¹ ሃኩንያ ሃሚን ጉዩያጝ ይጝ ሺጝካ ማክንሳ ናኒ ኣዬን፤ ኦኬ ፓይላ ሻምባ ከማኝ ዻ ወይ ከጂያን። ² ከእየው ቶዬን ናኒ እንካ ላንሳጝ ከሹዋን ጊታይ ሃኣኒኔ ሃሚን ጉዩጝ ሃኣጅሺሽያ እየው፤ ካንዻ ሃኣኔን ዹኬ ሃኣጅሺሽባ እየው እንቃ፤ ሃዋካ ኩንያ ሃሚን ጉዩ እንቃያጝ ከኦካ ሌሜንካ ይጝ ኣይን ናንዳካ ጊታይ ኣሽክ ሴሶዻጝ ውር እንቃዻ ሃኦቼኬን እንግን፤ ³ ይንዻ ኣዮጝ ክርስቶስ ናንዳካጝ ኣኒኔ ከኣኔ ሃሳውኖጝ ሃናንዳካጝ የዎሽቴ ኦኮጝ፤ እሺዻ ከኦካ ጫቃን ጉዩ ሃቁዋቃ ዬ ማር ዻቹጉዬን። ⁴ እን ጻጵዮጝ ኣይኒን ከዻቹጉጝ፤ ከቁዋቅትካ ባሪዮ ማቲህ እያይኔ ኡፓ፤ ኡዋዻ ከእሺ ካኣይ ዻቹጉጝ፤ ዬ እየው ዋድምሺኔን ክብቁዋቅትካ ባሪዮ ከእሺ ሃኣያ እያይኔ ሃቆባባ። ⁵ ከእን የኣይቴ ከእምነቱጝ እባጄን ቶይባ እየው ኤታጋን፤ ፓትሺባ እየው ኤታጋንዻ። የማራያ ጊታኬና ቱልኬ ዳሊ ክያኒ ኣዬንያጝ፤ ኢየሱስ ክርስቶስ ኣኒኔ ኦጉዩ ቱዎጝ የእባጃኬኒ?? ⁶ ዬ ኡዋው ልኪ ኣዬን ጉዋዩ ካጶቅሲቶጝ ሃሻማባ ቃቦ። ⁷ ካንዻ ካማር ኦኬ ክየምጵንዻ ኣሽክዬኔ ሃይወንባ ባሪዮ፤ ካይሁንቴዻጝ የኣይቴ ልኩጝ ማር እን ውርካ ቶዬ ኡዋዌን፤ ኣይባዬ ኡዋው ካማር ልኪ ኣዬኑጝ እየው ከኣሽኪ ኦኬ ሹቃዬ ጊያ። ⁸ ናንዳካ ኣኩሉክ ዬ ከኦካ ኣኩሉክ ክያኒ ኦኬ ክየምጵንዻ ሃቻሊያኬን ኣሽክዬኔ። ⁹ ኡዋው ሃኣያ ዻቹጉዬ፤ ዬ እየው የኣያ ቁዋቃንያጝ ዋዝንሲ ኡዋውባ፤ ይሁኔን ጉዋዩዻ እየው ከኣይ ካሎኔ ጊያ። ¹⁰ ሃኣኔንባ ከኦጉዩ ዹኬ ሃኣኔባዬ ኦግታጝ ሃቶኩሼ እየው ከሹካጝ ሃኩኔን ሃሚን ጉዩጝ ካማር ጌጳሞ ናኒ ከቁዋቅት ጠቅምዬኔ ጊያ፤ ታቺ እንዻ ኣዬ ኣን ጌጳሞጝ ካሻሜ እየው ጫንቃል ዬ ማርካ ላልዬኔን። {ጌሶ እንካ ቱንሱጝ} ¹¹ ከእን ሺዺ ጪኒጌን ናኒ ዮ፤ ኣይ ሹቃ፤ ኣይባ ካሎንዻ፤ ዋይባ ክሊማ ናኒዻ፤ ኣንቴ ቃብቦ ክየም ቃቢባ ከሹቃዻ። ኣምላክ እንካ ናሺማዬ ካሹቃዬ ኣይባ ከእየው። ¹² ከሹንቅኔን እን ይሁሺኖጝ ጌሲባ ጋጝ። ¹³ 13 ውርካ ይሁኔን ፓይላ ቦዋ እየው ሆፎ። ¹⁴ ኣይኔንካ ኢየሱስ ታቺ እን፤ ናሺማካ ባሪዮ፤ ከጋጝ ኣዬንካ መንፈስ ቅዱስ ካኣይኬ እየው ፓይላ።