¹ ጌቾ እን፤ ከኣኩሉክ እን ናሺ ማር ኣንጵኔኔ ጊታይ እባጅ እን ኣይ ኣኩሉክ ፓይላ ናንዳካ እን እን ናሺዮጝ ናንዳካ እን ግድዮጝ ናንዳካ እን ኣይ ጁዋኔካ ሃንታዬ ሃንታን ኔኒዬ፤ ² ከእን ኦጉዋዩ ቱዎጙጜ ከእን ናሹጝኬ ኣኩሉክ እንካ ኣይካ ኡዋው ቦል ጮሉጝ፣ ³ ከባሪዮ ሹኔኔ ከኢየሱስ ክርስቶስ እን ኣይ ውዋካ ሹኔዬ ኣይኔንካ ባሪዮዬ፣ ዻዹጝኔኔ ሆፎዬ ከኣኩሉኬ ከናሺማዬ ኣይባኬ ኡዋው። ⁴ ከኦካ ሃንታ ኑኑ ክየም ክየም ኬካ ኤርጎ እን ጋዬ ኡዋው ከኦካ ሹኖጝ ከኣኩሉክ ቁዋቅትሼ ፓዬ ከጌዬን ናኒ ካሎን ዋዝንሲያ ኣን። ⁵ ካንዻ ጁዋኔካ ሃንታ ዮ፤ ሃእን ኣኔን ከሌሜኑጝ ዬ ሃቶኩሼኬን እን ኤርጎ ሃሊ፤ ይንዻ ካናሺ ጋጜ ጊያ። ⁶ ናሺማ ይንዻ፤ ካዋካ ጆልኬ እያይካ ኤርጎዬ ጊያ። ኤርጎ ኔኒዻ ከእያይ የዋይቴኬ ሌሜኑጝ ከቆብኬ ናሺማዬ ጊያ። ⁷ ኢየሱስ ክርስቶስ ኩኔኬ ኣሩጙጝ ውር ጁዋኑ ጊታይ ማር ኣምኒዬኑጝ ፓዬና ፔኑጝ ክያኒ። ውር ክየምጵንዻ ጊታይ ኣኔን እያይ ሃውርካ ቱዋኒኔኔ ውር ኬና ኖኪዬን ክርስቶሴ። ⁸ እየውዻ ካሺኔን እን ጉዩ የዻችቶጝ ከካይሲቶጝ፣ ኣይባዬ ከጌቴ ሼሺክዬን ፓሱጝ ኣጅቴባ እየው ኤታጋን። ⁹ ጊታይ ማርኬ እርርሲኔንካ ክርስቶስ ቆቤኔ ጊታይ ቱልኬ ኦይንካ እርርሲኔኔ ፓይላ ኣምላክ ኣኔኬን ኦግዬይ፤ ዬ እን ኡፍኬ እርርሲኔንካ ክርስቶሱጝ ሹኔዻ ውዋዻ ጋይባ ከእሺ። ¹⁰ ውር ክየምጵንዻ ኩና ዮጝ ጉዩያጝ፣ ማራ እርርሲኔን ይጝ ቦኩኔንያጝ ኦይዲ እሺ ኦካ ቶኦ ጉዩ ቾቺንሺዬን፤ ኦይዲ ጌሲዬንዻ፤ ¹¹ ውር እን ቾቺንሺ እሹጝ፤፤ ከዋድማ ጋራ ጊታይ ኔኑጝ ማቲባ ጊታኬና ኣይኬ ጋጝ። ¹² ሃኣኔ ኦኬ ጁዋኑ ጊታይካ ቶኩሼ እየው፤ ካኣይባዬ ካኣዬኬ ወርቀቴ ከቀለሙጝ ሃዎሺኬን፤ ኣይባዬ ዋዛ ጉዋዩ ካኣዬ ካሎኑጝ ሃኩን ሃሚንጉዩዬ ካሜይሼ እየው ኦካ ማሪ ጉዩጝ ሃቃቢባ። ¹³ እን እጝ ግድዮጝ ሃንታካ ጪን ቦዋ እን ሆፎ።