¹ ከክያጃካ ኢየሱስ ክርስቶስ ከቃቦካ ዻቆ እን ሃሁሉኮጝ፣ ከክያጃካ ባሪዮ ከጳውሎስ እን ኣይ ሐዋርያካ ኢየሱስ ክርስቶሱጝ፤ ² ናንዳካ ውዋ ናሺዺ እን ናኑጝ፣ ናንዳካ ጢሞቴዎስ፤ ኣይኔንካ ባሪዮዬ፣ ዻዹጝኔኔ ዎፖዬ ከባሪዮ ሹኔ፣ ካኣይባ ከኢየሱስ ክርስቶስ ታቺ እን ጉዋዩጝ። {ናንዳካ ሹቃ ኣዬን ቁዋቅትሴን እን ጋይኖጝ} ³ ሃካ ቃጭሼኬኔ ምክሬ ሹሼ ከይሁኔን ናኒ ሃቃቢ ናንዳካ እንያጝ፣ ከእያባ ሹቡጌን ጊታባ ጉዋዩካ ሌሜን ኣሽክዮጝ ሃጎሺባ ባሪዮ እን ሃይሁኔ ከመንፈስ ጫንቃሉጝ። ⁴ ሃጶቅሲ ጪራው ኔኑዬ ካቋቄኬ ዋዛጝ ሃፎሽካዽያ እን ቶዬን። ⁵ ሃጶቅሲባ እምነት እን ኑኑ ኬካ ኦካ ሙኒሼን ኣዬኑጝ፤ እምነት ይጝ እባ ከሌሜን ኣኔንኬ ካኪን ሎይድ ፕርዻ ኣኔንኬ ጁን ኤውንቄውጝ፤ ፕር ጋን ኣኒኔኬ እኑጝ ሃእባጅያ። ⁶ ዬ ከቡዋ ናኒ እን ኣይሼን ኣይኔንካ ባሪዮ እን የቦወዬ ኣኔን ኦኑኑ ቱዎጝ ናንዳካ ኡዱቤን ሃክያጅባ፤ ⁷ ባሪዮ ሃካ ቁዋቅትዬ ካናሺማዬ ካመንፈስካ ኤምኑ ኡዋሩጜን ዬ ኣዬንኬን መንፈስካ ሪጊ። ⁸ ኣኪ፣ ናንዳካ ታቺ እን ጉዋዩ ማኝሺዬን ወይ ከጊታይ ኣይ ውርካ ቁምኔን ኔኑጝ ኦይኬ ኣን ሪግሺኔን፤ ኣይባዬ ከቁዋቅትካ ባሪዮ ናንዳካ ክያጃ ሹቃ ጌይባ ከኣን ጋሎ፤ ⁹ ኡዋው ናንዳካ ኦይን ሃኣሽክቶጝ ማር ኦኬ ክየምጵንዻዬኔ ከእን ናሹጝኬ ቃቦ ኔኒዬ ከኣይኔን ኔኑጝ እን ባይሺሽ ኡዋው እን ሺውሼ ሃምካ ዻቆካ ይሁኔንዻ ሃእሺ። ኣይኔን ይንዻ ከቦን ጮል፣ ከኦካ ሌሜንካ ቦናንዻ ጋያ ኡዋው ከኢየሱስ ክርስቶስ፤ ¹⁰ ዬ ጋን እን ላሊ ኣርሼኔ ከታካ ክያጃ ሹቃ ዻቆዬ ኢመዋቲነት ከእን ቡልሼ ሃም ኣይ ሜሌሉጝ ዹዋልሼና ከኩኔንካ ኢየሱስ ክርስቶስ ዼሻ እን ጉዋዩጝ። ¹¹ እንዻ ናንዳካ ክያጃ ሹቃጝ ካኣይ ውር ኬና ሃሳውንቴ ኦኬ ሹቃዬ ካኣይ ሐዋርያዬ፣ ሃማቲ ውርካ እርርሲኔኔ ጌጳሲያ ኣን። ¹² ሃጌዬ ጋሎዻጝ ሃናንዳካ ይዕጝ፤ ኣይባዬ ጊታይ ኣምኒዻ ናንዳካ እሺ እባጄን ሃቦኩንዽኬን፤ እን ሃኤልቅምኔዻ ሌይ ሃምካ ሹ እኑጝ ካቻሊዬ ዻዬኑጝ ሃእባጅያ። ¹³ ከእን የዋዬኬ ኦናኑጝ ከእምነት እን ኑኑ ኣኔን ከኢየሱስ ክርስቶሴ ናሺማዬ፣ ሻምኬ ሄክንሶካ እርሮ ሹቃዬ ጎምባ። ¹⁴ ኤልቅሞ ሹቃ እን ጋዬ እኑጝ፣ ዻዬባ ከመንፈስ ቅዱስ እን ኣኔን ኦጉዋዩጝ። ¹⁵ ጊታይ ኣኔን ሃምካ ጎቢሼንካ እስያጝ ፓይላ እያይ ጎይዴ ኣኑጝ የእባጅያ፤ ከኦካ ጫቃን ጊዬይዻ ጌይባ ፊሎጎሴ ሄርዋጌኔሴ። ¹⁶ ታቺ እን ዻዹጝኔባ ውርካ ጶሮካ ሄኔሲፖሩ፤ ናንዳካኦ ሻምሼያ ኣን ሹ ጁዋኑ ኦኬ ሹቃ፤ ከሳንሳላ እን ቁሜ ኣንዻ ሃቦኩንዽኬን። ¹⁷ ፕርዻ ከሹ እን የኩኔ ሮሙጝ ዎሼዎሼ ጌያ ኣን። ¹⁸ ከሹ እን ካጌዬ ዻዹጝኔን ከኦካ ታቺ እኑጝ ታቺ እን ካኣይ እሺባ፤ ከኦካ ኤፌሶንዻ ዋድምሺና ኣን ናውጝ እን የእባጅያ ካሎን።