¹ Una dainai, dina tauratoi dounu mimia ela bona Lagau-hanai Ariana, Iesu na Betania ela, Lasaro, vanegai Iesu ese mase amo e hatorea isi tauna, ena hanua bunai. ² Bena unuseni ai idia ese adorahi anianina e dabaraia. Ia ana, Mareta ese isiaidia e lao heniva, a Lasaro bona taunimanima haida na Iesu ida ege diho. ³ Bena Maria ese muramura mai bonana nadi kiama-kiamana amo e karaia gauna e abia, Iesu aena ruaosi e dairilai, bena huina amo ma e dahu kaukau. Ruma na una muramura bonana namona ese e hahonua ⁴ A Iuda Isakariota, ena hahediba tauna ta, Iesu taona baine torea tauna, eto, ⁵ "Dahaka dainai ina muramura mai bonana se hoihoilaia dollar toi-ahu bema abilai bena ogogami taudia bema harihari henidia?" ⁶ Ia unu egwau toma, na dia ogogami taudia e bogadia hisiva dainai, a badina be ia na henao tauna. Ia be moni baegena dekenai bona e udava monidia na e vai henaova. ⁷ Una dainai Iesu eto, "A rakatania. Vada e abia hegaegaemu, lau igurigu dinana gauna. ⁸ Ogogami taudia na nega iboudiai dekemui ai nonoho." ⁹ Iuda taudia hutuma e kamonai Iesu na unuseni ai, bena una gabu ela, dia Iesu mo dainai, to Lasaro, Iesu ese mase amo e hatorea isi tauna, itana totona. ¹⁰ To hahelaga taudia e henega bou, Lasaro danu bae alaia eto; ¹¹ badina be ia dainai Iuda hutuma danu e raka ohova, Iesu e abiabiraiava. ¹² Daba ai, aria dainai e hegogo taudia hutuma bada vada ela. Bena e kamonai Iesu na Ierusalema ai bainea dara dae, ¹³ idia ese reta e abi, ia vairana ela, bena e tai lolo, eto, "Hosanna! Lohiabada ladanai e maimu tauna aita hanamoa, Ia na Isaraela edia pavapava. " ¹⁴ A Iesu ese doniki natuna ta e davaria bena latanai e helai kau; vada e torea hegeregerena. ¹⁵ "Siona natuna kekenina e, asio gari: A itaia, emu pavapava na e maimu, doniki natuna doruna ai e helaimu." ¹⁶ Ena hahediba na unu hereva anidia asi dibadia una negana ai: a Iesu hairaina e abia negana ai, idia vada e helaloune, ini gau iboudiai na ia dainai vada e tore bona idia danu unu e kara toma. ¹⁷ Taunimanima hutuma na ia ida e nohova, ia ese Lasaro gara amo e boiria lasi bona mase amo e hatorea isi negana ai, bena idia ese harina e piua. ¹⁸ Una dainai hutuma bada ia vairana ela, badina be idia na vada e kamonai ia ese una toa e karaia. ¹⁹ Bena Farisea taudia na e hereva heheni, eto, "O itaiamu, umui na o dareremu; a itaia, tanobada idoinai be ia enai vada e taomu." ²⁰ Aria negana ai toma-diho totona e dara dae taudia haida na Helene taudia. ²¹ Idia na Filipo, Betesaida Galileia tauna, dekena ela, e hamaoroa, eto, "Gauka e, ai na a uramu Iesu baia itaia." ²² Filipo na ela Anderea e hamaoroa; bena Aniderea, Filipo ida ela, Iesu e hamaoroa. ²³ Bena Iesu ese e haere henidia, eto, "Negana vada eme gini dae, Taunimanima Natuna ese hairaina vada baine abia. ²⁴ Momokani vaitani na hamaoromuimu, uit nadinadina na tano ai basine moru bona basine mase, ia na sibona baine mia kava; a baine mase, anina badana baine dobi. ²⁵ Ena mauri e ura heniamu tauna ese mauri baine reaia; a ena mauri ina tanobadai e inai heniamu tauna ese mauri baine abia tao ela bona hanaihanai. ²⁶ Tau ta baine ura lau isiaigu baine lao henia, ia ese baine gavagu; bena lau baina noho gabunai na egu hesiai tauna danu baine noho. Bema tau ta ese lau isiaigu baine lao henia, Tamagu ese do baine hanamoa. ²⁷ Harihari kudougu eme hetaha bona dahaka baina gwaurai? Bainato, "Tamagu e, ina hora amo bame hamaurigu." Badina binai hari ina hora ai vada name kau. ²⁸ Tamagu e, ladamu a heatolaia. Bena gado ta guba amo ema, eto, "Vada name heatolaia bona ma baina heatolaia." ²⁹ Bena hutuma unuseni ai gigini vada e kamonai bena eto, "guba eme rahua. Ma haida eto, "Aneru ta ese e hereva henia." ³⁰ Iesu na e haere, eto, "Una gado na dia lau daigu ai, a umui daimui ai. ³¹ Harihari ina tanobada na e hahemaoro heniamu: harihari ina tanobada lohiana bae lulua lasi. ³² Lau na tanobada ai bae piugu isi, unu amo taunimanima iboudiai lau dekegu ai baina veridia." ³³ Ia na unu e gwau toma, ena mase dalana e hahedinaraia. ³⁴ Bena aru taudia ese e haere henia, eto, "Ai taravatu amo vada a kamonai, Keriso na do baine noho hanaihanai. Badina be dahaka oi na o tomu. 'Taunimanima Natuna bae piua isi?' "Ina Taunimanima Natuna be daika?" ³⁵ Iesu eto, "Nega sisina diari na doene dekemui ai, ba raka balaheni diari o abiamu negana ai, dibura ese baine butumui tao na garina. Dibura lalonai e rakamu tauna na e lao heniamu gabuna asi dibana. ³⁶ Diari o abiamu neganai, diari bavabiabiraia, diari memeromui ai ba hahelao helaoreana." Iesu na unu e hereva toma, bena e raka oho, e noho hehuni. ³⁷ Ene be Iesu ese toa diagau vairadia ai e karava, to idia ese asie abiabiraiava. ³⁸ Una dainai, Isaia, peroveta tauna, ena hereva vada e momokani, eto, "Lohiabada e, daika ese emai hereva eme abia dae? "Bona Lohiabada imana danu daika enai eme hedinarai?" ³⁹ Una dainai idia ese asie abiabiraia, badina be Isaia ma eto, ⁴⁰ "Ia ese matadia vada e hakepulu, lalodia danu vada e haduhu; matadia amo ba ita na garina. Bona lalodia amo bae diba na garina. Bena bae helalokerehai baina hamauridia na garina. ⁴¹ Isaia na unu e gwau toma, badina be ia ese Iesu hairaina e itaia, bena e herevalaia. ⁴² Hanua lohiadia hutuma ese e abiabiraia, to asie gwauraia hedinarai, Farisea taudia daidiai; dubu amo bae doridia lasi na garina. ⁴³ Badina be taunimanima edia heimodai e ura henia bada, Dirava ena heimodai e ura henia maragi. ⁴⁴ Bena Iesu e tai lolo, eto,"Lau e abiabiraigumu tauna ese dia lau mo, a e siaigu Diravana danu e abiabiraiamu." ⁴⁵ Bona lau e itagumu tauna ese e siaigu Diravana danu e itaiamu. ⁴⁶ Lau na tanobada vada nama, diari na heto; una dainai e abiabiraigumu taudia iboudiai na dibura lalonai basie noho. ⁴⁷ Tau ta ese egu hereva baine kamonai to basine abia dae, lau ese basina hahemaoro henia, badina be lau na dia tanobada ihahemaoro henina a tanobada ihamaurina totona nama. ⁴⁸ E dadaraigumu bona egu hereva se abi daemu tauna, na mai ena hahemaoro, na gwaurai herevadia ese bae hahemaoro henia dina gabena ai. ⁴⁹ Badina dia lau sibogu ese egu hereva asina gwaurai, a Tamagu e siaigu Diravana, ese e haganigu dahaka hereva dahaka hereva baina gwaurai, bona ede baina gwaurai toma. ⁵⁰ Lau dibagu danu, ena hereva na mauri hanaihanai, una dainai, egu herevana Tamagu ese e haduagu hegeregerenai vada na gwauraimu.