2 ¹ عشان كذا لازم نهتم كثير بالكلام اللي سمعنوه من شان ما نضلش. ² فحنا نعرف انه كل كلمة نقلته الملائكة،ثبت انها صحيحة، واللي ما طاعها حصل عقابه العادل. ³ فكيف بنهرب نحنا من العقاب إذا تركنا هذه النجاة العظيمة؟ فالرب يسوع نفسه هو اللي تكلم فِيبه أول شيء، وبعدين أكدونيه لنا اللي سمعنوه منه مباشرةً. ⁴ و أيّد الله شهادتهم بآيات وعجائب ومعجزات من كل نوع،وبالمواهب اللي وزعها الروح القدس حسب مشيئته. ⁵ الآخرة اللي نتكلم عنه،الله مخليهش تحت سيطرة الملائكة. ⁶ لانه مكتوب بمكان داخل الكتاب:" من هو الإنسان عشان تفكر فيبه؟ ولا ابن الإنسان عشان تهتم فيبه؟ ⁷ خليته لوقت قريب أقل من الملائكة، وبعدين رفعتُه بالجلال والكرامة، وجبت له السلطة على كل شيء خلقته بيدك. ⁸ وخليت كل شيء تحت ارجله." وما دام الله خلي كل شيء له، يعني انه ما خليش أي شيء خارج سيطرته.بس نحنا بالوقت الحاضر عادنحنا ما نشوفش كل شيء تحت سلطته. ⁹ لكن نشوف يسوع اللي الله خلوه لوقت قريب أقل من الملائكة،الآن عليه تاج الجلال والكرامة، لانه أتألم ومات. وبنعمة الله يسوع مات من شان كل الناس. ¹⁰ الله هو اللي خلق كل شيءبقدرته، وكل شيء له، وقرر انه يجيب أبناء كثيرين لجلاله، خلي قائدهم للنجاة يكمل عمله بواسطة الألم.

¹¹ فيسوع اللي يُطهِّر والأشخاص اللي طهرهم،كلهم من أب واحد.عشان كذا يسوع ما يستحيش يدعي للمؤمنين فيبه يا اخواتي. ¹² فيقول :" بتكلم باسمك لإخوتي،وشاسبحك بين شعبك." ¹³ ويقول كمان :" شتوكل على الله." وكمان: " أذانه مع الأولاد اللي جابهم الله ليَّا."

¹⁴ وبما انه هذوم الأولاد هم بشر من لحم ودم، فالمسيح نفسه رجع بشر مثلهم، عشان يموت ويتخلص من إبليس الذي له سلطة الموت، ¹⁵ ويحرر اللي كانوا طول حياتهم عبيد للخوف من الموت. ¹⁶ فالواضح انه جاء موش عشان ينقذ الملائكة ، لكن اجاء من شان ينقذ ذرية ابراهيم. ¹⁷ فكان لازم انه يشبه إخوته بكل شيء، عشان يكون رئيس الشيوخ الرحيم الأمين، اللي يخدم الله ويكفر عن ذنوب الناس. ¹⁸ ولانه هو نفسه أتألم، فهو قادر انه يساعد اللي هم بمشكلة.