4 ¹ وعد الله لنا انه ندخل للراحة الإلهية مكانه قائم لحد الآن،لازم أنه ننتبه،عشان ما يُحرم منه أي واحد منكم. ² نحنا سمعنا البشارة مثلما سمعوها بني إسرائيل،لكن الرسالة اللي سمعوها ما نفعتهمش، لانهم سمعونه وما أمنوش فيبه. ³ أما نحنا اللي آمنَّا بالبشارة،بندخل للراحة الإلهية.قال على اللي ما همش مؤمنين :" أقسمت بغضبي،انهم ماشدخلوش لمكان راحتي." هذه الراحة، كانت جاهز من لما خلق الله العالمين. ⁴ يتكلم الوحي بالكتاب على اليوم السابع كذا :" استراح الله باليوم السابع من كل اعماله " ⁵ وبعدين قال بالفقرة اللي ذكرناها:" ماشدخلوش مكان راحتي."

⁶ فاللي سمعوا الإنجيل أول مرة،ما شدخلوش للراحة الإلهية بسبب عصيانهم، فالوضح انه الراحة الالهية شدخلوها آخرين. ⁷ عشان كذا حدد الله يوم آخر وقال عليه: "اليوم" وتكلم عنه بعد سنوات كثير بلسان داود بالآية اللي ذكرنه من قبل:"اليوم، إسمعوا دعوة الله، ولا تُقسُّوش قلوبكم." ⁸ لإنه لو كان يشوع دخّل الشعب للراحة الإلهية ،كان الله ما بيتكلمش بعد كذا على يوم ثاني. ⁹ إذن، في يوم راحة ثاني لشعب الله بيجي. ¹⁰ فاللي يدخل لراحة الله، يرتاح من عمله مثلما الله استراح من عمله. ¹¹ لازم نجتهد كلنا عشان ندخل للراحة الإلهية، وما حد يفشل مننا مثلما فشلوا اللي عصوا أمر الله. ¹² كلمة الله حيّة وفعّالة،وحدّ أكثر من السيف أبو حدين، وتخترق النفس والروح والمفاصل ونخاع العظام ، وتحكُم على افكار القلب ومشاعره. ¹³ مافيش مخلوق واحد يخفى على الله، كل شيء عُريان ومكشوف قدام عيون الله،هو اللي بنقدم له حساب على انفسنا. ¹⁴ مادام معنا رئيس عظيم،هو يسوع ابن الله، اللي طلع ودخل للسماوات، لازم نتمسك بإيماننا فيبه. ¹⁵ فرئيسنا العظيم هذا قادر إنه يعرف ضعفنا، لانه هو نفسه حصل المشاكل اللي نحصلها نحنا، لكنه هو ما عملش أي ذنب. ¹⁶ يجب انه نتقرب بثقة لعرش الله مكان النعمة، من شان نحصل رحمة ونعمة تساعدنحنا وقت الحاجة.