1
Lau Petero Iesu Keriso ena aposetolo taugu ese eabimui hidi taumui, Pontio ai bona Galileia ai bona Kapadokia ai bona Asia ai bona Bitunia ai o noho hedoa-hedoamu na tore henimuimu.
2
Ita Tamada Dirava ese eabimui hidi guna bona Lauma Helaga ese e hahelagamui Iesu Keriso ba kamonai henia bena ia rarana ese baine nevarimui helaoreana.
3
Dirava, iseda Lohiabada, Iesu Keriso, Tamana, aita imodaia. Iena hebogahisi na badaherea dainai ia ese vada e havarada lou mauri helaoreana ai. Iesu Keriso mase amo e toreisi lou dainai.
4
Ahumui do bavabia, baine mia hanaihanai asi bebeka-bebekana basine marai, guba ai vada eatoa hegaegae umui emui.
5
Abidadama dainai Dirava ena siahu ese baine gimamui, ela bona vada e seua hahemaurina, nega gabenai ai baine hedinarai gauna bavabia.
6
Una dainai ena be ina nega sinai hedibagani momo daidiai daramui e dokomu, to ba moale.
7
Emui abidadama e tohoamu, gold lahi ai e tohoamu na heto. Ena namo ese gold ena namo e hereaiamu, ia na ihanamolaimui bona iha-heatolaimui bona imatauraimui gauna ai bainela Iesu Keriso baine hedinarai negana ai.
8
Ena be nega ta asi ai itaia, to o ura heniamu, bona o moalelaiamu, emui moalena asi igwauraina dalana, o moale hisidaemu.
9
Emui abidadama huahua dia do bavabia, laumamui ihamauridia benai.
10
Peroveta taudia, Dirava ena hariharibada emui ai baine kau o gwauraia guna taudia, ese hari hahemauri e henanadailaia bona e tahua malaka-malaka.
11
Keriso ena lauma lalodia ai e nohova; bona Keriso baine ani hisidia bona murinai baine abi hairaidia e hadiba laidiava, bona idia ese negana bona toana e tahuava.
12
E hadibadia danu unu gau e gaukaralaidia na dia idia edia, to umui emui; bona harihari sivarai-namo e harorolai henimui taudia ese vada e gwaurai, Lauma Helaga guba amo vada e siaia diho dainai. Unu gau aneru ese itana urana euramu e tomamu.
13
Lalomui ba hagoeva ba haheauka, Iesu Keriso baine hedinari negana ai emui ai baine kau harihari na balaroa mai lalomui idoidiai.
14
Kamonai namonamo ai baola o diburava negadia ai o gahusiva gaudia na basio hagoidia,
15
a e boirimui tauna vada e helaga hegeregerena umui danu ba helaga, emui kara idoidiai lalodia ai.
16
Badina be vada e torea,
17
Taunimanima e hahemaoro henidiamu na oromadia e lalomu, a ta ta ena gaukara ena gaukara daidiai e hahemaoro e henidiamu, Diravana o hahaneamu. Tamamu o gwauraiamu benaini, ina emui noho hedoa negana ai ba noho mai garimui ida.
18
Bona ba diba, senemui edia kara asi anidia amo e hamaurimui davana na dia baine pata gauna ta dia silver dia gold,
19
a rara hereadaena mamoe natuna asi bebeka-bebekana bona asi toutouna rarana na heto, Keriso rarana benai.
20
Tanobada do se havaraia negana ai eabia hegaegae, a ini dina gabedia ai vada eme hedinarai umui daimui ai.
21
Ia bagunai Dirava o abidadama heniamu Dirava ese mase amo e hatorea isi bona hairaina e henia taunimanima emui abidadama bona emui helaro na Dirava enai mimia.
22
Hereva momokani vada o kamonai dainai laumamui vada o hagoevadia, bona varavarada o lalokau henidia momokanimu, benaini ba heura heheni mai lalomui idoidiai.
23
Vada o vara matamata, dia baine pata gauna ena amo a mauri bona noho hanaihanai Diravana ena hereva dainai.
24
Badina be:
Taunimanima iboudiai na rei na heto,
Idia hairaidia na ini huahua na heheto.
Rei e maraimu bona huahua e hehunimu.
25
A Lohiabada ena hereva do baine hesiriu hanaihanai sivarai-namo vada e harorolai henimui herevana benai.
COMPLETED BY RDKH. ORI KOHU ON MONDAY (29/07/24), TIME: 3:58 PM