይኬ ጊታይኑጝ እርርባ ሹ ጮል፤ ኣይባዬ ሃምካ እን ኣይ ኣኩሉክ እባጄኑጝ ካሄክሾጝ ክየምጵንዻ ቻሊኬን። ⁸ ኢያኔሴ ኢያንበሬሴ ከእያይ ኖክዬ ሙሶጝ፣ እንግንዻ ጊታይ ሹቦ ጊዬይ ካይዬዬ ውር ጊታይ ፓቄኬ እምነቱጝ ፕር ኖክባ እን ኣይ ኣኩሉኩጝ። ⁹ ካኣይባዬ ሙኒሼብኬን እንግን፤ ናንዳካኦ ውራን ጊታይ ከእያይ ዹዋልሺኔ ዴምጳሞጝ ፓይላ፣ ናንዳካ ጊታጝዻ ፓይላ ኣይባ ጃ። {እን ጳውሎስ ኤልቅምሺኔ ጢሞቴዎሱጝ ¹⁰ ዬ እን የእባጅያ እርርሲኔን ናኒዬ፣ ዴንታ ናኒዬ፣ ኦኬ ናኒዬ፣ እምነት ናኒዬ፣ ኦኬ ዶንሺዬን ናኒዬ፣ ናሺማ ናኒዬ፣ ቁዋቅት ናኒዬ ፓይላ፤ ¹¹ ዋክኔን ናኒዬ ጋሎ ናኒዬ፣ ከኦካ ኣንጾኪያዬ ከኦካ ኢቆንዮኔ፣ እን ሄክሽ ኣን ኦካ ልስጥራንዻ ፓይላ፣ ዋክኔን እን ሃዶንሺዮጝ የእባጅያ፤ ዬ ታቺ እን ከኦካ ኦግታይ ፓይላ ዻዓሺያ። ¹² ከኣኩሉክዻ ከኢየሱስ ክርስቶስ ከዻቆካ ኣኩሉክ እንካ መንፈሱጝ ጊታይ ናሺ ቆቤን ፓይላ ዋኬባ። ¹³ ዬ ጊታይ ኣይ ጋራዬ ካቱዋኒኔዬ ጊያምሼ ጊያምሺሼ፣ ከኦካ ኦኬ ጋራዻ ሌሜ ፓዬባ ኦኬ ጋራ። ¹⁴ ዬ እን ከእን የእርርዬዬ የእባጃዬ ቁዋቅትሽባ፤ ይን የእርርዬ ከኦካ ኒኑጝ የእባጅያ፤ ¹⁵ ካርሲኬ ናሳሞ ኑኑዬ፣ ከኢየሱስ ክርስቶስ ኣምኒዬን ፓካልማሞ እንካ ጌዬ ባይሼኑጝ ውርካ ይሁኔን ጊታይኬ ቻሊዬ ኣዬኑጝ የእባጅያ ወርቀትዻ። ¹⁶ ወርቀትካ ውርካ ይሁኔን ፓይላ ሃጊታይ መንፈስካ ባሪዮ ኣኖጝ፤ ናንዳካ እርርሲዬን፣ ናንዳካ ጎሪዬን፣ ናንዳካ ሹቃ ሻሜን ከጉዋር እን ኣይ ጫንቃልዻ ክሊዬን ጠቅምባ፤ ¹⁷ ይንዻ ውርካ ባሪዮ ከኦካ ዋድማ ሹቃ ፓይላ ካኣይ ልኪዬ ካጌይንቴባዬ ጊያ።