¹ Eto iji isapa amita ambo ta Mama Otohu ta jango indari iji amite Bada na amita ambotane ga ebmomei ta koni urari pure jo aita ahe eto pahuo beuje unu Bada ta ambotane ihiketo koni eha gasa aisi ere ua amita ajoro avo hoeto indiera. ² Rate ari ainge ora avo Moses ta avotari ke pepeni simba ari embomei na kito, enana na Bada ta dei ke einge ea, ''ki, no ambotane na pure ovi do ere ora amo avotari ke pepeni aita Mama otohu ta jango indari iji te ara ari kajari irae avo ere ora.'' Ainge ea. ³ Rate Bada na enana ta dei ke mine einge ena, eto ungo David te amita embomei amiga ere ua amina beuje enu enana na do uera avo kajari mihia amo ungo eheketo kiae rete? ⁴ Eto David na amita embomei amina amiga ere ua amina Mama Otohu jakeka ari bande jo aita horeto pambuto Mama Otohu ta ambe bande avo simba ari Mama na ikeoi iriuja avo umbuto indiera amo embomei teho na indora ari avotari ke pepeni aita avora ari ikari kajari irae avo enana na ambe aravo umbuto indiera, rate Moses ta avotari ke pepeni aita ambe bande jo ta avo indoja avora ari ikari kajari mihia amo bande amita giu pari ikari Mama mane na pere indisora avo ari kajari mihia. ⁵ Eto Moses ta avotari ke pepeni aita kajari mihia avo ungo mahu eheketo kegueva amore Mama Otohu ta jango indari iji amite Mama mane giu ari bande otohu jo aita iriora amina Mama Otohu ta jango indari iji amite o pure nei do mane ara ari avotari ke pepeni ai kajari avo enana na iji amite uera, rate Mama Otohu na Mama mane avo samuna ae ainge avo kegua amo do au? ⁶ Rate Nane ungota dei ta ere na amo Embo vahi pajire be bande otohu erevi serikari amore oroho ei ungo ga mihia. ⁷ Eto Harika embo Hosea na ke emo mahu kajari mihia amina ke amo einge eria, 'Na jojoga ari avo uje ona rate o teto heveto peneha gaga ta ikari avo na uje ae ra ainge eria, avoeto ungo ke emina do ijie eria avo be keisova kito amo embomei amina avotari poekae teho amo mane kasasova. ⁸ Amita be avo Embo ta Mei amo Jango indari iji amita Tihi jigari Embo be ra.'' ⁹ Eto Bada koni uru jo ta mihija avo toto pambuto enana ta giu ari bande otohu amita jo ta horinu. ¹⁰ Avore embo vahi ingeni popora ari avo bande otohu amita pe ai heteto mihina avo Moses ta avotari ke pepeni simba ari embomei na iketo kito Bada ta dei enana na eto ingari einge ea, ''eto Moses ta avotari ke pepeni aita embo na embo nei Mama Otohu ta Jango indari iji amite javotoho ari ikaja ari kajari mihei te?''