10 ¹ Adoni-Sedɛkɩ n de Zerizalɛm naba wõm mɛ tɩ Azoze to’oge Ayi mɛ, a daan sã’am tẽŋa la wuu mɛ, tɩ a wɔɔgɛ Nawẽnnɛ n ka tarɩ ba’asgɔ yʋ’ʋrɛ. Ba daan sã’am tẽn-ẽŋa la a naba wʋ ba ẽŋɛ Zeriko la naba se’em na. A len wõm mɛ tɩ Gabawõ la Ɩsrayɛlɩ dõma wõm taaba mɛ tɩ laafɛ bɔna ba tẽŋəsʋka, dee tɩ ba vʋa Ɩsrayɛlɩ dõma tẽn-sʋka. ² Wakatɛ ẽŋa tɩ dabeem kẽ ẽ zo’ozo’e, se’ere n soe la, Gabawõ tẽŋa la de la tẽŋa n tarɩ yõorɔ wʋ na-tẽnsɩ. La akãrgɛ gãnna Ayi mɛ, dee tɩ a bʋraasɩ wuu mĩna zɛbrɛ sõŋa. ³ La de la bɛla tɩ Adoni-Sadɛkɩ n de Zerizalɛm naba, tõm kõa Aohãm n de Ebrõ naba, la Apiram n de Yamuti naba, la Ayafɩya n de Lakisi naba, la Adebiiri n de Aglõ naba, tɩ b aka yele ba yetɩ: ⁴ «Wa’am ya wa sõŋɛ ya ma, tɩ m zɛbɛ la Gabawõ dõma, se’ere n soe la, a nẽrba naagɛ la nõorɛ tɩ laafɛ bɔna bãma la Azoze la Ɩsrayɛlɩ dõma tẽŋasʋka. ⁶ Gabawõ dõma daan tõm na nẽrba, tɩ b aka yele Azoze n boe Gilgalɩ zĩ’irgo zẽ’a na. Da basɛ ka sõŋɛ tõma n de fʋ tõntõnnɩba la, wa’am ya tɔtɔ wa sõŋɛ tɔ, fãagɛ tɩ basɛ, se’ere n soe la, Amoriyẽ na-dõma n boe so’olʋm ẽna tãŋa zuo la, mãasʋm mɛ tɩ ba zɛbɛ la tõma. ⁷ Tɩ Azoze ze’ele Gilgalɩ wa’am la sʋdaasɩ la wuu, la sʋda-kɛ’ɛndõma, kɛ’ɛndõma. ⁹ BA Ze’ele la Gilgalɩ sẽŋɛ yʋ’ʋŋɔ la wuu, la,Azoze sẽŋɛ ka lĩŋɛ ba mɛ. ¹⁰ Nawẽnnɛ n ka tarɩ ba’asgɔ basɛ mɛ tɩ ba zoe wɩrgɛ Ɩsrayɛlɩ dõma nẽŋam, tɩ Gabawõ dõma tã’agɛ ba tã’arɛ sɩra sɩra. Ɩsrayɛlɩ dõma tã’agɛ ba, dige ba so-sɛka n dollɩ Bɛtɩ-Oorõ tẽŋa bɔba, halɩ ka paagɛ Azeka la Makeda. ¹³ Tɩ wẽntɛɛŋa ze’ele, tɩ wõrga mẽ ze’ele ka le sẽnna, halɩ ka paagɛ wakatɛ sɛka tɩ Ɩsrayɛlɩ dõma tã’agɛ ba bɛ’ɛba. La ẽŋɛ wʋ la gʋlsɛ se’em, sɛka n masɛ gõŋɔ pʋam na. wẽntɛɛŋa daan ze’ele mɛ yuuge paagɛ dabsrɛ mõonɛ. ¹⁴ Lan dẽŋɛ daarɛ ẽŋa, la daarɛ ẽŋa poorʋm, tɩ nãn ka yẽ daarɛ ẽŋa buuri, tɩ Nawẽnnɛ n ka tarɩ ba’asgɔ selse nẽra yetɔga. Se’ere n soe la, a mẽŋa n daan zɛbrɩ bɔ’ɔra Ɩsrayɛlɩ. ¹⁵ Bɛla poorʋm, Azoze la sʋdaasɩ la wuu lebe la Gilgalɩ ba zĩ’irgo zẽ’a. Ba yõgɛ dee kʋ na-sɛba tɩ ba yãŋɛ ba la. ¹⁶ La, zɛbrɛ la wakatɛ, na-dõma banuu la zoe põsɛ mɛ sẽŋɛ Makeda ka sʋgɛ gʋgʋrgɔ pʋam. ¹⁷ Tɩ ba daan yẽ ban n sʋgɛ bɔna gʋgʋrgɔ la pʋam na, wa’am wa yele Azoze. ¹⁸ Tɩ Azoze bɔ nõorɛ yetɩ: «Ba bilge kug-kãra yʋ {lige} gʋgʋrgɔ la nõorɛ dee botɩ bʋraasɩ bɔna mĩ gu’ura. ¹⁹ Da kã yuuge ya sore, pʋgɛ ya bɛ’ɛba la, guy a ba tɩ ba da kã tã’agɛ lebe. Da basɛ ya tɩ ba kẽ ba tẽnsʋm, Nawẽnnɛ n ka tarɩ ba’asgɔ bɔ ya nõorɛ mɛ tɩ ya yãŋɛ ba». ²⁰ Azoze la Ɩsrayɛlɩ dõma daan zɛbɛ tã’agɛ mɛ fasɩ fasɩ sãn dagna nẽr-sɛba n zoe põsɛ lebe ka kẽ ba tẽn-sɛba tɩ ba mẽ lal-kãra kãagɛ ba la pʋam. ²¹ Bɛla porʋm, nẽrba la wuu leme Azoze zẽ’am mɛ Makeda, tɩ sɛla sɛla ka ẽŋɛ ba. Dee tɩ nẽra ka le bɔna ba tẽŋa la pʋam tɔgra zɛbrɛ yelle la Ɩsrayɛlɩ dõma. ²² Azoze daan bɔ nõorɛ yetɩ: «Bilge ya kug-kãra la gʋgʋrgɔ la nõorʋm dee yõgɛ na-dõma banuu la tarɩ wa bɔ ma» ²³ Tɩ ba ẽŋɛ bɛla, tarɩ na-dõma banuu la n boe gʋgʋrgɔ la pʋam na wa’am wa bɔ ẽ, la de la Zerizalɛm naba, la Ebrõ naba, la Yamuti naba, la Lakisi naba, pa’asɛ la Eglõ naba. ²⁴ Wakatɛ sɛka tɩ ba bomi yõgra ba yɛsra la, tɩ ba tarɩ ka bɔ ẽ na, Azoze wi la Ɩsrayɛlɩ bʋraasɩ la wuu, dee wi ba sʋdaasɩ la kɛ’ɛndõma n daan naagɛ la ẽ zɛbɛ la tɩ ba wa’am. Sẽŋɛ ya lɛm, dɩkɛ ya nãma dɔglɛ na-bãna kã’ara zuto. Tɩ kɛ’ɛndõma la sẽŋɛ lɛm ẽŋɛ bɛla. ²⁵ Azoze yetɩ: «Da zoe ya dabeem, da basɛ ya tɩ ya palɩŋa ẽkɛ, yẽ ya bʋraanɛ dee ze’ele sõŋa». La de la bɛla tɩ Nawẽnnɛ n ka tarɩ ba’asgɔ wʋ ẽŋɛ ya bɛ’ɛba la wuu, tɩ ya zɛbrɩ la ba lɛ la, tɩ ya yãŋɛ ba. ²⁶ Bɛla poorʋm Azoze kʋ ba mɛ, dee bob a lʋ ba la mĩ’isi yunte, tɩɩsɩ banuu zuto. Tɩ ba yula bilam halɩ ka paagɛ zaanõorɛ. ²⁷ La wẽnnɛ n wa luta la, tɩ a bɔ nõorɛ yetɩ ba lorge ba kũm na ka lobge gʋgʋr-sɛka pʋam tɩ ba daan zoe ka sʋgɛ la pʋam. Dee botɩ ba bilum kug-kãra lebe yʋ gʋgʋrgɔ la nõorɛ. Tɩ kuga la ken bɔna mĩ halɩ wa paan zĩna. ²⁹ Azoze la Ɩsrayɛlɩ dõma daan ze’ele la Makeda tole ka zɛbɛ la Libna dõma. ³⁰ Nawẽnnɛ n ka tarɩ ba’asgɔ daan dɩkɛ Libna la a naba ẽŋɛ Ɩsrayɛlɩ dõma nũ’usum tɩ ba kʋ bõn-vɔɔsɩ n beo tẽŋa la pʋam na wuu ba’sɛ. Azoze ẽŋɛ ban aba wʋ ẽn daan ẽŋɛ Zeriko naba se’em na. ³¹ Azoze la Ɩsrayɛlɩ dõma ze’ele la Libna sẽŋɛ Lakisi ka ẽŋɛ ba zĩ’irgo zẽ’a tẽŋa la nẽŋam tɩ ba zɛbra la ẽ. ³² Tɩ Nawẽnnɛ n ka tarɩ ba’asgɔ dɩkɛ ba ẽŋɛ ba nu’usũm, tɩ ba yãŋɛ ba dabsa atã daarɛ. Kʋ ba la sʋkɔbgɔ, dee kʋ bõn-vɔɔsɩ wuu n boe tẽŋa la pʋam, wʋ bãn n daan ẽŋɛ Lidna se’em na. ³⁴ Azoze la Ɩsrayɛlɩ dõma daan isge la Lakisi wɛ’ɛsa Eglõ. Ka ẽŋɛ ba zĩ’irgo zẽ’a tẽŋa la zanõrɛ bɔba zɛbra la ba. ³⁵ Ba daan to’oge tẽŋa la da-ẽŋa mẽŋa, dee kʋ ba la sʋkɔbrɔ. Ba daan kʋ bõn-vɔɔsɩ wuu n boe tẽŋa la pʋam, wʋ Nawẽnnɛ n ka tarɩ ba’asgɔ n yele se’em na. Ba ẽŋɛ ba wʋ ban daan ẽŋɛ Lakisi dõma se’em na. ³⁶ Azoze la Ɩsrayɛlɩ dõma ze’ele la Eglõ wɛ’ɛsa Ebrõ tɩ ba zɛbɛ la ba. ³⁷ Ba daan to’oge tẽŋa la mɛ, dee kʋ ban aba, la bõn-vɔɔsɩ wuu n boɛ tẽŋa la pʋam, la tẽn-sɛba wuu tɩ ba soe la pʋam ka basɛ sɛla sɛla, wʋ bãn n daan ẽŋɛ Eglõ se’em na. Azoze sã’am tẽŋa la wuu mɛ, dee kʋ bõn-sɛba n vɔɩ mĩ na wuu, Nawẽnnɛ n ka tarɩ ba’asgɔ n yele se’em na. ³⁸ Bɛla poorʋ, Azoze la Ɩsrayɛlɩ dõma le wa’am na Debiri wa zɛbra la ba. ³⁹ Ba daan to’oge tẽŋa la mɛ, yõkɛ ban aba dee to’oge tẽn-sɛba wuu tɩ ba soe la. Ba daan kʋ tẽŋa la bõn-vɔɔsɩ wuu mɛ, Nawẽnnɛ n ka tarɩ ba’asgɔ n yele se’em na, ka basɛ sɛla sɛla, wʋ bãn n ẽŋɛ Ebrõ se’em na. Azoze ẽŋɛ Debiri la a naba wʋ ẽn daan ẽŋɛ Libna la a naba la se’em na. ⁴⁰ Azoze daan to’oge tẽŋa la wuu mɛ. A yãŋɛ so’olʋm sɛba wuu n boe tansɩ zuto na-dõma, la Negevɩ dõma, la tẽn-sɛba boe mõgrɛ nõorʋm, zẽ-peelõm, la zẽ-sɛba n boe tãnsɩ tillum. A daan kʋ bõn-vɔɔsɩ wuu mɛ ba’asɛ. Nawẽnnɛ n ka tarɩ ba’asgɔ n daan yele se’em na. ⁴¹ A daan to’oge Kadɛsɩ-Barɩneya so’ol’um ka paagɛ Gaza, la Gozẽ halɩ ka paagɛ gabawõ so’olʋm. ⁴² Bʋyɩla ma’a tɩ Azoze daan yese zɛbɛ, yãŋɛ, na-dõma wuu, dee to’ose ba tẽnsɩ. Se’ere n soe la, Ɩsrayɛlɩ Nawẽnnɛ n ka tarɩ ba’asgɔ n daan zɛbrɩ bɔ’ɔra a nẽrba. ⁴³ Bɛla poorʋm, Azoze la Ɩsrayɛlɩ dõma le lebe la Gilgalɩ ba zĩ’irgo zẽ’a.