¹ ከኦጉዋዩ ፓይላ ከባሪዮ፣ ከእን ኣይ ቃቦ ሹቃ ጉዋዩጝ ከኤርጎካ ኢየሱስ ክርስቶስ ከጳውሎስ እን ኣይ ሐዋርያካ ኢየሱስ ክርስቶሱጝ፤ ² ከእምነት ኬውዋ እን ናኒካ ኣኩሉኩጝ ናንዳካ ጢሞቴዎስ፤ ከባሪዮ ከሹኔ ጉዋዩ፣ ከየሱስ ክርስቶስ ታቺ እን ጉዋዩዻ ኣይኔካ ባሪዮዬ ዻዹጝኔኔ፣ ካኣይባ ዎፖዻ። {ከኦካ ውርካ እርርሲኔን ጊታይካ ሕግካ ሾሮጝ ናንዳካ እን ኤምኑ ማክዬን ኣጅሺሼን እን ጋይኖጝ} ³ ከሹ እን የኩዬ መቄዲንያጝ ጌልቅምሺኔ እኑጝ፣ ውር ክየም ክየም ካርሲኬ ጋኔ ካማሬ እርርሲኔንካ ሾሮ እርርሲኔኑጝ ከሜይሼ እንግኑጝ ኡፓ ኤፍሶን ኦይን፤ ⁴ ፕርዻ ከኦግታይ ሳጊዬ ሃሳወዬ ታሪካ ውር ጊታይ ጅሼ ማር ቱንሲ ኣኔኑጝ ካማር እንግን ኤታጋን ሳስክዬ ኣይኔኔ ሜይሼ እንግንባ። ኦግታይ ኣኔን እያይኑጝ ከኦካ ዋድማካ ባሪዮ ሳጊ ቲትሽባ ዜርማ። ⁵ ዬ ክያጃካ ኤርጎጝ ኬሸን ጫንቃል፣ ከቃቦ ሹቃ ፕርዻ ሃናሺማ እንካ ጌዬኬ እምነትካ ኣኩሉኩጝ። ⁶ ውር ክየም ክየም ዋኬ ኦካ ኦግታጜ ዋክሼያ ሃምካ ሃሳዋካ ማም እያይ። ⁷ ዎሽባ ውርካ እርርሲኔንካ ሕግ ማቲዬን፤ ኣይባዬ ናንዳካ ኦግታይ ሃሳዎጝ ወይ ናንዳካ ኦግታይ ዜርምኔ ካሎኑጝ ጊባጅኬን። ⁸ ኣይባዬ ውር ዱቅያ ከልኪያጝ፣ ሃእባጃባ እን ሕግ ኣዬ ሹቃጝ። ⁹ ፕርዻ ጋይኔ ሕጉጝ ማር ናንዳካ ጫንቃላኔኔ፣ ሃናንዳካ ጊታይ ጃሌጆልኬ ሕጌ ጊታይካ ሴሶዬ፣ ናንዳካ ጊታይ ማር ባሪዮ ሪግሺኔኔ ጊታይ ኣሽክኔ ጆል ሴሶዬ፣ ናንዳካ ጊታይ ማር ባሪዮ ይሁኔኔ ጊታይ ቦውዬን ባሪዮ፣ ናንዳካ ጊታይ ኒሼኔ ጆል ሹባጋኔ ጁዋጌኔ፣ ኣዬ ናንዳካ ጊታይ ኒሺኔጆል ናፒሲካ ውሩጝ ሃእባጃያ፤ ¹⁰ ፕርዻ ሃናንዳካ ጊታይ ኣሽክዬን ኩጳሞጝ፣ ናንዳካ ጁሙ ጊታይ ራጵኔጆልኬ ጁሙጝ፣ ናንዳካ ጊታይ ኡዋሩጜን ውሬ ኡዋሩጙሺዬ፣ ናንዳካ ጊታይካ ሾሮጝ፣ ናንዳካ ጊታይ ዜርሜንኬ ሾሮጝ፣ ሃናዳካ ጊታይ ሚኔ እርርሲኔን እን ኣይ ሹቃጝ ፓይላ፤ ¹¹ እርሮጝ ሃኣይ ሹቃጝ ባሪዮ እን ጉዋኖጝ ኣዬ ኣን ከኤልቅሞጝ ሃእን ካኣይኬ ክያጃ ሹቃ እንካ ጎቢንታጝ። {ኣይኔንካ ታቺ እን ጋዬ ጳውሎሱጝ} ¹² ከዋድማ ኔኒ ኣን ጌጳሲዬን እን ሻም ኣን ሹቃዬ ኮሙጝ፣ ሃጎሺባ ኢየሱስ ክርስቶስ ታቺ እን ጉዋዩ ኣያን ቁዋቅቱጝ። ¹³ ኣይኒን እባ ከሌሜን ካኣይ ውርካ ይርኔኑጝ፣ ውር ኬና ዋኬ ጆሌ ውሬ ካኣይ ውርካ ሴሶጝ፣ ከእን ሃማሬ እባጄኔ ሃማሬ ኣምኒዬኔ ናንዳካ ኦግታይ ሃሻሞጝ ሺዕሺሼያ ኣን፤ ¹⁴ ከእምነት ጊታይ ኣይኬ ኢየሱስ ክርስቶሴ ናሺማዬ ጁዋንትሼያ ኣን ኣይኔንካ ታቺ እን። ¹⁵ ኢየሱስ ክርስቶስ ናንዳካ ውር ጊታይካ ሴሶ ባይሺሼን ኩና ዮጝካ ዳሉጝ ክያጃ እን ሺጚ እያይ ሃእን ኣይ ኣኩሉኬ ውር ፓይላ ካናሺዮጝ፤ ከኦካ ውር ጊታይካ ሴሶዻ ኣይ ካሎኑጝ ሃኣን። ¹⁶ ኣይባዬ ኢየሱስ ክርስቶ ከጊታይ ኣምኒኬ እሺዬ ዻቆ እንካ ቦን ጮሉጝ ከቦወን ጊታይ ማር ሄክንሶ ኣኔኑጝ ከኦኬ ዶንሺዬን ኔኒዻ ከኦካ ጊታይ ከሴሶ ኣይ ካሎኑጝ ከኦናኒ ሻምኬ ሄክንሶዬ ካዹዋልሺኖጝ ሃጌይያ ሺዕሺኔን። ¹⁷ ኣኪ ከእን ኣይካ ቦን ጮሉጝ፣ ናንዳካ እን ማር ኣርሼኑጝ፣ ከእን ማር ጌይኔኔ ከቢቲ እን ኣይ እሺጵን ኣምላኬ ከቦን ጮል ሌይ ኣይ ቦን ጮሉጝ ጎቢንታዬ ጎሺዬ ካኣይ ኔኒ፤ ኣሜን። ¹⁸ ውዋ ናኒ ጢሞቴዎስ ዮ፤ ናንዳካ ሃሳዋ እን ሌምሼ ሃሳዎጝ ሃኣይባ እን ኤርጎጝ፤ እንዻ ከእሺ ዻዬን ኒሼኔን እን ኣይ ሹቃጝ ከኒሽባዬ ጊያ። ¹⁹ ኣኔባ እምነቴ ቃቦ ሹቃዬ፤ ውር ክየም ክየም ፓቅ ቃቦ ሹቃ እን ኣይ ጊዬይዬ ኬጋጊ ኮኑጝ ኦኬ ጋራ ሄክሼ ኛፓስ ክያኒዬ ካይዮጝ ካይሲያ እምነት ጊዬይ። ²⁰ ከማርኬ ኦካ ጫቃን ጊዬይ ይሬኔ ካጌዬ እርሮጝ እን ሳስክዬ ኣይ እን እጁጙጝ፣ ጌይባ ሄሜኔዎሴ እስክንድሮሴ።