11 ¹ AYabẽ n de Hatɩsɔɔrɩ naba, n wõm Azoze n zɛbɛ yãŋɛ se’em wuu la, a tõm na nẽrba Ayobaabɩ n de Madõnnɩ naba, la Sĩmidõ nã’adõma, la Akɩsapɩ, ² la baa la sɛba n kẽ’erɩ tẽŋa la zʋʋgɔ bɔ ba tɩ tãnsɩ boe mi na, n boe Zʋrdẽ zẽ-peele tẽŋasʋka , Zenezarɛtɩ mõgrɛ gɔbga bɔ ba, la Dɔɔrɩ tẽŋa n boe wẽntulle zanõa bɔ ba. ³ A yele Kanaan dõma sɛba n kẽ’erɩ dapɔa, la zanõa bɔ ba la wuu, la Amõorɩ dõma, la Ititi dõma, la Ferezẽ dõma, la Yebuse dõma sɛba n kẽ’erɩ tãnsɩ zuto la, la Eveyẽ dõma sɛba n kẽ’erɩ lɛm Ɛɛrmõnɩ n boe Mĩspa so’olʋm na wuu. ⁴ Nadõma bãma wuu daan nãagɛ la taaba, la ba zɛbzɛbrɩba wuu sɛla sɛla ka pɔ’ɔgɛ. Ba daan de la nẽrba zo’ozo’e wʋ ko-kãtɛ nõorʋm tẽntõn-bĩ’isgo la. Ba daan tarɩ la wemõosɩ zo’ozo’e dee tara zɛbrɛ wiiri toto zo’ozo’e. ⁵ Ba tẽesɛ taaba tɩ, ba yakɛ taaba Merõ tẽŋa ko’om na nõorʋm, dee yãŋa sẽŋɛ ka zɛbɛ la Ɩsrayɛlɩ. ⁶ Tɩ Nawẽnnɛ n ka tarɩ ba’asgɔ yele Azoze yetɩ: « da zoe dabeem, se’ere n soe la, beere wakatɛ [wãna mã’a] ẽna, mam wʋn dɩkɛ ba wuu ẽŋɛ la ya nũ’usũm, tɩ ya pɔglõm ba tɩ ba ãna wʋ ba ki mɛ na. Tɩ fʋ wã (fãsɛ) ba wemõosɩ la kɔɔla zĩila basɛ ba, dee yõ ba zɛbrɛ wiiri toto la. ⁷ Tɩ Azoze la a sʋdaasɩ la sẽŋɛ ka liŋe ba Merõ ko’om nõorʋm zɛbra la ba, zoe saagɛ ba. ⁸ Tɩ Nawẽnnɛ n ka tarɩ ba’asgɔ dɩkɛ ba ẽŋɛ Ɩsrayɛlɩ dõma nũ’usũm, tɩ ba tã’agɛ ba, dige ba, tɩ ba zoe halɩ ka paagɛ Sidõ n de tẽn-kãtɛ,tole [sẽŋɛ](halɩ) ka paagɛ Mĩsrefɔtɩ, la Mayimi, halɩ ka paagɛ Mĩspa zẽ’e-sɛka n nãa-taaba la dapɔa bɔ ba. Tɩ Nawẽnnɛ basɛ tɩ ba tã’agɛ ba zo’ozo’e, halɩ tɩ ba ka basɛ nẽra nẽra tɩ a vʋa. ⁹ Azoze ẽŋɛ ba wʋ Nawẽnnɛ n ka tarɩ ba’asgɔ n bɔ ẽ nõorɛ se’em na: tɩ a wã ba wemõosɩ kɔɔla zĩila basɛ , dee yõ ba zɛbrɛ wiiri toto. ¹⁰ Wakatɛ ẽŋa mẽŋa, daan lɛbrɩ la,tɩ Azoze to’oge Hatɩsɔɔrɩ n daan de ba so’olʋm na wuu na-tẽŋa. Dee kʋ a naba la sʋkɔbgɔ. ¹¹ Dee sɛ sɛba wuu n boe tẽŋa la pʋam vɔ’ɔsra la sʋkɔbgɔ, ka tolle basɛ sɛla n vo’osrɩ tẽŋa la pʋam, ka ẽŋɛ ba wʋ Nawẽnnɛ n ka tarɩ ba’asgɔ n yele se’em na. dee yõ tẽŋa la bugum. ¹² Dee to’ose nã-sɛba wuu n daan naagɛ nõorɛ la tẽnsɩ. Yõgɛ ba na-dõma botɩ ba kʋ ba,dee kʋ nẽr-sɛba n kẽ’erɩ ba tẽnsʋm na wuu, wʋ Nawẽnnɛ n ka tarɩ ba’asgɔ n yele ba se’em na, tɩ Amoyisi n de Nawẽnnɛ n ka tarɩ ba’asgɔ tõntõnna bɔ ba nõorɛ se’em na. ¹³ La Ɩsrayɛlɩ dõma ka yõ tẽn-sɛba n boe tãnsɩ zuto la, sãn dagna Hatsɔɔrɩ mã’a tɩ Azoze botɩ ba yõ ẽ na bugum. ¹⁴ Ba vaagɛ bõntarsõm zo’ozo’e, la tẽŋa la dũnsi wuu, dee sã’am tẽŋa la wuu ka basɛ nẽra baa ayɩla. ¹⁵ Azoze doose lɔɔ sɛba wuu tɩ Nawẽnnɛ n ka tarɩ ba’asgɔ daan yele a tõntõnna Amoyisi, tɩ ẽŋa mẽ dɩkɛ yele ẽ na. A ka basɛ lɔɔ baa ayɩla. ¹⁶ La de la wãna tɩ Azoze to’oge tẽŋa la wuu: tẽn-sɛka tɩ tansɩ boe mĩ zo’ozo’e, la Nɛgiye. La Gosẽ, la tẽn-sɛka n de zẽ-peele la, la Zʋrdẽ kʋlaaga la tẽn-sɛba tɩ tansɩ zo’ozo’e boe mĩ na, la zẽ-pɛɛl-sɛba n boe wẽntulle zʋʋgɔ bɔba. ¹⁷ Ba yõgɛ na-dõma la wuu kʋ ba Halakɩ tãn-wok-woko n gã’arɛ sẽŋɛ ka paagɛ Seyiiri gɔbga bɔba, halɩ ka paagɛ Baal-Gadɩ, Libã kʋlaaga sigra lɛm na tãŋa la tillum Ɛɛrmõnɩ tãŋa wẽntulle zʋʋgɔ bɔba. ¹⁸ A dɩkɛ la yʋʋma zɛbɛ la na-dõma la wuu. ¹⁹ Tẽŋa baa ayɩla ka boe n yẽ sũmã’asʋm la Ɩsrayɛlɩ dõma, sãn dagna Gabawõ tẽŋa tɩ Eveyẽ dõma kẽ’erɩ mĩ na n yẽ sũmã’asʋm la Ɩsrayɛlɩ dõma. Tẽn-sɛba n dee la wuu ba dɩkɛ la zɛbrɛ lɔgrɔ zɛbɛ to’ose ba. ²⁰ Yel-ẽna ze’ele la Nawẽnnɛ n ka tarɩ ba’asgɔ zẽ’a, Nawẽnnɛ n boorɩ tɩ ba sũure diglʋm la Ɩsrayɛlɩ dõma, la wʋn ẽŋɛ se’em tɩ ba zɛbɛ la Ɩsrayɛlɩ dõma lɛ. Bɛla ĩyã tɩ ba wʋn sã’am ba wuu, kʋ ba waa wuu, ka tole (makɛ) zoe nĩnbãalga wʋ Nawẽnnɛ n ka tarɩ ba’asgɔ n yele se’em na,wʋ Nawẽnnɛ n ka tarɩ ba’asgɔ n bɔ Amoyisi nõorɛ se’em na. ²¹ Wakatɛ ẽŋa mẽŋa Azoze sẽŋɛ ka kʋ Anakimi dõma wuu n kẽ’erɩ Ebrõ tansɩ zuto, la Dabiiri, la Anaabɩ, la Zuda tansɩ zuto, la Ɩsrayɛlɩ tãŋa zuugo la. A daan kʋ ba wuu mɛ, dee sã’am ba tẽnsɩ la wuu, wʋ Nawẽnnɛ n ka tarɩ ba’asgɔ n yele se’em na. ²² Anakimi nẽra baa ayɩla ka weege bɔna Ɩsrayɛlɩ dõma tẽŋasʋka, sãn dagna Gaza,Gatɩ, Hasdɔɔdɩ tẽnsɩ ma’a pʋam tɩ ba weege bɔna.