¹ ከጳውሎስ፣ ከሲላሴ ከጢሞቴዎሴ፤ ጊታይ ኣይካ ባሪዮ ሹኔ ጉዋዩዬ ከታቺ እንዻ ከኢየሱስ ክርስቶሱጝ፣ ናንዳካ ቶኦካ ይሁኔን እንካ ውርካ ተሰሎንቄ፤ ² ከባሪዮ ሹኔ፣ ከኢየሱስ ክርስቶስ ታቺ እንዻ ኣይኔኔ ሆፎዬ ካኣይሼባ እየው። {ይሁኔካ ጎሺዬ ካኦኬ ይሁኔኔ} ³ ጪኒጌን ናኒ ዮ፤ እምነት ጉዩ ከእን ጌጳዽዬ ኩዬ ይሪይሪዬ ከጋጝ ናሺዬን ጉዩ ከእን ሻብምኔ ኩኖጝ ናንዳካ እየው ሹ ጮል ባሪዮ ጎሺዬን ጉዋዩ ኣኔባ። ⁴ ዬ ከዋክኔን እን ሄክሺ እየው ጋሎዬ ፓይላ ከቁዋቅትሼን ጉዩ፣ ኣይኒን ኡዋውጝ ናንዳካ ኦኬ ዶንሺዬን ጉዩዬ ናንዳካ እምነት ጉዩዬ ሃቃይያባ ከታካ ቶኦካ ይሁኔንካ ባሪዮ። ⁵ ይን ፓይላ ኣዬ ኮምሺኔን ልኪ እንካ ባሪዮጝ ሃኬናካ ዹዋልሺንቴ፤ እን ናሹጝኬ እንዻ ናንዳካ ጊታይ ጌይ ጋሎጝ የማቲያ ጊታይካ ሄክሽ ሃምካ መንግስትካ ባሪዮዬ ኳማ እየው። ⁶ ከእን ባሪዮ ኣዬ ጫንቃሉጝ ናንዳካ ጊታይካ ሄክሺሼ እየው ጋሎጝ ካሺሼ እንግን ጋሎ፤ ⁷ ናንዳካ ጊታይ ጌይ ጋሎጝ ኣይኒን ናንዳካ እየውጝ ፕር ኣይኒን ናንዳካ ኡዋውጝ ኣይባ ኡዋው ኡሲ ቦወን። ይን ካኣዮጝ ሃኬ ሹ እጝ ኢየሱስ ታቺ እን ከጉ ኬና ላሉጚ ካዹዋልሺኔ ከቁዋቃንካ ውርካ ኤርጎ ከፎላ ዾዮኩጝ። ⁸ ከሹ እን ጊታይ ማር ባሪዮ እባጄኔ ጊታይ ማር ናንዳካ ክያጃ ሹቃካ ኢየሱስ ታቺ እን ጉዋዩ ዋይሺኔኑጝ ቡልሼባ ባጃ። ⁹ እንግንዻ ከኦካ ሌሜንካ ታቺ እኔ ከቁዋቅትካ ጎቢንታ ኔኒዬ ቡሌ ቃጥባ ከካይዬን እንካ ቦን ጮሉጝ፤ ¹⁰ ጊታይካ ቃጥዬዻ ከኦካ ውር ጊታይካ ይሁኔን ካጎቢዬዬ ከኦካ ጊታይ ኣምኒ ፓይላ ከእንካ ኩዋዌ ዻዹጝኔኑጝ ማቲባ ከሹ እን፤ እየውዻ የኣያኬ ኦካ ጫቃንካ ጊታይ ኣምኒ፤ የናሺያያ ማኝ ኣዬን ጉዋዩዬ። ¹¹ ሃቃቢና ይጜ ኣምላክ ጉዋዩ ሻም እያይ ሄክሼ እየው ሃምካ ሺውኔን ኔኒዬ ካኮሜ እየውጝ፣ ኦኬ ሹቃ ኣሽክዬ ኣርግማ እን ጉዩ እኔዬ ከዋድማ እን ጉዩ ኣይኬ እምነቴ ፓይላ ከእያይ ሃቶኩሼ እየው ከቁዋቅቲ ኔኑጝ ሹ ጮል ሃይሁናባ ናንዳካ እየው። ¹² ፕርዻ ኬካ ኣምላክ ጉዋዩዬ ኬካ ኣይኔንካ ኢየሱስ ክርስቶስ ታቺ እኔ ሮጝካ ኢየሱስ ታቺ እን ጉዋዩጝ ከጎቢዬኬ ኦጉዩዬ እየውዻ ከጎቢህንቴ ከእሹጝ ሃይሁና ይዕጝ።