¹ ومادام المسيح توجع بجسمه، خليكم أنتم كمان مُستعدين تستوجعوا مُثله، لأنوه اللي يستوجع بجسمه، يكون بعيد من الخطية، ² فيعيش باقي عمره بالأرض موش بحسب الشهوات اللي تتحكم بالواحد، فيعيش بحسب اللي يشتي الله. ³ يكفيكم الوقت اللي ضاع اللي كنتم تعيشوا فيبه وتعملوا الحاجات اللي يعملها الكفار، فكنتم تعيشوا بالدعارة والشهوات والسُكر وحفلات الخلاعة والعربدة وعبادة الأصنام الخبيثة. ⁴ وذلحين هُم مستغربين منكم ما تمشوا معاهم بهذه بالحاجات الوسخة، وعشان كذا يسبوا لكم. ⁵ ولاكن هُم شيتحاسبوا قدام المسيح اللي يحاسب الأحياء والأموات. ⁶ والسبب هذا اللي وصل رسالة الإنجيل حتى للناس الميتين، عشان يكونوا أحياء بالروح عند الله، واما اجسامهم قا حكم عليها بالموت نفس كُل الناس.

⁷ نهاية كُل شيء قده قريب، خليكم عاقلين ومنتبهين عشان تصلوا كُل وقت. ⁸ وأهم حاجة خلوا المحبة بينكم البين بقوة، فالمحبة تغفر خطايا كثيرة. ⁹ كُل واحد يضيف الثاني بنفس طيبة. ¹⁰ كُل واحد علوه يخدم الناس الثانيين بالموهبة اللي جابه الله له. نفس وكلاء صالحين مؤتمنين على المواهب اللي يجيبها الله بالنعمة. ¹¹ فالكلام اللي يقوله يكون كلام الله، واللي يخدم علوه يخدم بالقوة اللي جابها الله له. عشان يتمجد الله بكل حاجة، بيسوع المسيح، له المجد والقوة إلى أبد الآبدين. آمين. ¹² يا إخواني، ما تستغربوش من المشاكل الحاصلة عندكم اللي تختبركم. فما تشوفهاش حاجة غريبة تحصل لكم، ¹³ وإنما زيدوا افرحوا عشان اِنكم تتوجعوا مثلما اتوجع المسيح، عشان تفرحوا كثير لما يظهر مجد المسيح. ¹⁴ لو أنتم تحصلوا سب عشان اسم المسيح فهنيت لكم، لأن الروح المجيد روح الله، يستقر علوكم. ¹⁵ ولو كان واحد منكم يستوجع، ما يكونش بسبب قتل أو سرقة أو جريمة ثانية أو يدخل بحاجات الناس الثانيين. ¹⁶ أما لو استوجع بسبب أنوه مسيحي، علوه ما يستحيش، فعلوه يسبح الله عشان أنوه يحمل اسم المسيح ¹⁷ قا جاء وقت الحساب، والبداية بشعب الله. ولو كان الحساب يبدأ فيبنا إحنا، فكيف نهاية اللي ما يأمنوش بإنجيل الله؟ ¹⁸ فإذا كان الإنسان الصالح صعب علوه ينجي، فكيف الإنسان الكافر والمذنب؟

¹⁹ إذن اللي يستوجعوا مثلما يشتي الله، علوهم يسلموا انفسهم للخالق الأمين، ويداوموا على عمل الخير.