¹ နင်ကအသင်းဝင်ရက်စာ တိုင်းပြည်အုပ်ချူပ်ကလူရက်အိမ်း အခွင့်အာဏာငါဟေက လူ့ရက်အင် ပုန်ကန်ကိုခြားနားခြင်း အလုပ်မားသတိအီယင့်။အမှာရက်စာ အကူညီစိုးဟေက လူရက်အင် ကူညီအီကဇိဉ် အစဉ်အမြဲအဆင်သင့်ဖြစ်စီဉ်ကို။ ² အရန်းစိုးကိုရိုင်းပြဟေကအမူအရာ ငါဟေပီ(ရ်)ဟေက အပီ(ရ်)မား သတိအီယင့်။အသင်းသားရက်အင် လူတိုင်းယင်သနားကြင်နာကို သိမ်မွေ့မား ဆက်ဆံပေါင်းသင်းက ထောင့်မားဆနိန်အီးယင့်။ ³ တစ်ချိန်ယာ ညီရက်ကိုယ်တိုင်ဒင်း မိုက်မဲဟေက၊အနာခံက၊ရူးမိုက်ဟေကရက်အင် လုပ်တက်ကို အပျော်အပါးရက်အိမ်း အလိုဆန္ဒအမျိူးမျိူးရက်အင် အစဉ်းစားအတွေးခေါ်ထမ်း လုပ်တက်ဟေ။ ညီရက်ကမား အမီကရက်အိမ်းအနာလိုကရက်အ(လ်)ငါဟေ။ လူ့ဟိုက်တာနိန်ယား ညီရက်အင် အပေါ်ကက်ကဒေ ညီရက်အ(လ်) လူတစ်ဖက်သားယင် အပေါ်ကက်ပါ(လ်)။ ⁴ ညီရက်အင် ကယ်တင်ဟေက ဘုရားရှင်စာ ညီရက်ကအပေါ်ယာပီဟေက ကရုဏာရက်အိမ်း၊ မေတ္တာတော်ရက်က ကြီးမြတ်ကြောင်းယင် ပေါ်လွင်ကိုထင်ရှားဇိဉ်ဟေ။ ⁵ ညီရက်က အပျက်ယွင်းကသစ္စာငါဟေက၊ညီရက်ကသူတော်ကောင်း ဖြစ်ကအရိမ်ထမ်း ဘုရားရှင်ကမဟာဂရုဏာအိမ် ကယ်တင်ဟေကဖြစ်ဟေ။ ဘုရားဝိညာဉ်တော်အိမ်း ညီရက်က အပြစ်ရက်အင် ကစမ်းအီကိုသန့်စင်အီကို ညီရက်အင် အယောက်ကနန်း ပြန်ကိုကယ်အီကဖြစ်ဟေ။ ⁶ ဘုရားရှင်စာ ညီရက်ကကယ်တင်ရှင်ကိုယ်တော်ယေရူယင် ဖြောင်နက်အန်ကို အမှာက မြင့်မြတ်ဟေက ဝိညာဉ်တော်ယင် ညီရက်ကအတွက် ရက်ရက်ရောရောအီဒက်က ဖြစ်ဟေ။ ⁷ ကိုယ်တော်ယေရူကကျေးဇူးတော်အိမ်း ဘုရားရှင်က ညဏ်အလင်းတော်စာ ညီရက်ကအပေါ်ယာ ထုတ်ဇိဉ်ကို “နိစ္စထာဝရ အဆက်”ငါဟေက မျှော်လင့်ချက်ရက်ငါဗား(ဖ်)ကဟေ။ ⁸ မှမင်္ဂလာသတင်းယင်ယုံကြည်စိတ်ချယင့်။မှဆုံးမသွန်သင်ချက်ရက်စာ လူတိုင်းကအတွက် အကူအညီဖြစ်ဇိဉ်ကို အဖိုးတန်အသုံးဆင်ဟေ။ ငါစာ နနိန်ရက်အင် ဘုရားရှင်ကအတပည့်ရက်ဖြစ်ဇိဉ်က အတွက် အပြင်းအထန်လိုလားဟေ။ ဘုရားရှင်ယင် ယုံကြည်ကလူ့အပေါင်းရက်စာ မီဟေက အမူအကျင့်ရက် ကောင်းမူကုသိုလ်ရက်မယ် လုပ်အန်ကအမှန်ဖြစ်ဟေ။ ⁹ မှအကြောင့် ဘိုးဘေးစဉ်ဆက် အကြောင်းတရားရက်အိမ်း ဘာသာရေးပညတ်တော်ရက်ကအတွက် မိုက်မဲဟေက ငြင်းခုံဟေက ရှောင်ကြည်ယင့် ။ ¹⁰ ပြဿနာဆုံးဟေကလူ့ရက်အင် ဟက်တာ(သို့မဟုတ်) နိန်ဟက်သတိအီယင့်။ အိမ်မှားဒေလေ သတိအီကျီးကရပ် အိမ်မားလူရက်အိမ်း အယောက်ဟက်တာ အတောင်ထဲ့ဟေ။ ¹¹ အမှာရက်စာ သမ္မာတရားယာဘင်း အဆေးကိုအပြစ်တရားရက်အင် အပါနာကအပါနာ ပြုမူစီရင်လင်ကဟေ။ ¹² အာတေမ(သို့မဟုတ်)တုခိတ်ယင် နနိန်ရက်ကမား ဖြောင်းနက်အန်ကဇိဉ် ငါစီစဉ်တုံးဟေ။ အမှာထုတ်ဗား(ဖ်)ကရပ် နိကောပလိမြို့ယာ ငင်လက်ကဇိဉ် ကျေးဇူးပြုကိုကြိုးစားယင်ဂီး။ အိမ်မားနေရာယာ ဆိမ်ဟတ် ဆုံမားတုံးကဇိဉ် ဆုံးဖြတ်ပီဟေ။ ¹³ ရှေ့နေဖြစ်ကလူ့ဇနအိမ်း အာပေါလုရက် ခရီးပြုလင်ကရပ် လိုလေသေးအငါမား အစွမ်းကုန်ကူညီယင့်။ ¹⁴ အပါနာက လူရက်အင် တန်ဖိုးငါဟေကအချိန်ရက်အင် အကျိူးငါမား အသုံးပြုကဇိဉ် ဆုံးမကိုဆနိန်အီယန်။ အရေးပေါ်အကူအညီစိုးတုံးကလူ့ရက်အင် ချက်ချင်းကူညီယင့်။မီဟေကအကျင့် အိမ်းတုံးကဇိဉ် ဆုံးမအီယင့်။ ¹⁵ မှနေရာယာငါဟေက လူ့စုတ်ရက်အင် နူတ်ဆက်အန်နက်မက်။ညီရက်အင် ယုံကြည်ကို မေတ္တာပီဟေက လူ့ရက်အင်ယဲ့ နူတ်ဆက်အန်နက်မက်။ နနိန်စုတ်ရက်ကအပေါ်ယာ ဘုရားရှင်က ကရုဏာတော်၊မေတ္တာတော်ရက် ဆက်လက်ကိုထုတ်ကဇိဉ် ဆုစိန်ကိုအီနက်ဟေ။