¹ ከጳውሎስ፣ ከሲላሴ ከጢሞቴዎሴ፤ ጊታይ ኣይካ ባሪዮ ሹኔዬ ካኢየሱስ ክርስቶስ ታቺ እን ጉዋዩዬ ናንዳካ ቶኦካ ይሁኔን እንካ ውርካ ተሰሎንቆጝ፤ ከባሪዮ ከሹኔ ጉዋዩ ከታቺ እንዻ ከኢየሱስ ክርስቶስ ኣይኔኔ ሆፎዬ ካኣይሼባ እየው። {ናንዳካ እምነትካ ውርካ ተሰሎንቄ ጎሺ እን ሻሞጝ} ² ሃጶቅሲያ እየው ከይሁኔን ጉዋዩዬ ሹ ጮል ሃጎሺያባ ባሪዮ ናንዳካ እየው። ³ ዋድማ እን ጉዋዩ ኣይኬ እምነቱጝ፤ ናሺማ እን ጉዋዩ ኩንኬ ዻቾዬ ቃቦ ሹቃ እን ጉዩ ኣኔንኬ ኢየሱስ ክርስቶስ ታቺ እን ጉዋዩዬ ቁዋቅት እን ጉዋዩ ጌቶጝ ሹ ጮል ሃቃቢያባ ከኦካ ሌሜንካ ኣምላክ ጉዋዩዬ ሹቡጌን ጉዋዩዬ። ⁴ ጪኒጌን ጊታይ ጉዋዩ ናሺዬኬ ባሪዮጝ ዮ፤ እን እሺ እድዬ እየውጝ ሃእባጃያ፤ ⁵ ናንዳካኦ ክያጃ ሹቃ እን ጉዋዩ ኩኔ ሃሚን ጉዩጝ ሃኬ ቁዋቅትዬ ከመንፈስ ቅዱሴ ከኦኬ እባጄን ጁዋኑዬ ዬ ማርኬ ክያጃጵኔን። ፕር ሃሺጛ ናንዳካ እየውያጝ ከኦካ ጫቃን ጉዩ ሃቆብቴ እያኑጝ የእባጃያ። ⁶ እየው የሙኒናያ ኡዋዌ ታቺ እኔ፤ ኣይኒን ጋሎ ቁዋቃ ሄክሺኒን እየውጝ የቦዋያ ክያጃ ከዋዛካ መንፈስ ቅዱስ። ⁷ ከእን ናሹጝኬ ይንዻ ከኦካ ውር ጊታይ ኣኔን መቄዲያዬ ኣካይያዬ የማቲቴያ ሄክንሶ ባሺ። ⁸ ክያጃካ ታቺ እን ማርኬ እን ቱሌኬ ኦጉዩዬ ዋይኔ ከመቄዶንያዬ ኣካይያጵኔኔ እምነት እን ጉዩ ኣኔንኬ ባሪዮጝ እባጄና ኦካ ራቅ ፓይላ፤ ዬ ኡዋው ኦካ ክያጃጝ ኦኬ ክየምጵንዻ ሃሳወን ዎሺሽኬን ኡዋው። ⁹ የቦቴኬ ቦወን ኬና ኣኔን እያኔ ኣምላክ እን ኣይ እያይ ከኣኩሉክ ዋድምሼን ከሃምካ ኦግታይ ኣይኬ ኦካ ባሪዮ ሹኑኩጝ የሻማ እያን የዋክቶጝ እንግንዻ ሃሳውባ፤ ¹⁰ ፕርዻ እንካ ቲትኬ ኦካ ኣርሼኔ ከውዋ እን ኩንኬ ፎላ ዾዮኬ፣ ከኦካ ማኒት እንካ ኩዋውጝ የሻማ እያን ከካሊቴ ኢየሱስ እንካ ዻዓሺ ኡዋውጝ ሃሳውባ።